ຢືດໝັ້ນການພັດທະນາສາຍພົວພັນຫວຽດນາມ-ຈີນຕາມທິດມິດຕະພາບແລະຮ່ວມມື
ທ່ານເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປ ຈີນ ປະຈຳ ຫວຽດນາມ ໂຄງແຊ໋ວຢູງ
(vovworld) – ຢືດໝັ້ນການພັດທະນາສາຍພົວພັນ ຫວຽດນາມ - ຈີນ ຕາມທິດມິດຕະພາບ ແລະ ຮ່ວມມື - ນີ້ແມ່ນຄຳຢັ້ງຢືນທ່ານເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປ ຈີນ ປະຈຳ ຫວຽດນາມ ໂຄງແຊ໋ວຢູງ ໃນບົດຕອບສຳພາດທີ່ລົງພິມໃນໜັງສືພິມ ກວນໂດ້ຍເຍີນເຢີນ (ສຽງຂອງກອງທັບປະຊາຊົນ ຫວຽດນາມ) ສະບັບອອກວັນທີ 20/1. ທ່ານ ເອກອັກຄະລັດຖະທູດ ໂຄງແຊ໋ວຢູງ ຊີ້ແຈ້ງວ່າ: ໄລຍະທາງແຫ່ງການພັດທະນາ 65 ປີຜ່ານມາ ໄດ້ພິສູດໃຫ້ເຫັນວ່າ: ການພົວພັນມີດຕະພາບທີ່ເປັນມູນເຊື້ອ ຈີນ - ຫວຽດນາມ ແມ່ນຊັບສົມບັດອັນລ້ຳຄ່າລວມຂອງທັງ 2 ປະເທດ. ເລື່ອງປັບປຸງ ແລະ ພັດທະນາການພົວພັນ ຈີນ - ຫວຽດນາມ ຢ່າງບໍ່ຢຸດຢັ້ງແມ່ນຄວາມມຸ່ງມາດປາດຖະໜາລວມຂອງປະຊາຊົນ 2 ປະເທດ, ສົມກັບຜົນປະໂຫຍດຂອງ 2 ຊາດ ແລະ ປະຊາຊົນ 2 ປະເທດ.
ທ່ານ ເອກອັກຄະລັດຖະທູດ ໂຄງແຊ໋ວຢູງ ໃຫ້ຮູ້ວ່າ: 2 ປະເທດ ໄດ້ ແລະ ຈະຈັດຕັ້ງການເຄື່ອນໄຫວຫຼາຍຢ່າງເພື່ອສະເຫຼີມສະຫຼອງ 65 ປີແຫ່ງວັນສ້າງຕັ້ງການພົວພັນທາງການທູດ. ການນຳ 2 ພັກ, 2 ລັດ ໄດ້ຝາກໂທລະເລກອວຍພອນໃຫ້ກັນ. ສະຖານທູດ ຈີນປະຈຳ ຫວຽດນາມ, ສະຖານທູດ ຫວຽດນາມ ປະຈຳ ຈີນ ແລະ ສະຫະພັນບັນດາອົງການມິດຕະພາບ ຫວຽດນາມ, ສະມາຄົມມິດຕະພາບພົວພັນຕ່າງປະເທດປະຊາຊົນ ຈີນ ໄດ້ຈັດຕັ້ງງານລ້ຽງຢ່າງສົມກຽດ ແລະ ການເຄື່ອນໄຫວມິດຕະພາບເພື່ອສະເຫຼີມສະຫຼອງ 65 ປີແຫ່ງວັນສ້າງຕັ້ງການພົວພັນທາງການທູດດ້ວຍການເຂົ້າຮ່ວມຂອງການນຳ 2 ປະເທດ. ສະຖານທູດ ຈີນ ປະຈຳ ຫວຽດນາມ ພ້ອມກັບກະຊວງວັດທະນະທຳ, ກິລາ ແລະ ທ່ອງທ່ຽວ ຫວຽດນາມ ຈັດຕັ້ງງານວາງສະແດງຮູບພາບດ້ວຍຫົວຂໍ້ສະເຫຼີມສະຫຼອງ 65 ປີແຫ່ງວັນສ້າງຕັ້ງການພົວພັນທາງການທູດລະຫວ່າງ 2 ປະເທດ.
ທ່ານ ເອກອັກຄະລັດຖະທູດ ໂຄງແຊ໋ວຢູງ ກໍ່ໃຫ້ຮູ້ວ່າ: ຕໍ່ໜ້າສະພາບການສາກົນມີການຜັນແປຢ່າງສັບສົນດ້ວຍບັນດາກາລະໂອກາດ, ສິ່ງທ້າທາຍໃໝ່, 2 ປະເທດ ຫວຽດນາມ ແລະ ຈີນ ຄວນເພີ່ມທະວີຄວາມສາມັກຄີ, ຮ່ວມມື ແລະ ປະຕິບັດການພັດທະນາລວມ. ທີໜຶ່ງ, 2 ປະເທດຄວນເດັດດຽວກ້າວຂຶ້ນຕາມທິດ ມິດຕະພາບ ແລະ ຮ່ວມມື, ເພີ່ມທະວີການແລກປ່ຽນຍຸດທະສາດລະຫວ່າງການນຳ 2 ພັກ, 2 ລັດ ແລະ ກອງທັບ 2 ປະເທດ, ແລກປ່ຽນບົດຮຽນກ່ຽວກັບການຄຸ້ມຄອງພັກ ແລະ ລັດຢ່າງເລິກເຊິ່ງ, ປັບປຸງພື້ນຖານດ້ານການເມືອງຂອງການພົວພັນ 2 ປະເທດຢ່າງບໍ່ຢຸດຢັ້ງ. ທີສອງ, 2 ປະເທດຄວນເຮັດໃຫ້ການຮ່ວມມືແທດຈິງ ແລະ ຕ່າງຝ່າຍຕ່າງມີຜົນປະໂຫຍດເລິກເຊິ່ງກ່ວາອີກ, ສ້າງສະພາບການໃໝ່ພ້ອມກັນພັດທະນາ ແລະ ວັດທະນາຖາວອນ. ທີສາມ, 2 ປະເທດຄວນຕັ້ງໜ້າຜັນຂະຫຍາຍການພົວພັນແລກປ່ຽນປະຊາຊົນ, ເຮັດໃຫ້ພື້ນຖານປະຊາຊົນຂອງການພົວພັນ 2 ຝ່າຍໝັ້ນຄົງ, ເຂັ້ມແຂງກ່ວາອີກ.