ທ່ານ Ichiro Ozawa ອະດີດ​ປະທານ​ພັກ​ DPJ ຜູ້ຢືນຢູ່ເຄິ່ງກາງ ພາບ: internet

(vovword) - ວັນ​ທີ 3/7, ພັກປະຊາທິປະໄຕ ຍີ່ປຸ່ນ DPJ ກຳ​ອຳນາດ​ໄດ້​ຕົກລົງ​ໄລ່​ທ່ານ Ichiro Ozawa ອະດີດ​ປະທານ​ພັກ​ດັ່ງກ່າວ ພ້ອມ​ກັບ​ສະມາຊິກ​ສະພາ​ຕຳ່​ 36 ທ່ານ ອອກ​ຈາກ​ພັກ​ນີ້ ພາຍຫລັງ​ຫນ່ວຍ​ສະມາຊິກ​ສະພາ​ແຫ່ງ​ຊາດນີ້​ຍື່ນໃບ​ຄຳ​ຮ້ອງ​ຂໍ​ອອກ​ຈາກ​ພັກ ​ເພື່ອ​ຄັດຄ້ານ​ຂໍ້​ຕົກລົງ​ເພີ່ມ​ອາກອນ​ໃຊ້​ສອຍ​ຂອງ​ລັດຖະບານ. ການ​ກະທຳ​ດັ່ງກ່າວ​ດຳ​ເນີນ​ໄປ​ພາຍຫລັງ​ສະພາ​ຕຳ່​ຍີ່​ປຸ່ນ​ໄດ້​ປ່ອນ​ບັດ​ຮັບຮອງ​ເອົາ​ຮ່າງ​ກົດໝາຍ​ເພີ່ມ​ອາກອນ​ໃຊ້​ສອຍ​ຢູ່ ຍີ່​ປຸ່ນ ​ໃນ​ອາທິດ​ກ່ອນ​ໃຫ້​ຂຶ້ນ​ທົບ​ສອງ​ເທົ່ານັບ​ແຕ່​ເດືອນ 10/2015. ທີ່​ການ​ປ່ອນ​ບັດ, ສະມາຊິກ​ຂອງ​ພັກ​ປະຊາທິປະ​ໄຕ​ຍີ່​ປຸ່ນ 57 ທ່ານ ​ໄດ້​ປ່ອນ​ບັດ​ຄ້ານ, ​ໃນ​ນັ້ນ ມີ​ອະ​ດີດ​ປະທານ Ozawa ຜູ້ນຳ​ຫນ້າ​ພັກ​ຝ່າຍ​ໃຫຍ່​ສຸດ​​ໃນ​ພັກ​ປະຊາທິປະ​ໄຕ​ຍີ່​ປຸ່ນ ​ແລະ ກໍ​ແມ່ນ​ຜູ້​ມີ​ຄຸນ​ງາມ​ຄວາມ​ດີ​ນຳພາພັກ DPJ ຂຶ້ນ​ກຳ​ອຳນາດ​ຢູ່ ຍີ່​ປຸ່ນ ​ໃນ​ປີ 2009. ການ​ກະທຳ​ຂອງ​ບັນດາ​ທ່ານ​ສະມາຊິກ​​ເຫລົ່ານີ້​ໄດ້​ຮັບ​ຖື​ວ່າ ​ແມ່ນກໍ່​ໃຫ້​ເກີດ​ຄວາມ​ແບ່ງ​ແຍກ​ພາຍ​ໃນ​ພັກ​ປະຊາທິປະ​ໄຕ ຍີ່​ປຸ່ນ.