ປະທານສະພາແຫ່ງຊາດ ຫວຽດນາມ ຫງວຽນທິກິມເງິນ ເປັນປະທານກອງປະຊຸມສະຫຼຸບປີ ປະທານ AIPA 2020 ແລະ ກອງປະຊຸມສະມັດຊາໃຫຍ່ AIPA ຄັ້ງທີ 41
(VOVWORLD) - ຕອນບ່າຍວັນທີ 23 ທັນວາ, ຢູ່ຫໍສະພາແຫ່ງຊາດ, ທ່ານນາງປະທານສະພາແຫ່ງຊາດຫວຽດນາມ ຫງວຽນທິກິມເງິນ, ຫົວໜ້າຄະນະຊີ້ນຳແຫ່ງຊາດ AIPA ຄັ້ງທີ 41 ໄດ້ເປັນປະທານກອງປະຊຸມສະຫຼຸບ ປີປະທານ ສະພາລັດຖະສະພາລະຫວ່າງຊາດ ອາຊຽນ 2020 (ປະທານ AIPA 2020) ແລະ ກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດ ອາຊຽນ ຄັ້ງທີ 41 (AIPA ຄັ້ງທີ 41).
 ທ່ານນາງປະທານສະພາແຫ່ງຊາດຫວຽດນາມ ຫງວຽນທິກິມເງິນ ກ່າວຄຳເຫັນທີ່ກອງປະຊຸມ (ພາບ: TTXVN) |
ກ່າວຄຳເຫັນທີ່ກອງປະຊຸມ, ທ່ານນາງປະທານສະພາແຫ່ງຊາດຫວຽດນາມ ຫງວຽນທິກິມເງິນ ໃຫ້ຮູ້ວ່າ, ປີ 2020 ແມ່ນປີ ຫວຽດນາມ ຮັບ 3 ໜ້າທີ່ສຳຄັນຄືເປັນ ກຳມະການບໍ່ປະຈຳການສະພາຄວາມໝັ້ນຄົງ ສປຊ, ປະທານ ອາຊຽນ ແລະ ປະທານ AIPA ແລະ ກໍເປັນປີທີ່ໄດ້ຮັບຜົນສະທ້ອນຢ່າງໜັກໜ່ວງຈາກໂລກລະບາດໂຄວິດ - 19 ແລະ ໄພທຳມະຊາດ ແຕ່ກໍສາມາດຢັ້ງຢືນໄດ້ວ່າ ຫວຽດນາມ ປະຕິບັດສຳເລັດທັງສາມໜ້າທີ່ສຳຄັນໄດ້ເປັນຢ່າງດີ, ປະກອບສ່ວນຍົກສູງອິດທິພົນຊື່ສຽງ ແລະ ທີ່ຕັ້ງບົດບາດຂອງ ຫວຽດນາມ ໃນພາກພື້ນ ແລະ ໃນໂລກ.
ການຈັດຕັ້ງ ກອງປະຊຸມປະຈຳປີ ຄັ້ງທີ 26 ຂອງ ເວທີປາໄສລັດຖະສະພາ ອາຊີ - ປາຊີຟິກ ປະສົບຜົນສຳເລັດ (APPF – 26) ພ້ອມດ້ວຍບັນດາໝາກຜົນຂອງປີ ປະທານ AIPA 2020 ໄດ້ສ້າງຂີດໝາຍເພີ່ມເຕີມໃຫ້ແກ່ການເຄື່ອນໄຫວການທູດລັດຖະສະພາ, ປະກອບສ່ວນສຳຄັນເຂົ້າໃນຜົນສຳເລັດລວມຂອງການເຄື່ອນໄຫວການຕ່າງປະເທດຂອງພັກ, ລັດ ຫວຽດນາມ.
ວຽກງານການຕ່າງປະເທດຫຼາຍຝ່າຍຂອງ ສະພາແຫ່ງຊາດຫວຽດນາມ ໄດ້ສ້າງຂີດໝາຍພົ້ນເດັ່ນກ່ຽວກັບການເຊື່ອມຕໍ່ບັນດາອົງການລັດຖະສະພາ ເຊິ່ງ ສະພາແຫ່ງຊາດຫວຽດນາມ ເປັນສະມາຊິກ, ຜ່ານນັ້ນ ເສີມຂະຫຍາຍໄດ້ກຳລັງແຮງສັງລວມ, ດຶງດູດການເຂົ້າຮ່ວມຂອງລັດຖະສະພາສາກົນ ແລະ ພາກພື້ນ ເປັນຈຳນວນຫຼາຍ, ປະກອບສ່ວນຍົກສູງບົດບາດ ແລະ ທີ່ຕັ້ງບົດບາດຂອງສະພາແຫ່ງຊາດ ຫວຽດນາມ ໃນສະຫະພັນ ລັດຖະສະພາສາກົນ (IPU), ເວທີປາໄສ ລັດຖະສະພາ ອາຊີ - ປາຊີຟິກ (APPF), AIPA,…/.