ຕອນຄໍ່າວັນທີ 04 ທັນວາ, ທ່ານນາຍົກລັດຖະມົນຕີຝລັ່ງ Edouard Philippe ໄດ້ແຈ້ງໃຫ້ຊາບວ່າ ຈະໂຈະການເພີ່ມອັດຕາພາສີສໍາລັບເຊື້ອເພີງ ພາຍໃນ 06 ເດືອນ. ນີ້ແມ່ນໜຶ່ງໃນບັນດາມາດຕະການທີ່ມີລັກສະນະຜ່ອນສັ້ນຜ່ອນຍາວຂອງ ອໍານາດການປົກຄອງທ່ານປະທານາທິບໍດີຝລັ່ງ Emmalnuel Macron ເພື່ອແນໃສ່ຫຼຸດຜ່ອນຄວາມເຄັ່ງຕຶງ ອັນເນື່ອງມາຈາກກະແສແຫ່ຂະບວນປະທ້ວງ ທີ່ມີຊື່ວ່າ “ເສື້ອເຫຼືອງ” ໄດ້ແກ່ຍາວໃນຫຼາຍອາທິດຜ່ານມາ. ນອກຈາກເລື່ອງໂຈະການເພີ່ມອັດຕາພາສີສໍາລັບເຊື້ອເພີງແລ້ວ, ລັດຖະບານ ຝລັ່ງ ຍັງໂຈະການເພີ່ມລາຄາ ອາຍແກັດ ແລະ ໄຟຟ້າຕື່ມອີກ, ຄາດວ່າ ຈະມີຜົນສັກສິດນັບແຕ່ເດືອນມັງກອນ 2019, ພາຍໃນ 03 ເດືອນ ຂອງລະດູໜາວ. ນອກຈາກນັ້ນ, ແຜນການຮັດກຸມການຕີລາຄາເຕັກນິກຂອງລົດໂອໂຕ, ທີ່ເຄີຍແນໃສ່່ລົດໂອໂຕລຸ້ນເກ່ົາ ທີ່ໄດ້ກໍ່ມົນລະພິດສິ່ງແວດລ້ອມນັ້ນ ກໍຖືກໂຈະໄວ້ເປັນເວລາ 06 ເດືອນ.

        ກໍຕາມທ່ານນາຍົກລັດຖະມົນຕີຝລັ່ງ Philippe ແລ້ວ, ໃນປະມານ 06 ເດືອນ, ລັດຖະບານຈະປຶກສາຫາລືບັນດາມາດຕະການ ເພື່ອແນໃສ່ໜູນຊ່ວຍກຸ່ມແຮງງານທີ່ທຸກຍາກ. ທ່ານ Philippe ກໍເນັ້ນໜັກວ່າ ທຸກການແຫ່່ຂະບວນປະທ້ວງໃນອະນາຄົດ ຕ້ອງໄດ້ແຈ້ງໃຫ້ບັນດາພາກສ່ວນມີໜ້າທີ່ຮັບຜິດຊອບ ຊາບລ່ວງໜ້າ ແລະ ດໍາເນີນໄປໃນສັນຕິພາບ.