ພາບປະກອບ: TTXVN

ບັນດາທ້ອງຖິ່ນໄດ້ເພີ່ມທະວີກຳລັງປະຈຳການ, ແບ່ງປັນຂໍ້ມູນຂ່າວສານກ່ຽວກັບວຽກງານຊີ້ນຳບໍລິຫານການຮັບມື ແລະ ແກ້ໄຂຜົນຮ້າຍຢ້ອນຫຼັງຢ່າງທັນການ; ຊີ້ນຳການຮັບມືກັບຝົກຕົກ, ນ້ຳຖ້ວມຢູ່ເຂດຕ່ຳ ແລະ ເຂດໄຕງວຽນ.

        ຕອນຄ່ຳວັນທີ 28 ຕຸລາ, ຢູ່ແຂວງກ໋ວາງນາມ, ທ່ານຮອງນາຍົກລັດຖະມົນຕີ ຜູ້ປະຈຳການລັດຖະບານ ຈິ້ງດິ່ງຢຸງ, ທ່ານ ຫງວຽນຊວັນເກືອງ ລັດຖະມົນຕີກະຊວງກະສິກຳ ແລະ ພັດທະນາຊົນນະບົດ ຫວຽດນາມ ພ້ອມກັບການນຳແຂວງໄດ້ຈັດຕັ້ງກອງປະຊຸມດ່ວນກ່ຽວກັບເຫດດິນເຊາະເຈື່ອນຢ່າງຮ້າຍແຮງຢູ່ແຂວງກ໋ວາງນາມ ເຊິ່ງເຮັດໃຫ້ມີ 55 ຄົນຫາຍສາບສູນ.ທີ່ກອງປະຊຸມ, ທ່ານຮອງນາຍົກລັດຖະມົນຕີ ຈິ້ງດິ່ງຢຸງ ໃຫ້ຮູ້ວ່າ:

ກ່ອນອື່ນໝົດແມ່ນຕ້ອງຢັ້ງຢືນບ່ອນປະຊາຊົນຖືກເຄາະຮ້າຍໂດຍໄວ, ຊອກຫາທາງສາດວກເພື່ອສຸມກຳລັງໃຫ້ແກ່ການກູ້ໄພກູ້ຊີບ. ໃນການຊອກຫາ, ກູ້ໄພກູ້ຊີບນັ້ນ ຕ້ອງເອົາໃຈໃສ່ຮັບປະກັນຄວາມປອດໄພໃຫ້ແກ່ກຳລັງຊອກຫາ.

ທ່ານນາຍົກລັດຖະມົນຕີກໍ່ໄດ້ສົ່ງໂທລະເລກທາງການໄປຍັງຄະນະກຳມະການແຫ່ງຊາດກ່ຽວກັບການຮັບມືກັບໄພທຳມະຊາດ ແລະ ຄົ້ນຫາ,ກູ້ໄພກູ້ຊີບ, ກະຊວງປ້ອງກັນປະເທດ, ກອງບັນຊາການທະຫານເຂດ 5, ຄະນະກຳມະການປະຊາຊົນແຂວງ ກ໋ວາງນາມ ກ່ຽວກັບການກູ້ໄພກູ້ຊີບ ຜູ້ປະສົບເຄາະຮ້າຍທີ່ຖືກດິນຕົມທັບຖົມຢູ່ຕາແສງ ຈ່າແລງ, ເມືອງ ນາມຈ່າມີ, ແຂວງກ໋ວາງນາມ. ທ່ານນາຍົກລັດຖະມົນຕີ ໄດ້ຮຽກຮ້ອງໃຫ້ບັນດາກົມກອງສົມທົບກັບບັນດາກຳລັງທີ່ກ່ຽວຂ້ອງ ດ້ວຍທຸກມາດຕະການທີ່ຈຳເປັນເພື່ອຮີບດ່ວນຄົ້ນຫາຜູ້ທີ່ຖືກດິນຕົມທັບຖົມ.