ຜູ້ອຳນວຍການໃຫຍ່WTOຕີລາຄາສູງຜົນງານດ້ານເສດຖະກິດ-ສັງຄົມຂອງຫວຽດນາມ
ທ່ານ ເຢືອງຈີຢຸງ ແລະ ທ່ານ ທ່ານ Roberto Azevedo
(ພາບ: Hoàng Hoa/TTXVN)
|
(vovworld)- ວັນທີ 24/11, ທ່ານ ເຢືອງຈີຢຸງ ເອກອັກຄະລັດຖະທູດ ຫົວໜ້າຄະນະປະຕິບັດງານຫວຽດນາມ ປະຈຳສະຫະປະຊາຊາດ, ອົງການການຄ້າໂລກ (WTO) ແລະ ອົງການຈັດຕັ້ງສາກົນອື່ນ ປະຈຳເຊີແນວ ໄດ້ມີການພົບປະກັບ ທ່ານ Roberto Azevedo ຜູ້ອຳນວຍການໃຫຍ່ WTO ເພື່ອຍື່ນສານຕາຕັ້ງ. ທີ່ການພົບປະ, ທ່ານ ເອກອັກຄະລັດຖະທູດ ເຢືອງຈີຢຸງ ຢັ້ງຢືນ ນະໂຍບາຍສະເໝີຕົ້ນສະເໝີປາຍ ຂອງຫວຽດນາມ ໃນການສືບຕໍ່ປະຕິຮູບ ແລະ ເປີດປະຕູ, ຫັນການຄ້າເປັນເສລີ ເຊື່ອມໂຍງເຂົ້າພື້ນຖານເສດຖະກິດໂລກ ນັບມື້ນັບເລິກເຊິ່ງ ແລະ ກວ້າງຂວາງກ່ວາ. ທ່ານ ເອກອັກຄະລັດຖະທູດ ກໍ່ຢັ້ງຢືນ ການສະໜັບສະໜູນຢ່າງສະເໝີຕົ້ນສະເໝີປາຍ ຂອງຫວຽດນາມ ສຳລັບລະບົບການຄ້າຫຼາຍຝ່າຍ ແລະ ພະຍາຍາມສຸດຄວາມສາມາດຂອງຕົນ ເພື່ອປະກອບສ່ວນ ເຂົ້າໃນຜົນສຳເລັດຂອງ WTO. ທ່ານ ເອກອັກຄະລັດຖະທູດ ເຢືອງຈີຢຸງ ສະແດງຄວາມປາດຖະໜາ ຢາກສືບຕໍ່ໄດ້ຮັບຄຳປຶກສາ ຂອງຄະນະເລຂາ ແລະ ຜູ້ອຳນວຍການໃຫຍ່ WTO ກ່ຽວກັບນະໂຍບາຍການພັດທະນາເສດຖະກິດ, ການຄ້າຂອງຫວຽດນາມ, ສະເໜີຄະນະເລຂາ ແລະ ທ່ານ ຜູ້ອຳນວຍການໃຫຍ່ ສືບຕໍ່ໃຫ້ບຸລິມະສິດ, ໜູນຊ່ວຍຫວຽດນາມ ໃນວິວັດທະນາການກໍ່ສ້າງ ແລະ ປັບປຸງກອບນິຕິກຳ ກ່ຽວກັບເສດຖະກິດ-ການຄ້າ ໃຫ້ສົມບູນແບບ, ໃນການບຳລຸງສ້າງຍົກສູງກຳລັງຄວາມສາມາດ ປະຕິບັດບັນດາຄຳໝັ້ນສັນຍາຫຼາຍຝ່າຍ ແລະ ແກ້ໄຂການຂັດແຍ່ງກັນ.
ສ່ວນ ທ່ານ Roberto Azevedo ຜູ້ອຳນວຍການໃຫຍ່ WTO ສະເໜີຫວຽດນາມ ສືບຕໍ່ໜູນຊ່ວຍ ແລະ ສົມທົບກັບຄະນະເລຂາ WTO ໃນການຍົກອອກບັນດາຂໍ້ສະເໜີແນະ ເພື່ອແນໃສ່ປະຕິບັດບັນດາຄຳໝັ້ນສັນຍາຫຼາຍຝ່າຍ, ກໍ່ຄືບັນດາຂໍ້ລິເລີ່ມໃຫ້ກ່ບັນດາບັນຫາທີ່ເກີດຂື້ນ ໃນການຄ້າສາກົນຢ່າງມີປະສິດທິຜົນ.