(vovworld) - ຄ່ຳຄືນວັນທີ 17/11 (ຕາມເວລາຮ່າໂນ້ຍ), ທ່ານນາງນາຍົກລັດຖະມົນຕີເຢຍລະມັນ Angela Merkel ໄດ້ຕ້ອນຮັບ ແລະ ເຈລະຈາກັບທ່ານປະທານາທິບໍດີອາເມລິກາ Barack Obama ຢູ່ນະຄອນຫຼວງ Berlin. ການນຳ 2 ທ່ານໄດ້ປຶກສາຫາລືຫຼາຍບັນຫາກ່ຽວຂ້ອງເຖິງນະໂຍບາຍນິວເຄຼຍ, ການຕ້ານການປ່ຽນແປງຂອງດິນຟ້າອາກາດ, ເສດຖະກິດ ແລະ ການເງິນ, ການຕໍ່ສູ້ຕ້ານການກໍ່ການຮ້າຍ, ການພົວພັນພັນທະມິດໃນກຸ່ມ NATO ກໍຄືການພົວພັນ NATO - ລັດເຊຍ. ໜຶ່ງໃນບັນດາເນື້ອໃນປຶກສາຫາລືຈຸດສຸມລະຫວ່າງທ່ານນາງ Merken ແລະ ທ່ານ Obama ແມ່ນອະນາຄົດຂອງສັນຍາຄູ່ຮ່ວມມືດ້ານການຄ້າ ແລະ ການລົງທຶນຂ້າມມະຫາສະມຸດອັດລັງຕິກ (TTIP). ການນຳ 2 ທ່ານລ້ວນແຕ່ຖືວ່າ, ອາເມລິກາ ແລະ ເອີລົບບັນລຸໄດ້ຫຼາຍບາດກ້າວສຳຄັນໃນວິວັດການເຈລະຈາ TTIP ແລະ ສິ່ງສຳຄັນແມ່ນ 2 ຝ່າຍຕ້ອງສືບຕໍ່ຮັກສາການເຈລະຈາ. ຄວາມຫຍຸ້ງຍາກເຊິ່ງບັນດາຝ່າຍພວມປະເຊີນໜ້າແມ່ນກະແສຟອງຂັດຄ້ານ TTIP ຂອງພົນລະເມືອງເອີລົບພາກສ່ວນໜຶ່ງ, ໃນນັ້ນມີຊາວເຢຍລະມັນ ຫຼາຍຄົນ ແລະ ພິເສດແມ່ນທັດສະນະຕ້ານການຄ້າເສລີຂອງທ່ານປະທານາທິບໍດີອາເມລິກາ ຜູ້ຫາກໍໄດ້ຮັບໄຊຊະນະໃນການເລືອກຕັ້ງ Donald Trump. ທ່ານນາງ Merken ສະແດງຄວາມເຊື່ອໝັ້ນວ່າ, ທ່ານນາງ ແລະ ທ່ານ Trump ກໍຄືອຳນາດການປົກຄອງເຢຍລະມັນ ແລະ ອາເມລິກາ ຈະສົມທົບກັນເປັນຢ່າງດີໃນໄລຍະຈະມາເຖິງ, ໂດຍອີງໃສ່ພື້ນຖານນະໂຍບາຍການຕ່າງປະເທດຂອງບັນດາຝ່າຍ, ກໍຄືບັນດາຄຸນຄ່າຕົ້ນຕໍ່ເຊິ່ງ 2 ຝ່າຍພວມປະຕິບັດຕາມ.