ລັດຖະມົນຕີການຕ່າງປະເທດອາເມລິກາ ໂຈະການຢ້ຽມຢາມຕາເວັນອອກກາງ ເພື່ອເຂົ້າຮ່ວມກອງປະຊຸມດ່ວນກ່ຽວກັບຊີຣີ
(ລັດຖະມົນຕີການຕ່າງປະເທດອາເມລິກາ John Kerry)
(vovworld) - ວັນທີ 10/06, ບັນດາເຈົ້າໜ້າທີ່ອຳນາດການປົກຄອງຂອງທ່ານປະທານາທິບໍດີອາເມລິກາ Barack Obama ໄດ້ເປີດເຜີຍກັບວົງການນັກຂ່າວວ່າ ທ່ານລັດຖະມົນຕີການຕ່າງປະເທດອາເມລິກາ John Kerry ໄດ້ຕົກລົງໂຈະການຢ້ຽມຢາມຕາເວັນອອກກາງ ຄັ້ງທີ 5 ໃນອາທິດນີ້ ເພື່ອເຂົ້າຮ່ວມກອງປະຊຸມວິສາມັນຂອງຄະນະຮັບຜິດຊອບຄວາມສະຫງົບປອດໄພທຳນຽບຂາວ ທີ່ປຶກສາຫາລືກ່ຽວກັບສະພາບການຢູ່ຊີຣີ. ໜຶ່ງໃນບັນດາເນື້ອໃນອາດສາມາດປຶກສາຫາລືນັ້ນແມ່ນ ເລື່ອງອາເມລິກາ ຈະສະໜອງອາວຸດໃຫ້ແກ່ກຳລັງຝ່າຍຄ້ານຂອງຊີຣີ. ບັນດາເຈົ້າໜ້າທີອາເມລິກາ ໃຫ້້ຮູ້ວ່າ ກອງປະຊຸມສຸດຍອດວິສາມັນຂອງທຳນຽບຂາວ ໃນອາທິດນີ້ກ່ຽວກັບຊີຮີ ບໍ່ແມ່ນສັນຍານກ່ຽວກັບເລື່ອງອຳນາດການປົກຄອງ Obama ມີບັນດາພະຍານຫຼັກຖານກ່ຽວກັບເລື່ອງນຳໃຊ້ອາວຸດເຄມີຢູ່ຊີຣີ ແລະ ອາເມລິກາ ໄດ້ກຽມພ້ອມມາດຕະການຮັບມືແລ້ວ. ເນື້ອໃນຂອງກອງປະຊຸມດັ່ງກ່າວສາມາດພາໄປເຖິງຂໍ້ຕົກລົງວ່າ ອາເມລິກາຈະສະໜອງອາວຸດໃຫ້ກຳລັງຝ່າຍຄ້ານໂດຍກົງ ຫຼື ຮັບເອົາສິດແຈກຢາຍອາວຸດຂອງປະເທດຕ່າງໆ ທີ່ສະໜອງໃຫ້ແກ່ກຳລັງຝ່າຍຄ້ານຢູ່ຊີຣີ. ເຈົ້າໜ້າທີ່ທ່ານໜຶ່ງໂດຍບໍ່ເຜີຍຊື່ຂອງທຳນຽບຂາວໃຫ້ຮູ້ວ່າ ທຳນຽບຂາວປຶກສາຫາລືຫົວເລື່ອງສະໜອງອາວຸດໃຫ້ແກ່ກຳລັງຝ່າຍຄ້ານຊີຣີ ໃນເດືອນຜ່ານມາຫຼາຍເທື່ອແລ້ວ.