ທີ່ການພົບປະເຈລະຈາ (ພາບ: TTXVN)

        ຕອນບ່າຍວັນທີ 27 ເມສາ, ຢູ່ສຳນັກງານລັດຖະສະພາກຸ່ມຕະຫຼາດລວມ ອາເມລິກາ ໃຕ້ (MERCOSUR), ຢູ່ Montevideo, ທ່ານປະທານສະພາແຫ່ງຊາດ ເວືອງດິ່ງເຫວະ ໄດ້ພົບປະເຈລະຈາກັບທ່ານປະທານລັດຖະສະພາ MERCOSUR (PARLASUR) Gustavo Penades ແລະ ບັນດາຮອງປະທານຕາງໜ້າໃຫ້ບັນດາປະເທດສະມາຊິກຂອງກຸ່ມ (ລວມມີ: ອາກຊັງຕິນ, ບຣາຊິນ, ອູຣູກວາຍ, ປາຣາກວາຍ).

        ທີ່ການພົບປະເຈລະຈາ, ທ່ານປະທານສະພາແຫ່ງຊາດ ເວືອງດິ່ງເຫວະ ຢືນຢັນວ່າ, ຫວຽດນາມ ຖືເປັນສຳຄັນ ແລະ ປາດຖະໜາຢາກເພີ່ມທະວີການພົວພັນກັບ MERCOSUR ເວົ້າລວມ ແລະ ກັບແຕ່ລະປະເທດສະມາຊິກຂອງກຸ່ມເວົ້າສະເພາະ. ຕາມທ່ານປະທານສະພາແຫ່ງຊາດ ເວືອງດິ່ງເຫວະ ແລ້ວ, ໝາກຜົນການຮ່ວມມືລະຫວ່າງ 2 ຝ່າຍໃນໄລຍະຜ່ານມາຍັງບໍ່ທັນສົມກັບຄວາມສາມາດບົ່ມຊ້ອນຂອງ 2 ຝ່າຍ. ທ່ານປະທານສະພາແຫ່ງຊາດໄດ້ແຈ້ງໃຫ້ຊາບວ່າ ຫວຽດນາມ ໄດ້ສ້າງສຳເລັດການສຳຫຼວດພາຍໃນກ່ຽວຂ້ອງເຖິງການເຈລະຈາ FTA ກັບ MERCOSURS; ທ່ານປາດຖະໜາວ່າ 2 ຝ່າຍຈະເລີ່ມດຳເນີນການເຈລະຈາໂດຍໄວ ເພື່ອມມຸ່ງໄປເຖິງການລົງນາມໃນສັນຍານີ້, ສ້າງຄວາມສະດວກໃຫ້ແກ່ການຄ້າ, ການລົງທຶນລະຫວ່າງ ຫວຽດນາມ ແລະ ບັນດາປະເທດສະມາຊິກໃນກຸ່ມ.

        ສ່ວນຝ່າຍ PARLASUR, ທ່ານປະທານ Gustavo Penades ພ້ອມກັບບັນດາຮອງປະທານເນັ້ນໜັກວ່າ, PARLASUR ເອົາໃຈໃສ່ທີ່ສຸດ ແລະ ປາດຖະໜາຢາກເພີ່ມທະວີການຮ່ວມມືກັບສະພາແຫ່ງຊາດ ຫວຽດນາມ ຍ້ອນບົດບາດສຳຄັນຍຸດທະສາດຂອງ ຫວຽດນາມ ບໍ່ພຽງແຕ່ຢູ່ພາກພື້ນເທົ່ານັ້ນ, ຫາກຢູ່ໃນໂລກອີກດ້ວຍ. ການນຳ PARLASUR ປາດຖະໜາວ່າ ພາຍຫຼັງການຢ້ຽມຢາມຄັ້ງນີ້, ການພົວພັນລະຫວ່າງ ຫວຽດນາມ - MERCOSURS ແລະ ການພົວພັນລະຫວ່າງສະພາແຫ່ງຊາດ ກັບ PARLASUR ຈະພັດທະນາຢ່າງແຮງ, ບັນລຸປະສິດທິຜົນ ແລະ ແທດຈິງຫຼາຍກວ່າເກົ່າ.

        ພາຍຫຼັງການພົບປະເຈລະຈາ, ສະພາແຫ່ງຊາດ ຫວຽດນາມ ແລະ  PARLASUR ໄດ້ອອກແຈ້ງການສື່ມວນຊົນຮ່ວມ.