(vovworld) – ​​​ໂຄສົກ​ກະຊວງ​ການ​ຕ່າງປະ​ເທດ ອາ​ເມ​ລິ​ກາ Jen Psaki ​ໄດ້​ປະກາດ​ເມື່ອ​ວັນ​ທີ 28/12 ວ່າ: ລັດຖະມົນຕີ​ການ​ຕ່າງປະ​ເທດ John Kerry ຈະ​​ໄປ​ປະຕິບັດ​ງານ​ຢູ່ຕາ​ເວັນ​ອອກ​ກາງ​ນັບ​ແຕ່​ວັນ​ທີ 1/1/2014 ​ເພື່ອ​ຊຸກຍູ້​ວິວັດ​ການ​ເຈລະຈາ​ສັນ​ຕິ​ພາບ​ທີ່​ພວມ​ຖືກ​ກີດຂວາງ​ລະຫວ່າງ ອິດສະຣາ​ແອນ ​ແລະ ປາ​ແລດ​ສະຕີ​ນ. ​ໃນ​ການ​ປະຕິບັດ​ງານ​​ເຖິງ​ຕາ​ເວັນ​ອອກ​ກາງຄັ້ງ​ນີ້, ທ່ານ​ລັດຖະມົນຕີ​ການ​ຕ່າງປະ​ເທດ Kerry ​ຈະ​ໄປ​ຍັງ Gierusalem ​ເພື່ອ​ເຈລະຈາ​ກັບ​ທ່ານ​ນາຍົກລັດຖະມົນຕີ ອິດສະຣາ​ແອນ Benjamin Netanyahu ​ແລະ ​ໄປ​ຍັງ​ນະ​ຄອນ Ramallah ​ເພື່ອ​ເຈລະຈາ​ກັບ​ທ່ານ​ປະທານາທິບໍດີ ປາ​ແລດ​ສະຕີ​ນ Mahmud Abbas ກ່ຽວ​ກັບ​ຄວາມ​ສາມາດ​ຊອກຫາ​ຂໍ້​ຕົກລົງ​ສັນ​ຕິ​ພາບ​ຕາ​ເວັນ​ອອກ​ກາງ​ຢ່າງຮອບດ້ານ​ລະຫວ່າງ ອິດສະຣາ​ແອນ ​ແລະ ປາ​ແລດ​ສະຕີ​ນ, ກໍ່ຄື​ປຶກສາ​ຫາລື​ບັນດາ​ບັນຫາ​ເຄັ່ງຮ້ອນ​ອື່ນ​ຂອງ​ພາກ​ພື້ນ.

    ກ່ອນ​ໜ້າ​ນັ້ນ, ກ່າວ​ຄຳ​ເຫັນ​ເມື່ອ​ສິ້ນ​ສຸດ​ການ​ປະຕິບັດ​ງານ​ຄັ້ງ​ທີ 9 ​ເຖິງ​ພາກ​ພື້ນ​ນີ້ເມື່ອ​ວັນ​ທີ 13/12, ທ່ານ​ລັດຖະມົນຕີ​ການ​ຕ່າງປະ​ເທດ ອາ​ເມ​ລິ​ກາ John Kerry ​ໃຫ້ຮູ້​ວ່າ: ອິດສະຣາ​ແອນ ​ແລະ ປາ​​ແລດສະຕີ​ນ ຍັງ​ພວມ​ປະຕິບັດ​ຕາມ​​ແຜນການ​ທີ່​ໄດ້​ວາງ​ອອກ​ເພື່ອ​ບັນລຸ​ໄດ້​ຂໍ້​ຕົກລົງ​ສັນຕິພາບ​ຕາ​ເວັນ​ອອກ​ກາງ​ຮອບດ້ານ​ກ່ອນ​ທ້າຍ​ເດືອນ 4/2014 ​ແລະ 2 ຝ່າຍ​ລ້ວນ​ແຕ່​ເອົາ​ໃຈ​ໃສ່​ເຖິງ​ບັນດາ​ການ​​ເຈລະຈາ.