(ກອງປະຊຸມນາຍົກລັດຖະມົນຕີ ພົບປະກັບບັນດານັກລົງທຶນຕ່າງປະເທດ)

ວັນທີ 22 ເມສາ, ກະຊວງແຜນການ ແລະ ການລົງທຶນ ຫວຽດນາມ ໃຫ້ຮູ້ວ່າ, ທີ່ກອງປະຊຸມນາຍົກລັດຖະມົນຕີ ພົບປະກັບບັນດານັກລົງທຶນຕ່າງປະເທດ, ມີ 3 ກຸ່ມບໍລິສັດຕ່າງປະເທດທີ່ມາຈາກ ສ.ເກົາຫຼີ, ເຢຍລະມັນ, ຍີ່ປຸ່ນ ໄດ້ແລກປ່ຽນແຜນການລົງທຶນໃໝ່ ແລະ ເປີດກວ້າງການລົງທຶນຢູ່ ຫວຽດນາມ ໃນປີ 2023, ດ້ວຍຍອດຈຳນວນເງິນລົງທຶນ 3,7 ຕື້ USD.

ທີ່ກອງປະຊຸມ, ບັນດາສະຫະສະມາຄົມວິສາຫະກິດຕ່າງປະເທດ ໄດ້ຍົກອອກຂໍ້ສັງເກດກ່ຽວກັບທ່າອ່ຽງຂອງແຫຼ່ງທຶນໃນໂລກ ແລະ ຕີລາຄາສະພາບການດຳເນີນທຸລະກິດຢູ່ ຫວຽດນາມ. ຕາມນັ້ນແລ້ວ, ທ່ານປະທານສະຫະສະມາຄົມວິສາຫະກິດ ເອີລົບ ປະຈຳ ຫວຽດນາມ (Euro Cham) Gabor Fluit ໃຫ້ຂໍ້ສັງເກດວ່າ ເຖິງວ່າ ຕ້ອງປະສົບກັບຮົ້ວກີດຂວາງຈຳນວນໜຶ່ງ, ແຕ່ ຫວຽດນາມ ຍັງແມ່ນດວງດາວພວມກ້າວຂຶ້ນໃນຂົງເຂດດຳເນີນທຸລະກິດ, ການລົງທຶນ.

ໃນຂະນະນັ້ນ, ທ່ານ Takeo Nakajima, ຫົວໜ້າຜູ້ຕາງໜ້າອົງການສົ່ງເສີມ ແລະ ການຄ້າ ຍິ່ປຸ່ນ (JETRO) ຮ່າໂນ້ຍ, ໃຫ້ຮູ້ວ່າ ບັນດາວິສາຫະກິດ ຍີ່ປຸ່ນ ພ້ອມແລ້ວຈະລົງທຶນຢູ່ ຫວຽດນາມ. ຕາມການສຳຫຼວດຂອງ JETRO ແລ້ວ, ມີ 47% ວິສາຫະກິດທີ່ໄດ້ຖາມຈະເປີດກວ້າງການດຳເນີນທຸລະກິດໃນຮອບເວລາ 1-2 ປີ ຈະມາເຖິງ. ທ່ານກໍ່ໃຫ້ຮູ້ວ່າ, ບັນດາວິສາຫະກິດ ຍີ່ປຸ່ນ ເຫັນໄດ້ກາລະໂອກາດລົງທຶນເຂົ້າ ຫວຽດນາມ.

ສ່ວນທ່ານ Hong Sun, ປະທານສະຫະສະມາຄົມວິສາຫະກິດ ສ.ເກົາຫຼີ ປະຈຳ ຫວຽດນາມ (Kocham), ໃຫ້ຮູ້ວ່າ ໃນໄລຍະຈະມາເຖິງ, ຈະມີວິສາຫະກິດໃຫຍ່ຫຼາຍແຫ່ງຂອງ ສ.ເກົາຫຼີ ລົງທຶນເຂົ້າ ຫວຽດນາມ, ຄື: Samsung, ເອເລັກໂຕນິກ LG, LG Display… ພວມເບີດກວ້າງການລົງທຶນຢູ່ ຫວຽດນາມ ເພື່ອພັດທະນາເປັນສູນຜະລິດທົ່ວໂລກກ່ຽວກັບໄຟຟ້າລົດໂອໂຕ, ເຄື່ອງເອເລັກໂຕນິກ ແລະ ເຄື່ອງໃຊ້ສອຍ.

ເພື່ອຕ້ອນຮັບກະແສລົງທຶນ, ທ່ານລັດຖະມົນຕີກະຊວງແຜນການ ແລະ ການລົງທຶນ ຫວຽດນາມ ຫງວຽນຈີຢຸງ ໃຫ້ຮູ້ວ່າ, ຫວຽດນາມ ຈະສືບຕໍ່ແກ້ໄຂຄວາມຫຍຸ້ງຍາກໃນການລະດົມແຫຼ່ງກຳລັງ, ຜະລິດດຳເນີນທຸລະກິດ; ຊຸກຍູ້ການປ່ອຍເງິນໃຫ້ທຸກແຫຼ່ງທຶນລົງທຶນ; ສ້າງ ແລະ ປັບປຸງຄວາມໄວ້ເນື້ອເຊື່ອໃຈຂອງບັນດານັກລົງທຶນ.