(vovworld) - ຕອນບ່າຍວັນທີ 27/8, ຢູ່ຮ່າໂນ້ຍ, ໜັງສືພິມກົດໝາຍຫວຽດນາມ, ກະຊວງຍຸດຕິທຳ, ໄດ້ຈັດຕັ້ງການມອບນາມມະຍົດໃຫ້ “ບໍລິສັດກົດໝາຍ ແລະ ທະນາຍຄວາມດີເດັ່ນ 2012”. ເຂົ້າຮ່ວມມີທ່ານຮອງນາຍົກລັດຖະມົນຕີ Nguyen Xuan Phuc. ນີ້ແມ່ນເທື່ອທີ 2 ທີ່ຫວຽດນາມຈັດຕັ້ງການເລືອກຕັ້ງ ແລະ ເຊີດຊູບັນດາອົງການດຳເນີນອາຊີບທະນາຍຄວາມ, ທະນາຍຄວາມເຄື່ອນໄຫວຢ່າງມີປະສິດທິຜົນ, ເພື່ອແນໃສ່ຍົກສູງບົດບາດ, ໜ້າທີ່ຮັບຜິດຊອບຂອງທະນາຍຄວາມຫວຽດນາມ ໃນການປະຕິຮູບດ້ານຕູລາການ, ສ້າງລັດແຫ່ງນິຕິບັນຍັດ, ພັດທະນາເສດຖະກິດ ແລະ ເຊື່ອມໂຍງເຂົ້າກັບສາກົນ. ກ່າວຄຳເຫັນທີ່ພິທີ, ທ່ານຮອງນາຍົກລັດຖະມົນຕີ Nguyen Xuan Phuc ໄດ້ເນັ້ນໜັກວ່າ ທະນາຍຄວາມມີບົດບາດສຳຄັນໃນວຽກງານໂຄສະນາ, ເປັນທີ່ປຶກສາດ້ານກົດໝາຍໃຫ້ແກ່ປະຊາຊົນ ເພື່ອໃຫ້ປະຊາຊົນແຕ່ລະຄົນຮັບຮູ້ ແລະ ປະຕິບັດຖືກຕ້ອງຕາມບັນດາຂໍ້ກຳນົດຂອງກົດໝາຍ. ທະນາຍຄວາມ ກໍແມ່ນພາກສ່ວນທີ່ສຳຄັນໃນວຽກງານປະຕິຮູບດ້ານຕຸລາການ, ຍົກສູງຄຸນນະພາບໃນການສືບສວນ, ສັງຟ້ອງ, ພິພາກສາຂອງບັນດາອົງການຍຸດຕິທຳ, ປົກປ້ອງຄວາມຍຸດຕິທຳ ແລະ ສິດຜົນປະໂຫຍດທີ່ຖືກຕ້ອງຕາມກົດໝາຍຂອງປະຊາຊົນ. ທ່ານຮອງນາຍົກລັດຖະມົນຕີ ກໍຊົມເຊີຍກະຊວງຍຸດຕິທຳ, ໜັງສືພິມກົດໝາຍຫວຽດນາມ ໄດ້ຈັດການເລືອກຕັ້ງນາມມະຍົດບໍລິສັດກົດໝາຍ ແລະ ທະນາຍຄວາມດີເດັ່ນ, ເຊິ່ງແມ່ນໜຶ່ງໃນບັນດາການເຄື່ອນໄຫວທີ່ຕັ້ງໜ້າ ເພື່ອປະຕິບັດຍຸດທະສາດພັດທະນາອາຊີບທະນາຍຄວາມຮອດປີ 2020.