ລຸກຊຳບວກໜູນຊ່ວຍຄວາມມານະພະຍາຍາມກໍ່ສ້າງປະຊາຄົມອາຊຽນ
 |
(vovworld) – ແຈ້ງການຂອງຄະນະເລຂາ ອາຊຽນ ເມື່ອວັນທີ 19/6 ໃຫ້ຮູ້ວ່າ: ລຸກຊຳບວກ ໃຫ້ຄຳໝັ້ນສັນຍາສືບຕໍ່ໜູນຊ່ວຍບັນດາຄວາມມານະພະຍາຍາມກໍ່ສ້າງປະຊາຄົມ ອາຊຽນ ແລະ ເຮັດໃຫ້ການພົວພັນກັບພາກພື້ນນີ້ເລິກເຊິ່ງຂຶ້ນຕື່ມ. ກ່າວຄຳເຫັນທີ່ພິທີເຂົ້າຍື່ນສານຕາຕັ້ງ, ທ່ານເອກອັກຄະລັດຖະທູດຄົນໃໝ່ຂອງ ລຸກຊຳບວກ ປະຈຳ ອາຊຽນ Robert Lauer ຢັ້ງຢືນວ່າ: ລຸກຊຳບວກຖືເປັນສຳຄັນການພົວພັນກັບ ອາຊຽນ ຢູ່ທັງຂັ້ນ 2 ຝ່າຍ ແລະ ໃນຂອບເຂດ ອາຊຽນ - ສະຫະພາບ ເອີລົບ (EU). ລຸກຊຳບວກ ຍາມໃດກໍ່ເອົາໃຈໃສ່ເຖິງການພັດທະນາການຮ່ວມມືຫຼາຍດ້ານ ແລະ ການໜູນຊ່ວຍ ອາຊຽນ, ພິເສດໃນບັນຫາເຊື່ອມໂຍງເຂົ້າກັບພາກພື້ນ. ລັດຖະບານ ລຸກຊຳບວກ ໃຫ້ຄຳໝັ້ນສັນຍາສືບຕໍ່ໜູນຊ່ວຍ, ສົ່ງເສີມບັນດາຄວາມມານະພະຍາຍາມກໍ່ສ້າງປະຊາຄົມອາຊຽນໃນທ້າຍປີນີ້, ກໍ່ຄືການພັດທະນາຂອງ ອາຊຽນ ໃນຊຸມປີຈະມາເຖິງ. ສ່ວນທ່ານເລຂາທິການໃຫຍ່ ເລເລືອງມິງ ຊົມເຊີຍເຈດຕະນາດີ ແລະ ບັນດາການໜູນຊ່ວຍຂອງລັດຖະບານ ລຸກຊຳບວກ ສຳລັບການກໍ່ສ້າງປະຊາຄົມ ອາຊຽນ. ແບ່ງປັນກ່ຽວກັບຄວາມຄືບໜ້າກໍ່ສ້າງປະຊາຄົມ ອາຊຽນ, ທ່ານເລຂາທິການໃຫຍ່ ເລເລືອງມິງ ຢັ້ງຢືນວ່າ ສະຫະສະມາຄົມພວມມີບັນດາບາດກ້າວມຸ່ງໄປເຖິງຈຸດໝາຍດັ່ງກ່າວໃນທ້າຍປີນີ້ຢ່າງໝັ້ນຄົງ.