ທ່ານປະທານາທິບໍດີ Kais Saied ຕ້ອນຮັບທ່ານເອກອັກຄະລັດຖະທູດ ຫງວຽນຮຸຍຢຸງ (ພາບ: ສະຖານທູດ ຫວຽດນາມ ປະຈຳ ອີຢິບ)

        ວັນທີ 05 ມີນາ, ຢູ່ນະຄອນຫຼວງ Tunis, ປະເທດ ຕຸຍນີຊີ, ທ່ານເອກອັກຄະລັດຖະທູດ ຫວຽດນາມ ປະຈຳ ອີຢິບ, ທັງຮັບຜິດຊອບໜ້າທີ່ຢູ່ ຕຸຍນີຊີ ຫງວຽນຮຸຍຢຸງ ໄດ້ຍື່ນສານຕາຕັ້ງຂອງທ່ານປະທານປະເທດ ຫວຽດນາມ ຫວໍ້ວັນເຖືອງ ຂຶ້ນຕໍ່ທ່ານປະທານາທິບໍດີ ຕຸຍນີຊີ Kais Saied.

        ທີ່ພິທີ, ທ່ານປະທານາທິບໍດີ Kais Saied ໄດ້ທົບທ້ວນຄືນມູນເຊື້ອການພົວພັນອັນດີງາມລະຫວ່າງ 2 ປະເທດ, ກໍຄືສາຍພົວພັນທີ່ໃກ້ຊິດສະໜິດສະໜົມລະຫວ່າງທ່ານປະທານາທິບໍດີ Habib Bourguiba ແລະ ປະທານ ໂຮ່ຈີມິນ. ທ່ານປະທານາທິບໍດີ Kais Saied ສະແດງຄວາມປະທັບໃຈຕໍ່ບັນດາຜົນງານດ້ານເສດຖະກິດ - ສັງຄົມເຊິ່ງ ຫວຽດນາມ ບັນລຸໄດ້ໃນໄລຍະຜ່ານມາ, ທ່ານເນັ້ນໜັກວ່າ, ຫວຽດນາມ ແມ່ນໜຶ່ງໃນບັນດາພື້ນຖານເສດຖະກິດ ອາຊີ ທີ່ພົ້ນເດັ່ນ. ທ່ານປາດຖະໜາວ່າ, 2 ປະເທດຊຸກຍູ້ການພົວພັນ 2 ຝ່າຍ, ເພີ່ມທະວີການຢ້ຽມຢາມເຊິ່ງກັນແລະກັນຂອງຄະນະຜູ້ແທນທຸກຂັ້ນໃນໄລຍະຈະມາເຖິງ.

        ສ່ວນທ່ານເອກອັກຄະລັດຖະທູດ ຫງວຽນຮຸຍຢຸງ ໄດ້ສົ່ງຄຳຢື້ຢາມຖາມຂ່າວຂອງທ່ານປະທານປະເທດ ຫວໍ້ວັງເຖືອງ ເຖິງທ່ານປະທານາທິບໍດີ Kais Saied; ທ່ານຢືນຢັນວ່າ, ຈະເຮັດຈົນສຸດຄວາມສາມາດຂອງຕົນເພື່ອປະກອບສ່ວນເຂົ້າໃນບັນດາບາດກ້າວພັດທະນາໃໝ່ໃນການພົວພັນຂອງ 2 ປະເທດ.

ທ່ານປະທານສະພາຕ່ຳ  Andrés David Calle Aguas, ຕ້ອນຮັບທ່ານ ຫວູຈູງມີ້, ເອກອັກຄະລັດຖະທູດ ຫວຽດນາມ ປະຈຳ ເວເນຊູເອລາ, ທັງຮັບຜິດຊອບໜ້າທີ່ຢູ່ ໂກລົມເບຍ (ພາບ: baoquocte.vn)

          ແລະກໍ່ໃນວັນທີ 05 ມີນາ, ຢູ່ນະຄອນຫູວງ Bogota, ປະເທດ ໂກລົມເບຍ, ທ່ານປະທານສະພາຕ່ຳ ໂກລົມເບຍ Andrés David Calle Aguas, ໄດ້ຕ້ອນຮັບທ່ານ ຫວູຈູງມີ້, ເອກອັກຄະລັດຖະທູດ ຫວຽດນາມ ປະຈຳ ເວເນຊູເອລາ, ທັງຮັບຜິດຊອບໜ້າທີ່ຢູ່ ໂກລົມເບຍ.

          ຢູ່ທີ່ນີ້, ທ່ານປະທານສະພາຕ່ຳ ໂກລົມເບຍ ເນັ້ນໜັກວ່າ, ປີ 2024 ນີ້, ໂກລົມເບຍ ແລະ ຫວຽດນາມ ສະເຫຼີມສະຫຼອງ 45 ປີແຫ່ງວັນສ້າງຕັ້ງການພົວພັນທາງການທູດ (1979 - 2024), ສະນັ້ນ, ທ່ານປາດຖະໜາຢາກຊຸກຍູ້ການພົວພັນຮ່ວມມືລະຫວ່າງ 2 ອົງການນິຕິບັນຍັດຂອງ 2 ປະເທດ, ຜ່ານນັ້ນ, ປະກອບສ່ວນຊຸກຍູ້ການຮ່ວມມືຫຼາຍດ້ານລະຫວ່າງ ໂກລົມເບຍ ແລະ ຫວຽດນາມ; ສະເໜີໃຫ້ 2 ຝ່າຍຕັ້ງໜ້າພິຈາລະຈາການສ້າງຕັ້ງກຸ່ມສະມາຊິກລັດຖະສະພາຢູ່ສະພາແຫ່ງຊາດ 2 ປະເທດ.

          ສ່ວນທ່ານເອກອັກຄະລັດຖະທູດ ຫວູຈູງມີ້ ຢືນຢັນວ່າ, ຈະມານະພະຍາຍາມເຮັດຈົນສຸດຄວາມສາມາດຂອງຕົນເພື່ອຊຸກຍູ້ການພົວພັນມິດຕະພາບ ແລະ ການຮ່ວມມືຫຼາຍດ້ານລະຫວ່າງ 2 ປະເທດ, ພິເສດແມ່ນ 2 ອົງການນິຕິບັນຍັດຂອງ 2 ປະເທດ.