(ທ່ານເອກອັກຄະລັດຖະທູດຫວຽດນາມ ປະຈຳອີຢິບ ເຈິ່ນແທ່ງກົງ ໄດ້ໄປຢື້ຢາມຖາມຂ່າວ, ລະດົມກຳລັງໃຈ ແລະ ກຳແໜ້ນສະພາບການຍັງສະຖານທີ່ເກີດເຫດ ແລະ ໄປໂຮງໝໍ Al Haram)

ເຫດລະເບີດແຕກໄດ້ເກີດຂຶ້ນຢູ່ຖະໜົນ El Maryoutiya ຂຶ້ນກັບເມືອງ Haram, ແຂວງ Giza, ປະເທດອີຢິບ ເມື່ອລົດຂົນສົ່ງນັກທ່ອງທ່ຽວທີ່ພານັກທ່ອງທ່ຽວຫວຽດນາມ 15 ຄົນ ຂອງບໍລິສັດ Saigontourist ພວມເດີນທາງໄປຫາສະໜາມບິນເພື່ອກັບເມືອປະເທດ. ກຳລັງປ້ອງກັນຄວາມສະຫງົບອີຢິບ ໄດ້ໄປຍັງເຂດເກີດເຫດລະເບີດ ເພື່ອສືບສວນເຫດການ. ປະຈຸບັນ, ຍັງບໍ່ທັນມີກຸ່ມໃດກ່າວຮັບຜິດຊອບການວາງລະເບີດໃນຄັ້ງນີ້ເທື່ອ.

        ພາຍຫຼັງເກີດເຫດການ, ທ່ານເອກອັກຄະລັດຖະທູດຫວຽດນາມ ປະຈຳອີຢິບ ເຈິ່ນແທ່ງກົງ ໄດ້ໄປຍັງສະຖານທີ່ເກີດເຫດ ແລະ ໄປໂຮງໝໍ Al Haram ເຊິ່ງແມ່ນໂຮງໝໍປິ່ນປົວບັນດາຜູ້ຖືກເຄາະຮ້າຍເພື່ອຢື້ຢາມຖາມຂ່າວ, ລະດົມກຳລັງໃຈ ແລະ ກຳແໜ້ນສະພາບການ. ທ່ານເອກອັກຄະລັດຖະທູດ ເຈິ່ນແທ່ງກົງ ຢືນຢັນວ່າ, ສະຖານທູດຫວຽດນາມ ປະຈຳອີຢິບ ຈະເຮັດຈົນສຸດຄວາມສາມາດຂອງຕົນເພື່ອປົກປ້ອງພົນລະເມືອງ, ໜູນຊ່ວຍຜູ້ຮັບບາດເຈັບເພື່ອຟື້ນຟູອາການ ແລະ ກັບເມືອປະເທດໂດຍໄວ.

        ໃນກໍລະນີຕ້ອງການການໜູນຊ່ວຍ, ພົນລະເມືອງຫວຽດນາມ ສາມາດຕິດຕໍ່ໂທລະສັບສາຍດ່ວນຂອງສະຖານທູດຫວຽດນາມ ປະຈຳອີຢິບ ຕາມເບີໂທ: (+20) 1060396518 ຫຼື ເບີໂທລະສັບສູນປົກປ້ອງພົນລະເມືອງແມ່ນ (+84) 981848484 ຫຼື ໂທລະສັບສາຍດ່ວນຂອງສະຖານກົງສູນ ຕາມເບີໂທ (+84) 965411118.

        ແລະກໍ່ໃນວັນດຽວກັນ, ທ່ານນາຍົກລັດຖະມົນຕີອີຢິບ ກໍ່ໄດ້ໄປໂຮງໝໍເພື່ອຢື້ຢາມຖາມຂ່າວບັນດານັກທ່ອງທ່ຽວຫວຽດນາມ ຖືກຮັບບາດເຈັບ. ທ່ານໃຫ້ຮູ້ວ່າ, ທ່ານລັດຖະມົນຕີກະຊວງທ່ອງທ່ຽວອີຢິບ ຈະພົບປະກັບທ່ານເອກອັກຄະລັດຖະທູດຫວຽດນາມ ປະຈຳອີຢິບ ໂດຍໄວ. ທ່ານເນັ້ນໜັກວ່າ, ສິ່ງສຳຄັນທີ່ສຸດທີ່ຄວນເຮັດໃນປະຈຸບັນແມ່ນໜູນຊ່ວຍດ້ານສາທາລະນະສຸກໃຫ້ບັນດານັກທ່ອງທ່ຽວ.