(vovworld) – ວັນທີ 25/12, ລັດຖະບານ ກຳປູເຈຍ ໄດ້ອອກຖະແຫຼງການຊີ້ແຈ້ງວ່າການແຫ່ຂະບວນປະທ້ວງ, ການເດີນຂະບວນຄັ້ງຕ່າງໆໂດຍການນຳຝ່າຍຄ້ານ Sam Rainsy ແລະ Kem Sokha ຈັດຕັ້ງແມ່ນຂະບວນການລຸກຮື້ຂຶ້ນກໍ່ຄວາມສັບສົນທາງສັງຄົມ, ທັງແມ່ນການກະທຳລະເມີດລັດຖະທຳມະນູນ ເມື່ອຊອກຫາວິທີຕ້ານຄືນ ແລະ ໂຄ່ນລົ້ມລັດຖະບານທີ່ໄດ້ຮັບການສ້າງຕັ້ງຖືກກັບລັດຖະທຳມະນູນ. ທ່ານ Tith Sothea, ໂຄສົກຂອງອົງການຖະແຫຼງຂ່າວ ແລະ ປະຕິກິລິຍາຮີບດ່ວນຂອງສະພາລັດຖະມົນຕີ ກຳປູເຈຍ, ໄດ້ຢັ້ງຢືນວ່າລັດຖະບານປະຈຸບັນຂອງທ່ານນາຍົກລັດຖະມົນຕີ Hun Sen ໄດ້ຮັບການສ້າງຕັ້ງບົນພື້ນຖານລັດຖະທຳມະນູນ ແລະ ກົດໝາຍທີ່ພວມປະກາດໃຊ້, ຕາງໜ້າໃຫ້ຜູ້ມີສິດເລືອກຕັ້ງໃນທົ່ວປະເທດ, ດັ່ງນັ້ນ ເລື່ອງບັນດາການນຳຝ່າຍຄ້ານຮຽກຮ້ອງການຕ້ານລັດຖະບານຂອງນາຍົກລັດຖະມົນຕີ Hun Sen ແມ່ນໄປຝືນກັບລັດຖະທຳມະນູນ ກໍ່ຄືຄວາມມຸ່ງຫວັງຂອງຜູ້ມີສິດເລືອກຕັ້ງ. ທ່ານ Tith Sothea ເນັ້ນໜັກວ່າ: ຖ້າລັດຖະບານ ປະຈຸບັນຕ້ອງປ່ຽນແປງ ຫຼື ລາອອກຈາກຕຳແໜ່ງຍ້ອນບັນດາການແຫ່ຂະບວນປະທ້ວງຂອງຜູ້ສະໜັບສະໜູນຝ່າຍຄ້ານນັ້ນຈະແມ່ນການລະເມີດລັດຖະທຳມະນູນຂອງປະເທດຊາດ.