ພິທີຊັກທຸງ ອາຊຽນ ແລະ ທຸງຊາດ ຫວຽດນາມ
(ພາບ:TTXVN)
(vovworld)- ຕອນເຊົ້າວັນທີ 8/8, ຢູ່ ສຳນັກງານກະຊວງການຕ່າງປະເທດ(ຮ່າໂນ້ຍ), ກະຊວງການຕ່າງປະເທດໄດ້ຈັດຕັ້ງພິທີຊັກທຸງ ອາຊຽນ ແລະ ທຸງຊາດຫວຽດນາມ ເນື່ອງໃນໂອກາດສະເຫຼີມສະຫຼອງ 47 ປີ ແຫ່ງວັນສ້າງຕັ້ງ ອາຊຽນ (8/8/1967-8/8/2014) ແລະ 19ປີ ແຫ່ງວັນ ຫວຽດນາມເຂົ້າເປັນສະມາຊິກ ອາຊຽນ (28/7/1995-28/7/2014).
ໃນວັນທີ 8/8, ບັນດາປະເທດສະມາຊິກໃນ ອາຊຽນ ຈະພ້ອມກັນ ຊັກທຸງ ອາຊຽນ , ເພື່ອສະແດງຄວາມຕັດສິນໃຈ ແລະ ສະຕິສ້າງ ປະຊາຄົມ ອາຊຽນ ໃນປີ 2015ຢ່າງຈະແຈ້ງ, ເສີມຂະຫຍາຍບົດບາດ ແລະ ຮູບພາບຂອງ ອາຊຽນ ແມ່ນຍາມໃດກໍ່ຮັກສາບັນດາຫຼັກການພື້ນຖານ,ສາມັກຄີ,ເປັນເອກະພາບເປັນເຈົ້າການ, ມີຫົວຄິດປະດິດສ້າງໃນການແກ້ໄຂບັນດາບັນຫາທີ່ວາງອອກ ໃນໄລຍະພັດທະນາໃໝ່, ພິເສດແມ່ນບັນດາການທ້າທາຍສຳລັບສັນຕິພາບ, ສະຖຽນລະພາບ ແລະ ການພັດທະນາຢູ່ພາກພື້ນ. ທຸງ ອາຊຽນ ແມ່ນສັນຍາລັກແຫ່ງຄວາມສາມັກຄີ, ບັນດາຫຼັກການ ແລະ ຄວາມມານະພະຍາຍາມຂອງ ອາຊຽນ. ທຸງ ອາຊຽນ ກໍ່ສະແດງໃຫ້ເປັນປະຊາຄົມ ອາຊຽນ ທີ່ໝັ້ນຄົງ, ສັນຕິພາບ, ສາມັກຄີ ແລະ ຂະຫຍັນຂັນເຄື່ອນ.
ແລະກໍ່ໃນວັນທີ 8/8, ສະຖານທູດ ຫວຽດນາມ ປະຈຳ ມາເລເຊຍ ໄດ້ຈັດຕັ້ງພິທີຊັກທຸງ ອາຊຽນ ແລະ ທຸງຊາດ ຫວຽດນາມ ເນື່ອງໃນໂອກາດສະເຫຼີມສະຫຼອງ 47 ປີແຫ່ງວັນສ້າງຕັ້ງ ອາຊຽນ ແລະ 19 ປີແຫ່ງວັນ ຫວຽດນາມ ເຂົ້າເປັນສະມາຊິກ ອາຊຽນ ຢ່າງເປັນທາງການ (28/7/1995 – 28/7/2014).
ກ່າວຄຳເຫັນທີ່ພິທີ, ທ່ານເອກອັກຄະລັດຖະທູດ ຫວຽດນາມ ປະຈຳ ມາເລເຊຍ ຫງວຽນຮົ່ງທາວ ໄດ້ທົບທວນຄືນວິວັດການສ້າງຕັ້ງ ແລະ ພັດທະນາຂອງ ອາຊຽນ ນັບແຕ່ເວລາສ້າງຕັ້ງເມື່ອປີ 1967. ໂດຍສະແດງຄວາມເປັນກຽດ ແລະ ຄວາມເອກອ້າງທະນົງໃຈເມື່ອໄດ້ເຮັດວຽກຢູ່ ມາເລເຊຍ, ໜຶ່ງໃນບັນດາປະເທດສ້າງຕັ້ງ ອາຊຽນ ແລະ ແມ່ນປະເທດປະທານ ອາຊຽນ ໃນປີ 2015, ທ່ານເອກອັກຄະລັດຖະທູດ ຫງວຽນຮົ່ງທາວ ຫວັງວ່າ ດ້ວຍຄວາມຕັດສິນໃຈ ແລະ ຄວາມມານະພະຍາຍາມຢ່າງບໍ່ຢຸດຢັ້ງຂອງບັນດາປະເທດສະມາຊິກ, ປະຊາຄົມ ອາຊຽນ ສາມັກຄີ, ຂະຫຍັນຂັນເຄື່ອນ ແລະ ໝັ້ນຄົງເຂັ້ມແຂງຈະໄດ້ຮັບການສ້າງຂຶ້ນສຳເລັດໃນປີຈະມາເຖິງ. ທ່ານເອກອັກຄະລັດຖະທູດ ກໍ່ເນັ້ນໜັກວ່າ: 19 ປີແຫ່ງການເຂົ້າເປັນສະມາຊິກ ອາຊຽນ, ຫວຽດນາມ ມີການປະກອບສ່ວນຢ່າງຕັ້ງໜ້າ, ມີປະສິດທິຜົນເຂົ້າໃນການເຄື່ອນໄຫວຂອງ ອາຊຽນ ແລະ ພວມສືບຕໍ່ພ້ອມກັບບັນດາປະເທດ ອາຊຽນ ສູ້ຊົນປະຕິບັດຈຸດໝາຍສ້າງປະຊາຄົມ ອາຊຽນ ໃນປີ 2015 ແລະ ໄລຍະພັດທະນາຕໍ່ໄປ.