(vovworld) - ຕອນເຊົ້າວັນທີ 7/8, ຢູ່ນະຄອນ ດ່າລາດ, ແຂວງ ເລີມດົ່ງ, ໄດ້ດຳເນີນລາຍການ “ພົບປະນັກທຸລະກິດ ຫວຽດນາມ ຢູ່ຕ່າງປະເທດ ແລະ ຢູ່ພາຍໃນປະເທດ ຄັ້ງທີ 2” ດ້ວຍການເຂົ້າຮ່ວມຂອງນັກທຸລະກິດ ຫວຽດນາມ ທັງຢູ່ພາຍໃນ ແລະ ຕ່າງປະເທດເກືອບ 500 ທ່ານ. ລາຍການພົບປະນັກທຸລະກິດຄັ້ງນີ້ເພື່ອແນໃສ່ສືບຕໍ່ເພີ່ມທະວີຂົນຂວາຍ ແລະ ເຊື່ອມຕໍ່ນັກທຸລະກິດເຊິ່ງແມ່ນຊາວ ຫວຽດນາມ ອາໄສຢູ່ຕ່າງປະເທດ ກັບນັກທຸລະກິດພາຍໃນປະເທດ, ເປີດກ້ວາງກາລະໂອກາດຊອກຫາຄູ່ຮ່ວມມື, ຮ່ວມສຳພັນ, ຮ່ວມດຳເນີນທຸລະກິດໃນການລົງທຶນ, ຜະລິດດຳເນີນທຸລະກິດເພື່ອຊອກຫາກາລະໂອກາດທຳມາຫາກິນຢູ່ພາຍໃນ ແລະ ຕ່າງປະເທດໃຫ້ດີທີ່ສຸດ. ຈາກບັນດາຄຳເຫັນໃນການພົບປະ, ຈະສະເໜີຕໍ່ລັດຖະບານປະກາດໃຊ້, ປັບປຸງ, ເພີ່ມເຕີມບັນດານະໂຍບາຍທີ່ເໝາະສົມເພື່ອແນໃສ່ດຶງດູດການເຄື່ອນໄຫວລົງທຶນຂອງຊາວ ຫວຽດນາມ ອາໄສຢູ່ຕ່າງປະເທດ, ເປີດກ້ວາງຕະຫຼາດ ແລະ ສົ່ງອອກສິນຄ້າ. ກ່າວຄຳເຫັນນະທີ່ນີ້, ທ່ານຮອງນາຍົກລັດຖະມົນຕີ ຮ່ວາງຈູງຫາຍ ຢືນຢັນວ່າ: ປະຊາຄົມຊາວ ຫວຽດນາມ ອາໄສຢູ່ຕ່າງປະເທດ ແມ່ນພາກສ່ວນໜຶ່ງທີ່ບໍ່ສາມາດຕັກແຍກອອກຈາກປະເທດ ຫວຽດນາມ ໄດ້, ແລະ ແມ່ນຂົວຕໍ່ສຳຄັນໃນການພົວພັນສາກົນຂອງ ຫວຽດນາມ ກັບປະເທດຕ່າງໆ. ໃນນັ້ນ, ຖັນແຖວນັກທຸລະກິດ ຫວຽດນາມ ຢູ່ຕ່າງປະເທດ ສວມບົດບາດສຳຄັນທີ່ສຸດ.