(vovworld) – ປະຕິກິລິຍາຕໍ່ໜ້າເລື່ອງ ສ. ປົກຄອງດ້ວຍຕົນເອງ Crimea ໃນວັນທີ 6/3 ທີ່ປ່ອນບັດເຫັນດີເປັນເອກະສັນໂຮມເຂດດິນແດນນີ້ເຂົ້າ ສະຫະພັນ ລັດເຊຍ ດ້ວຍຖານະເປັນເຂດແຄ້ວນເອກະລາດ, ທ່ານປະທານນາທິບໍດີຊົ່ວຄາວ ຢູແກຼນ Oleksander Turchinov ຖະແຫຼງວ່າ: ອຳນາດປົກຄອງຢູ່ທີ່ນີ້ແມ່ນຜິດກົດໝາຍ.
ທ່ານ Turchinov ຖືວ່າ: ອຳນາດການປົກຄອງຢູ່ Crimea ແມ່ນຜິດກົດໝາຍ, ລວມມີລັດຖະສະພາ ແລະ ລັດຖະບານ, ແລະທ່ານຈະບໍ່ອອກຖະແຫຼງການກ່ຽວກັບ Crimea. ໃນຂະນະນັ້ນ, ທ່ານຮອງນາຍົກລັດຖະມົນຕີຜູ້ທີ່ໜຶ່ງແຫ່ງ ສ. ປົກຄອງດ້ວຍຕົນເອງ Crimea Rustam Temirgaliev ເນັ້ນໜັກວ່າ: ມະຕິກ່ຽວກັບການໂຮມເຂົ້າເປັນພາກສ່ວນໜຶ່ງຂອງສະຫະພັນ ລັດເຊຍ ຂອງອຳນາດການປົກຄອງ Crimea ມີຜົນສັກສິດ ແລະ ບັນດາທະຫານ ຢູແກຼນ ໃນເຂດດິນແດນ Crimea ຈະໄດ້ຮັບຖືວ່າແມ່ນ “ພວກຮຸກຮານ”, ດັ່ງນັ້ນຕ້ອງປະລະອາວຸດ ຫຼື ອອກຈາກເຂດດິນນີ້.
ກ່ອນໜ້ານັ້ນ, ລັດຖະສະພາຂອງປະເທດ ສ. ປົກຄອງດ້ວຍຕົນເອງ Crimea ໄດ້ປ່ອນບັດຮັບຮອງເອົາມະຕິກ່ຽວກັບເລື່ອງໂຮມ Crimea ເຂົ້າກັບສະຫະພັນ ລັດເຊຍ, ພ້ອມທັງກຳນົດຈຸດເວລາດຳເນີນການລົງປະຊາມະຕິຢູ່ Crimea ກ່ຽວກັບບັນຫານີ້ໃນວັນທີ 16/3 ຈະມາເຖິງ.
ແລະກໍ່ໃນວັນດຽວກັນ, ກຳມະການຄະນະລັດຖະບານ ຈີນ ຢ່າງເຈຍຊື້ ໃນການໂອ້ລົມທາງໂທລະສັບກັບທີ່ປຶກສາດ້ານປ້ອງກັນຄວາມສະຫງົບແຫ່ງຊາດ ອາເມລິກາ ທ່ານນາງ Susan Rice ກ່ຽວກັບສະພາບການຢູ່ ຢູແກຼນ, ໄດ້ເນັ້ນໜັກເຖິງບັນດາສິດ ແລະ ສິດຜົນປະໂຫຍດທີ່ຖືກຕ້ອງຕາມກົດໝາຍຂອງບັນດາກຸ່ມຊົນເຜົ່າສ່ວນໜ້ອຍ ຢູແກຼນ ຄວນໄດ້ຮັບຄວາມເອົາໃຈໃສ່ເມື່ອແກ້ໄຂບັນຫາຢູ່ປະເທດນີ້.