ທ່ານ ເຈິ່ນດຶກເຟີ້ນ, ຮອງຫົວໜ້າກົມໃຫຍ່ຮັບຜິດຊອບ: ກົມໃຫຍ່ກິລາກາຍຍະກຳ, ຮອງຫົວໜ້າຄະນະຈັດຕັ້ງ Sea Games 31 ແລະ ທ່ານ ເຈິ່ນວັນແມັງ, ເລຂາທິການໃຫຍ່ ຄະນະກຳມະການ ໂອລິມປິກ ຫວຽດນາມ  (ພາບ: thethaovietnamplus.vn)

ວັນທີ 17 ກັນຍາ, ຫ້ອງການສະຫະພັນກິລາ ອາຊີຕາເວັນອອກສ່ຽງໃຕ້ (SEAGF) (ບາງກອກ, ປະເທດໄທ) ໄດ້ຈັດຕັ້ງກອງປະຊຸມຕາມຮູບແບບທາງໄກ. ເຂົ້າຮ່ວມຢູ່ສະຖານທີ່ເຊື່ອມຕໍ່ ທີ່ຫວຽດນາມ ແມ່ນທ່ານ ເຈິ່ນດຶກເຟີ້ນ, ຮອງຫົວໜ້າກົມໃຫຍ່ຮັບຜິດຊອບ: ກົມໃຫຍ່ກິລາກາຍຍະກຳ, ຮອງຫົວໜ້າຄະນະຈັດຕັ້ງ Sea Games 31 ແລະ ທ່ານ ເຈິ່ນວັນແມັງ, ເລຂາທິການໃຫຍ່ ຄະນະກຳມະການ ໂອລິມປິກ ຫວຽດນາມ.

ທີ່ກອງປະຊຸມ, ທ່ານ ເຈິ່ນດຶກເຟີ້ນ ຜູ້ຕາງໜ້າຄະນະຈັດຕັ້ງ SEA Games 31 ໃຫ້ຮູ້ວ່າ ລັດຖະບານ ຫວຽດນາມ ໄດ້ຕົກລົງດ້ວຍຂໍ້ສະເໜີຂອງ ກະຊວງວັດທະນະທຳ, ກິລາ ແລະ ການທ່ອງທ່ຽວ, ຄະນະຈັດຕັ້ງ SEA Games 31 ກ່ຽວກັບການອະນຸຍາດເລື່ອນເວລາຈັດຕັ້ງ ຮອດໄຕມາດທີ II/2022. ຫວຽດນາມ ພວມລໍຖ້າການເຮັດລະບຽບການ ແລະ ຈະແຈ້ງໃຫ້ບັນດາປະເທດໂດຍໄວ.

ຜູ້ຕາງໜ້າຄະນະກຳມະການ ໂອລິມປິກ ກຳປູເຈຍ ປະກາດກ່ຽວກັບວຽກງານກະກຽມໃຫ້ແກ່ SEA Games 32 ໃນປີ 2023 ວ່າ ກຳປູເຈຍ ພວມຜັນຂະຫຍາຍການສ້າງ ໝູ່ບ້ານນັກກິລາ, ບັນດາວຽກງານພະລາທິການ ແລະ ການແພດ  ເພື່ອຈັດຕັ້ງງານມະຫາກຳກິລາທີ່ມີຄວາມປອດໄພ. ນີ້ແມ່ນຄັ້ງທຳອິດ ກຳປູເຈຍ ເປັນເຈົ້າພາບຈັດຕັ້ງ SEA Games.

ກອງປະຊຸມໄດ້ອອກຖະແຫຼງການຮ່ວມ, ໃນນັ້ນເນັ້ນໜັ້ກເຖິງການຍົກລະດັບການແຂ່ງຂັນຂອງ ບັນດານັກກິລາຢູ່ບັນດາການແຂ່ງຂັນຢູ່ພາກພື້ນ ແລະ ສາກົນ, ພ້ອມທັງຍູ້ແຮງຜົນງານທີ່ບັນລຸໄດ້ໃນການແຂ່ງຂັນກິລາ ຢູ່ພາກພື້ນ ອາຊຽນ.