( vovworld ) – ໂດຍພາຍໃຕ້ການເປັນປະທານຂອງທ່ານນາງຮອງປະທານສະພາແຫ່ງຊາດ ຫວຽດນາມ Tong Thi Phong, ຕອນເຊົ້າວັນທີ 25/5, ສະພາແຫ່ງຊາດປຶກສາຫາລືຢູ່ຫໍປະຊຸມ ກ່ຽວກັບຮ່າງກົດໝາຍວ່າດ້ວຍການສຶກສາຂັ້ນ ມະຫາວິທະຍາໄລ. ຮ່າງກົດໝາຍສະບັບດັ່ງກ່າວໄດ້ຮັບການຮຽບຮຽງຢ່າງລະອຽດ, ເອົາຄຳເຫັນຈາກບັນດາຜູ້ຊ່ຽວຊານ, ນັກວິທະຍາສາດ, ຄູອາຈານ ແລະ ພະນັກງານຄຸ້ມຄອງຜ່ານຊ່ອງຕ່າງໆ ຍື່ນສະເໜີຕໍ່ສະພາແຫ່ງຊາດ ຜ່ານກອງປະຊຸມສະໄໝສາມັນເທື່ອທີ 3 ສະພາແຫ່ງຊາດຫວຽດນາມ ຊຸດທີ 13 ເພື່ອແນໃສ່ປ່ຽນແປງໃໝ່ຂະແໜງການສຶກສາ ຫວຽດນາມ ໂດຍພື້ນຖານ ແລະ ຮອບດ້ານ ເມື່ອຕອບສະໜອງຄຳຮຽກຮ້ອງຕ້ອງການໃນໄລຍະປ່ຽນແປງໃໝ່.
ບັນຫາສິດເປັນເຈົ້າ ແລະ ຮັບຜິດຊອບທາງສັງຄົມຂອງຮາກຖານການສຶກສາຂັ້ນມະຫາວິທະຍາໄລຖືກຖືວ່າ ແມ່ນ 1 ໃນບັນດາສິ່ງສຳຄັນຕົ້ນຕໍຂອງຮ່າງກົດໝາຍວ່າດ້ວຍການສຶກສາຂັ້ນ ມະຫາວິທະຍາໄລ ແລະ ຖືກຖືວ່າ ແມ່ນທ່າອຽງອັນແນ່ນອນຂອງໂລກປະຈຸບັນ. ທ່ານນາງ Dam Thi My Huong ສະມາຊິກສະພາແຊ່ງຊາດແຂວງ Ninh Thuan ມີຄຳເຫັນວ່າ:
“ຂ້າພະເຈົ້າເຫັນດີກັບຂໍ້ໃຫ້ສັງເກດຂອງຄະນະປະຈຳສະພາແຫ່ງຊາດຄື: ສະພາໂຮງຮຽນແມ່ນອົງການທີ່ຂາດບໍ່ໄດ້ ສຳລັບບັນດາຮາກຖານການສຶກສາຂັ້ນມະຫາ ວິທະຍາໄລ. ເລື່ອງສ້າງຕັ້ງສະພາໂຮງຮຽນ ແມ່ນເພື່ອມອບສິດເປັນເຈົ້າການບໍລິການໃຫ້ແກ່ບັນດາຮາກຖານການສຶກສາຂັ້ນມະຫາວິທະຍາໄລ, ປະກອບສ່ວນເຮັດໃຫ້ລະບົບ ການສຶກສາຂັ້ນມະຫາວິທະຍາໄລເຄື່ອນໄຫວຢ່າງມີລັກສະນະເປັນເຈົ້າການສູງ ແລະ ມີຄວາມຮັບຜິດຊອບຕໍ່ສັງຄົມ. ຂ້າພະເຈົ້າສະເໜີໃຫ້ກະຊວງສຶກສາ ແລະ ບຳລຸງສ້າງ ມີການກຳນົດແນະນຳການຈັດຕັ້ງປະຕິບັດຢ່າງລະອຽດ“
