ລັດຖະມົນຕີການຕ່າງປະເທດຫວຽດນາມ ຕ້ອນຮັບ ລັດຖະມົນຕີການຕ່າງປະເທດ Macedonia

ວັນຈັນ ທີ 12 ພະຈິກ ຄ.ສ. 2012 | 18:27:35

(vovworld) – ຕອນບ່າຍວັນທີ 12/11, ຢູ່ສຳນັກງານປະທານປະເທດ, ທ່ານປະທານປະເທດTruong Tan Sang ໄດ້ຕ້ອນຮັບທ່ານລັດຖະມົນຕີການຕ່າງປະເທດ Macedonia Nicola Poposki ທີ່ພວມຢູ່ຢ້ຽມຢາມຫວຽດນາມ ຢ່າງເປັນທາງການໃນລະຫວ່າງວັນທີ 11-13/11. ທ່ານປະທານປະເທດTruong Tan Sang ຖືວ່າ ການຮ່ວມມືທາງດ້ານເສດຖະກິດການຄ້າລະຫວ່າງສອງປະເທດຍັງບໍ່ທັນສົມກັບຄວາມສາມາດບົ່ມຊ້ອນຂອງສອງປະເທດເທື່ອ, ດັ່ງນັ້ນ, ສອງຝ່າຍຄວນຊຸກຍູ້ການພົວພັນຮ່ວມມືທາງດ້ານເສດຖະກິດການຄ້າກວ່າອີກ. ຕາມທ່ານປະທານປະເທດ Truong Tan Sang ແລ້ວ, ສອງປະເທດຄວນເປີດບັນດາອົງການຕາງໜ້າທາງດ້ານການຄ້າຢູ່ບັນດາສູນເສດຖະກິດ, ພ້ອມທັງສ້າງເງື່ອນໄຂເພື່ອໃຫ້ອຳນາດການປົກຄອງ, ອົງການຈັດຕັ້ງມິດຕະພາບບັນດາແຂວງ, ນະຄອນຂອງສອງປະເທດເພີ່ມທະວີການແລກປ່ຽນ ຊອກຮູ້ເຊິ່ງກັນ ແລະ ກັນ, ເພື່ອແນໃສ່ຊຸກຍູ້ການພົວພັນລະຫວ່າງຫວຽດນາມ Macedonia ໃນທຸກຂົງເຂດ. ທ່ານປະທານປະເທດTruong Tan Sang ຫວັງວ່າ Macedonia ຈະສະໜັບສະໜູນຫວຽດນາມ ອອກສະໝັກເປັນສະມາຊິກບໍ່ປະຈຳການຂອງສະພາຄວາມໝັ້ນຄົງອາຍຸການ 2020 – 2021 ແລະ ສະພາເສດຖະກິດສັງຄົມສະຫະປະຊາຊາດ ອາຍຸການ 2016-2018

ລັດຖະມົນຕີການຕ່າງປະເທດຫວຽດນາມ ຕ້ອນຮັບ ລັດຖະມົນຕີການຕ່າງປະເທດ Macedonia - ảnh 1

ການເຈລະຈາລະຫວ່າງລັດຖະມົນຕີການຕ່າງປະເທດຫວຽດນາມ Pham Binh Minh
ແລະ ລັດຖະມົນຕີການຕ່າງປະເທດ Macedonia Nicola Poposki
(ພາບ: chinhphu.vn)

ກ່ອນໜ້ານັ້ນຕອນເຊົ້າວັນທີ 12/11, ຢູ່ເຮືອນພັກຂອງລັດຖະບານ ໄດ້ດຳເນີນການເຈລະຈາລະຫວ່າງລັດຖະມົນຕີການຕ່າງປະເທດຫວຽດນາມ Pham Binh Minh ແລະ ລັດຖະມົນຕີການຕ່າງປະເທດ Macedonia Nicola Poposki. ທ່ານລັດຖະມົນຕີ Pham Binh Minh ຢືນຢັນວ່າ, ຍາມໃດຫວຽດນາມ ກໍ່ຖືການປັບປຸງ ແລະ ພັດທະນາສາຍພົວພັນມິດຕະພາບ ແລະ ການຮ່ວມມືກັບບັນດາປະເທດເພື່ອນມິດທີ່ເປັນມູນເຊື້ອເປັນສຳຄັນ , ໃນນັ້ນມີ Macedonia. ລັດຖະມົນຕີການຕ່າງປະເທດ 2 ທ່ານ ໄດ້ເຫັນດີເປັນເອກະພາບບາງທິດທາງ, ມາດຕະການ ເພື່ອແນໃສ່ເພີ່ມທະວີການພົວພັນຮ່ວມມືລະຫວ່າງສອງປະເທດ, ຄື: ສິ້ນສຸດການລົງນາມໃນສັນຍາຮ່ວມມືທາງດ້ານເສດຖະກິດ, ສັນຍາສົ່ງເສີມ ແລະ ອາລັກຂາແກ່ການລົງທຶນ, ການສ້າງການພົວພັນໂດຍກົງລະຫວ່າງວິສາຫະກິດ 2 ປະເທດ. ຫວຽດນາມ ຢືນຢັນ ພ້ອມແລ້ວທີ່ຈະເປັນຂົວເຊື່ອມຕໍ່ເພ່ືອໃຫ້ Macedonia ນຳສິນຄ້າເຂົ້າບັນດາປະເທດອາຊຽນ ແລະ Macedonia ກໍ່ຈະເປັນຂົວເຊື່ອມຕໍ່ເພື່ອໃຫ້ຫວຽດນາມ ສົ່ງຜະລິດຕະພັນ, ພິເສດແມ່ນເຂົ້າສານ, ກາເຟ… ອອກສູ່ຕະຫຼາດ Balkan. ລັດຖະມົນຕີທັງສອງທ່ານກໍ່ໄດ້ແລກປ່ຽນບາງບັນຫາສາກົນ ແລະ ພາກພື້ນ ເຊິ່ງທັງສອງຝ່າຍຕ່າງມີຄວາມສົນໃຈ; ຢືນຢັນສົມທົບກັນຢ່າງແໜ້ນແຟ້ນໃນບັນດາເວທີປາໄສສາກົນ ແລະ ພາກພື້ນ.