(vovworld) - ທີ່​ການ​ປະຊຸມ​ຂ່າວ​ເມື່ອ​ວັນ​ທີ 06/05, ທ່ານ​ລັດຖະມົນຕີ​ການ​ຕ່າງປະ​ເທດ​ລັດ​ເຊຍ Sergei Lavrov ຊີ້​ແຈ້ງວ່າ ມົດສກູ ມີ​ຄວາມ​ລະ​ແວງ​ສົງ​ໄສ​ຕໍ່ລັກສະນະ​ຖືກຕ້ອງ​ຕາມ​ກົດໝາຍ​ຂອງ​ການ​ເລືອກ​ຕັ້ງ​ປະທານາທິບໍດີຢູ່ ຢູ​ແກຼນ ​ເຊິ່ງຄາດ​ວ່າ​ຈະ​ຈັດ​ຂຶ້ນ​ໃນ​ວັນ​ທີ 25/05. ຕາມ​ຜູ້​ນຳ​ຂະ​ແໜງ​ການ​ທູດ​ລັດ​ເຊຍ ​ແລ້ວ, ​ເລື່ອງ​ດຳ​​ເນີນ​ການ​ເລືອກ​ຕັ້ງ​ໃນ​ຈຸດ​ເວລາ​ທີ່​ກອງທັບພວມ​ໄດ້​ຮັບ​ການ​ຜັນ​ຂະຫຍາຍ​ຢູ່​ບາງ​ສະຖານ​ທີ່​ແມ່ນ​ຜິດ​ປົກກະຕິ ​ແລະ ຢູ​ແກຼນ ຄວນ​ບັນລຸ​ໄດ້​ຄວາມ​ເຫັນ​ດີ​ເ​ຫັນ​ພ້ອມກ່ຽວ​ກັບ​ລັດຖະທຳ​ມະນູ​ນສະບັບ​ໃໝ່​ໃນ​ການກຳນົດສິດ​ຂອງ​ປະທານາທິບໍດີ ກ່ອນ​ທີ່ຈັດ​ການ​ເລືອກ​ຕັ້ງ. ​​ເມື່ອ​ເຕື້ອງ​ເຖິງ​​ເລື່ອງ​ຈັດ​ຕັ້ງ​ຮອບ​ເຈລະຈາ​ສາກົນຄັ້ງ​ໃໝ່​ຢູ່​ເຊີ​ແນວ. ທ່ານ​ລັດຖະມົນຕີ​ການ​ຕ່າງປະ​ເທດ Sergei Lavrov ຢືນຢັນ​ວ່າ, ບັນດາ​ຂໍ້​ຕົກລົງ​ທີ່​ບັນລຸ​ໄດ້​ໃນ​ການ​ເຈລະຈາ​ຄັ້ງ​ທຳ​ອິດ​ເຊິ່ງຖືກ​ຈັດ​ຂຶ້ນ​ເມື່ອ​ວັນ​ທີ 17/04 ຍັງ​ບໍ່​ທັນ​ໄດ້​ຮັບ​ການ​ປະຕິບັດ. ສະ​ນັ້ນ, ການຈັດ​ຕັ້ງ​ຮອບ​ເຈລະຈາ​ຄັ້ງ​ໃໝ່​ຈະ​ເຮັດ​ໃຫ້​ສະພາບ​ການ​ສັບສົນ​ຂຶ້ນ​ເຕີ່ມ ຖ້າ​ຫາກ​ບໍ່​ມີ​ການ​ເຂົ້າ​ຮ່ວມ​ຂອງ​ຜູ້ຕາງ​ໜ້າບັນດາ​ເຂດ​ເວົ້າ​ພາສາ​ລັດ​ເຊຍ ຢູ່ ຢູ​ແກຼນ.

        ​ໃນ​ຂະນະ​ນັ້ນ, ຜູ້​ຮັກສາ​ການລັດຖະມົນຕີ​ຕ່າງປະ​ເທດ​ຢູ​ແກຼນ Andiry Deshchytsia ​ໃຫ້​ຮູ້​ວ່າ Kiev ພ້ອມ​​ແລ້ວ​ທີ່​ຈະ​ສະໜັບສະໜູນ​ຮອບ​ເຈລະຈາ​ຄັ້ງ​ໃໝ່​ຢູ່​ເຊີ​ແນວ ​ເພື່ອ​ແນ​ໃສ່​ຫຼຸດຜ່ອນ​ຄວາມ​ເຄັ່ງ​ຕຶງ​ໃນ​ປະຈຸ​ບັນ ດ້ວຍ​ເງື່ອນ​ໄຂ​ທີ່​ວ່າ ມົດສກູ ສະໜັບສະໜູນ​ການ​ເລືອກ​ຕັ້ງ​ປະທານາທິບໍດີ​ຂອງ​ຢູ​ແກຼນ ​ໃນ​ໄລຍະ​ຈະ​ມາ​ເຖິງ.