ກ່ຽວກັບຮູບແບບໂຄງປະກອບການຈັດຕັ້ງ ແລະ ແບ່ງຂັ້ນຮາກຖານການສຶກສາຂັ້ນມະຫາວິທະຍາໄລ, ຄຳເຫັນສ່ວນຫຼາຍຂອງບັນດາສະມາຊິກສະພາແຫ່ງຊາດ ສະເໜີໃຫ້ເພີ່ມການກຳນົດຢ່າງລະອຽດກ່ຽວກັບຄາດໝາຍ, ມາດຖານແບ່ງຂັ້ນຮາກຖານການສຶກສາຂັ້ນມະຫາວິທະຍາໄລ. ຄຳເຫັນສ່ວນຫຼາຍກໍຖືວ່າ: ເລື່ອງຈຳແນກ ບັນດາມະຫາວິທະຍາໄລເຂດ ກັບມະຫາວິທະຍາໄລແຫ່ງຊາດແມ່ນຈຳເປັນ ເພື່ອມີນະໂຍບາຍການລົງທຶນ ແລະ ກົນໄກຄຸ້ມຄອງໃຫ້ເໝາະສົມ.
ໃນຈຳນວນ 5 ບັນຫາຂອງຮ່າງກົດໝາຍວ່າດ້ວຍກຳມະບານສະບັບປັບປຸງ, ບັນດາສະມາຊິກສະພາແຫ່ງຊາດສຸມໃສ່ປຶກສາຫາລື 3 ບັນຫາຄື: ທີ່ຕັ້ງດ້ານກົດໝາຍຂອງອົງການກຳມະບານ; ລະບົບການຈັດຕັ້ງ ແລະ ຊື່ເອີ້ນກຳມະບານຂັ້ນຕ່າງໆ; ການເງິນກຳມະບານ. ບັນດາຄຳເຫັນລ້ວນແຕ່ຢືນຢັນວ່າ ກຳມະບານ ຫວຽດນາມ ແມ່ນສະມາຊິກສຳຄັນຂອງລະບົບການເມືອງສັງຄົມ, ຕັ້ງໜ້າເຂົ້າຮ່ວມການແກ້ໄຂບັນດາບັນຫາທີແທດຈິງໃຫ້ແກ່ຊາວຜູ້ອອກແຮງງານ. ກຳມະບານ ຫວຽດນາມ ບໍ່ພຽງແຕ່ເປັນຜູ້ຕາງໜ້າໃຫ້ແກ່ຊົນຊັ້ນກຳມະກອນ ແລະ ຊາວຜູ້ອອກແຮງງານ ຫວຽດນາມ ເທົ່ານັ້ນ ຫາກຍັງແມ່ນຂົວເຊື່ອມຕໍ່ລະຫວ່າງມະຫາຊົນກັບພັກອີກດ້ວຍ. ທ່ານ Pham Phi Hung ສະມາຊິກສະພາແຫ່ງຊາດນະຄອນ ຮ່າໂນ້ຍ ປະກອບຄຳເຫັນວ່າ:
“ຕາມຂ້າພະເຈົ້າແລ້ວ, ຊື່ເອີ້ນຂອງອົງການກຳມະບານຄວນຮັກສາໄວ້ເໝືອນເດີມຄື: ນັບແຕ່ກ່ອນມາຮອດປະຈຸບັນ ພວກເຮົາຍັງແບ່ງເປັນ 4 ຂັ້ນ: ກຳມະບານຮາກຖານ, ກຳມະບານຂັ້ນເທິງ, ກຳມະບານຂັ້ນແຂວງ, ນະຄອນ ແລະ ສະຫະພັນໃຫ່ຍແຮງງານຫວຽດນາມ. ຂ້າພະເຈົ້າຖືກວ່າ: ຮູບແບບກຳມະບານອື່ນ ຄວນມອບໃຫ້ສະຫະພັນໃຫ່ຍແຮງງານຫວຽດນາມ“.