ທ່ານລັດຖະມົນຕີການຕ່າງປະເທດ ອາເມລິກາ Antony Blinken (ພາບ: TTXVN)

ວັນທີ 1 ຕຸລາ, ກະຊວງການຕ່າງປະເທດ ອາເມລິກາ ໄດ້ປະກາດວ່າ ທ່ານລັດຖະມົນຕີ Antony Blinken ຈະໄປປະຕິບັດງານຢູ່ ຝລັ່ງ ແລະ ມີການເຈລະຈາກັບວົງການເຈົ້າໜ້າທີ່ປະເທດຝລັ່ງ ໃນອາທິດໜ້າ, ໃນຄວາມມານະພະຍາຍາມເພື່ອແນໃສ່ຫຼຸດຜ່ອນຄວາມໂກດແຄ້ນຂອງ ປາຣີ ກ່ຽວກັບສັນຍາກ່ຳປັ່ນດຳນ້ຳກັບ ອົດສະຕາລີ ຖືກຍົກເລີກ ໂດຍມີສ່ວນກ່ຽວຂ້ອງ ອາເມລິກາ. ທ່ານລັດຖະມົນຕີການຕ່າງປະເທດ Blinken ຈະມີໜ້າຢູ່ ປາຣີໃນລະຫວ່າງວັນທີ 4 – 6 ຕຸລາ ເພື່ອເຂົ້າຮ່ວມກອງປະຊຸມຂອງອົງການຮ່ວມມື ແລະ ພັດທະນາເສດຖະກິດ (OECD), ກໍ່ຄືການພົບປະກັບວົງການເຈົ້າໜ້າທີ່ຝລັ່ງ ເພື່ອປຶກສາຫາລື ກ່ຽວກັບການ “ເພີ່ມທະວີການພົວພັນສຳຄັນລະຫວ່າງ ອາເມລິກາ ແລະ ຝລັ່ງ ໃຫ້ຫຼາຍກ່ວາອີກ”. ຄາດວ່າ, ທ່ານ Blinken ແລະ ບັນດາເຈົ້າໜ້າທີ່ຝລັ່ງ ຈະປຶກສາຫາລືບັນຫາຄື “ຄວາມໝັ້ນຄົງຢູ່ພາກພື້ນ ມະຫາສະໝຸດ ອິນເດຍ - ປາຊີຟິກ, ວິກິດການດ້ານດິນຟ້າອາກາດ, ຟື້ນຟູເສດຖະກິດ ພາຍຫຼັງໂລກລະບາດໂຄວິດ - 19, ການພົວພັນຂ້າມມະຫາສະໝຸດ ອັດລັງຕິກ ແລະ ການຮ່ວມມືກັບບັນດາສຳພັນທະມິດ ແລະ ຄູ່ຮ່ວມມືໃນ ສິ່ງທ້າທາຍ ແລະ ກາລະໂອກາດໃນທົ່ວໂລກ”.

ກ່ອນໜ້ານັ້ນ, ການພົວພັນຝລັ່ງ - ອາເມລິກາ ໄດ້ຮັບຜົນສະທ້ອນຢ່າງຮ້າຍແຮງຍ້ອນການໂຕ້ຖຽງກັນ ທີ່ກ່ຽວຂ້ອງເຖິງຂໍ້ຕົກລົງຄວາມໝັ້ນຄົງ 3 ຝ່າຍ ອາເມລິກາ - ອັງກິດ - ອົດສະຕາລີ (AUKUS). ຂໍ້ຕົກລົງ ທີ່ຫາກໍ່ໄດ້ລົງນາມ ນີ້ ໄດ້ພາໄປເຖິງເລື່ອງ Canberra ຖອນຕົວອອກຈາກ ຂໍ້ຕົກລົງຊື້ກ່ຳປັ່ນດຳນ້ຳ ທີ່ມີມູນຄ່າ 66 ຕື້ USD ທີ່ໄດ້ລົງນາມກັບບໍລິສັດໜຶ່ງຂອງ ຝລັ່ງ.