ລັດຖະມົນຕີກະຊວງປ້ອງກັນປະເທດ ກຳປູເຈຍ ສິ້ນສຸດການຢ້ຽມຢາມ ແລະ ເຮັດວຽກຢູ່ ຫວຽດນາມ
ພິທີລົງນາມໃນແຜນການຮ່ວມມືປີ 2012 ລະຫວ່າງ ກະຊວງປ້ອງກັນປະເທດຫວຽດນາມ ແລະ ກະຊວງປ້ອງກັນປະເທດກຳປູເຈຍ
(ພາບ: .baomoi.com)
|
(vovworld) - ໂດຍຮັບຄຳເຊີນຂອງທ່ານພົນເອກ, ລັດຖະມົນຕີກະຊວງປ້ອງກັນປະເທດຫວຽດນາມ ຟຸ່ງກວາງແທງ, ທ່ານພົນເອກ ເຕັຍແບງ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດລາຊະອານາຈັກກຳປູເຈຍ ໄດ້ນຳໜ້າຄະນະຜູ້ແທນກະຊວງປ້ອງກັນປະເທດກຳປູເຈຍ ມາຢ້ຽມຢາມ ແລະ ເຮັດວຽກຢູ່ຫວຽດນາມ. ຕອນເຊົ້າວັນທີ 13/3, ທ່ານພົນເອກ ເຕຍແບງ ແລະ ບັນດາສະມາຊິກໃນຄະນະຜູ້ແທນກະຊວງປ້ອງກັນປະເທດກຳປູເຈຍ ໄດ້ເດີນທາງອອກຈາກນະຄອນ ດ່ານັ້ງ, ສິ້ນສຸດການຢ້ຽມຢາມ ແລະ ເຮັດວຽກຢູ່ ຫວຽດນາມ ຢ່າງຈົບງາມ. ກ່ອນໜ້ານັ້ນ, ຕອນບ່າຍວັນທີ 12/3, ທ່ານພົນເອກ ຟຸ່ງກວາງແທງ ແລະ ບັນດາພະນັກງານຂັ້ນສູງກອງທັບປະຊາຊົນຫວຽດນາມ ໄດ້ໃຫ້ການຕ້ອນຮັບທ່ານພົນເອກ ເຕັຍແບງ ແລະ ບັນດາສະມາຊິກໃນຄະນະ. ຄະນະຜູ້ແທນຂັ້ນສູງກະຊວງປ້ອງກັນປະເທດຫວຽດນາມ ໂດຍທ່ານພົນເອກ ຟຸ່ງກວາງແທງ ເປັນຫົວໜ້າຄະນະໄດ້ມີການເຈລະຈາກັບຄະນະຜູ້ແທນຂັ້ນສູງກະຊວງປ້ອງກັນປະເທດກຳປູເຈຍ ໂດຍທ່ານພົນເອກ ເຕັຍແບງ ເປັນຫົວໜ້າຄະນະ. ສອງຝ່າຍໄດ້ແລກປ່ຽນກ່ຽວກັບສະພາບການໃນພາກພື້ນ, ສາກົນ ແລະ ຂອງແຕ່ລະປະເທດ, ຕີລາຄາໝາກຜົນແຫ່ງການຮ່ວມມືມິດຕະພາບລະຫວ່າງກອງທັບປະຊາຊົນຫວຽດນາມ ກັບກອງທັບປະຊາຊົນກຳປູເຈຍ ໃນໄລຍະຜ່ານມາ, ແລະ ເຫັນດີເປັນເອກະພາບນຳກັນວ່າ, ໃນໄລຍະຈະມາເຖິງ, ກອງທັງສອງປະເທດສືບຕໍ່ເພີ່ມທະວີການຮ່ວມມືໃນທຸກຂົງເຂດຄື: ແລກປ່ຽນຄະນະຜູ້ແທນຂັ້ນສູງ, ບຳລຸງສ້າງພະນັກງານ, ຮ່ວມມືປ້ອງກັນເຂດຊາຍແດນ ກໍ່ຄືບັນດາບັນຫາເຊິ່ງທັງສອງຝ່າຍຕ່າງມີຄວາມສົນໃຈ, ເພື່ອສັນຕິພາບ, ສະຖຽນລະພາບ, ການພັດທະນາໃນພາກພື້ນ ແລະ ຢູ່ໃນໂລກ.