ທ່ານປະທານປະເທດຫວຽດນາມ ຫງວຽນຊວັນຟຸກ ເຂົ້າຮ່ວມວັນບຸນ “ສີສັນລະດູບານໃໝ່ໃນທຸກແຖບຖິ່ນຂອງປະເທດຊາດ” ປີ 2022 (ພາບ: VOV)

    ຕອນເຊົ້າວັນທີ 12 ມັງກອນ, ຢູ່ຮ່າໂນ້ຍ, ທ່ານປະທານປະເທດຫວຽດນາມ ຫງວຽນຊວັນຟຸກ ໄດ້ເຂົ້າຮ່ວມ ແລະ ກ່າວຄຳເຫັນໃນວັນບຸນ “ສີສັນລະດູບານໃໝ່ໃນທຸກແຖບຖິ່ນຂອງປະເທດຊາດ” ປີ 2022. ກ່າວຄຳເຫັນໃນວັນບຸນ, ທ່ານປະທານປະເທດ ຫວຽດນາມ ເນັ້ນໜັກວ່າ ພື້ນຖານອະລິຍະທຳອັນສະຫງ່າງາມຂອງຊາດ ຫວຽດນາມ ໄດ້ຮັບການສ້າງຕັ້ງຂຶ້ນຈາກ 54 ຊົນເຜົ່າອ້າຍນ້ອງ. ນັ້ນແມ່ນພື້ນຖານວັດທະນະທຳທີ່ຫຼາກຫຼາຍສີສັນ, ອຸດົມສົມບູນ, ມີຄວາມເປັນເອກະພາບສູງກ່ຽວກັບພາສາ, ແມ່ນຊັບສົມບັດອັນລ້ຳຄ່າຂອງຊາດ. ພັກ, ລັດ ຍາມໃດກໍມີຄວາມເອົາໃຈໃສ່ເປັນພິເສດເຖິງພໍ່ແມ່ປະຊາຊົນບັນດາເຜົ່າສ່ວນໜ້ອຍ, ພັດທະນາພື້ນຖານໂຄງລ່າງຢູ່ເຂດຫ່າງໄກສອກຫຼີກ, ປະຕິບັດບັນດານະໂຍບາຍພັດທະນາເສດຖະກິດ - ສັງຄົມ ແລະ ເອົາໃຈໃສ່ເຖິງການອະນຸລັກຮັກສາ ແລະ ເສີມຂະຫຍາຍຄຸນຄ່າວັດທະນະທຳຂອງປະຊາຊົນບັນດາເຜົ່າອ້າຍນ້ອງ, ຖືວັດທະນະທຳບັນດາເຜົ່າແມ່ນພາກສ່ວນໜຶ່ງທີ່ບໍ່ອາດຕັດແຍກອອກຈາກວັດທະນະທຳ ຫວຽດນາມ ໄດ້. ດ້ວຍການເຄື່ອນໄຫວຫຼາຍຢ່າງທີ່ຈັດຂຶ້ນທຸກໆປີຢູ່ ໝູ່ບ້ານວັດທະນະທຳ - ການທ່ອງທ່ຽວບັນດາເຜົ່າ ຫວຽດນາມ, ທ່ານປະທານປະເທດ ເນັ້ນໜັກວ່າ “ຊາຍຄາລວມ” ນີ້ ແມ່ນບ່ອນເຕົ້າໂຮມ, ແຜ່ກະຈາຍມູນເຊື້ອວັດທະນະທຳບັນດາເຜົ່າ ຫວຽດນາມ:

        “ຂ້າພະເຈົ້າດີໃຈຫຼາຍທີ່ຮັບຮູ້ວ່າ ຈຸດຄວາມງານທີ່ເປັນເອກະລັກສະເພາະຂອງ 54 ຊົນເຜົ່າ ບໍ່ພຽງແຕ່ໄດ້ສະແດງຢູ່ທີ່ນີ້, ຫາກແມ່ນວິຖີຊີວິດປະຈຳວັນຂອງແຕ່ລະຊົນເຜົ່າຂອງ ຫວຽດນາມ. ສິ່ງດັ່ງກ່າວ ໄດ້ເຮັດໃຫ້ຄວາມງານວັດທະນະທຳໄດ້ແຜ່ກະຈາຍໃນຊີວິດ ຫາກບໍ່ແມ່ນນອນຢູ່ໃນຫໍພິພິທະພັນເທົ່ານັ້ນ. ບັນດາຈຸດຄວາມງານທີ່ເຂັ້ມຂົ້ນໄປດ້ວຍສີສັນນັ້ນ ໄດ້ ແລະ ກຳລັງປະສົມກົມກ່ຽວເຂົ້າກັນ ເປັນຄວາມງາມອັນຍິ່ງໃຫຍ່ຂອງວັດທະນະທຳ ຫວຽດນາມ”.

ນະທີ່ນີ້, ທ່ານປະທານປະເທດ ຫງວຽນຊວັນຟຸກ ກໍໄດ້ລັ່ນຄ້ອງ ບົ່ງບອກງານບຸນສີສັນລະດູບານໃໝ່ ແລະ ມອບຂອງຂວັນໃຫ້ 22 ຄົນ ເຊິ່ງເປັນຜູ້ຕາງໜ້າບັນດາເຜົ່າສ່ວນໜ້ອຍ ທີ່ມີໜ້າຢູ່ໝູ່ບ້ານວັດທະນະທຳ - ການທ່ອງທ່ຽວບັນດາເຜົ່າ ຫວຽດນາມ.