(vovworld) - ວັນທີ 30/03, ສຳນັກຂ່າວສານ TASS ຂອງລັດເຊຍ ໄດ້ຄັດຄຳປາໄສຂອງຜູ້ຕາງໜ້າກະຊວງການຕ່າງປະເທດອາເມລິກາ ໂດຍຢືນຢັນວ່າ ວໍສິງຕັນ ພ້ອມແລ້ວທີ່ຈະຮ່ວມມືກັບມົດສະກູ ໃນບັນດາຂົງເຂດຕົວຈິງ ແລະ ມີຜົນປະໂຫຍດສຳລັບປະຊາຊົນອາເມລິກາ, ພ້ອມທັງເດັດດຽວປົກປັກຮັກສາຜົນປະໂຫຍດຂອງບັນດາສຳພັນທະມິດ. ຜູ້ຕາງໜ້າກະຊວງການຕ່າງປະເທດອາເມລິກາ ໄດ້ຢ້ຳຄືນຄຳກ່າວປາໄສຂອງທ່ານລັດຖະມົນຕີການຕ່າງປະເທດອາເມລິກາ Rex Tillerson ໃນການພົບປະຫວ່າງແລ້ວນີ້ຢູ່ເຢຍລະມັນ ກັບຄູ່ຮ່ວມຕຳແໜ່ງລັດເຊຍ Sergei Lavrov ວ່າ, ອາເມລິກາ ພ້ອມແລ້ວທີ່ຈະຮ່ວມມືກັບລັດເຊຍ ໃນບັນດາຂົງເຂດທີ່ມີຜົນປະໂຫຍດຕໍ່ປະຊາຊົນອາເມລິກາ. ໃນບັນດາຂົງເຂດເຊິ່ງ 2 ຝ່າຍຍັງມີຄວາມບໍ່ລົງລອຍກັນ, ຜູ້ຕາງໜ້າກະຊວງການຕ່າງປະເທດອາເມລິກາ ຖະແຫຼງວ່າ, ປະເທດນີ້ຈະປົກປ້ອງຜົນປະໂຫຍດ ແລະ ບັນດາຄຸນຄ່າຂອງອາເມລິກາ ກໍຄືບັນດາສຳພັນທະມິດ ແລະ ຄູ່ຮ່ວມມືຂອງປະເທດນີ້.
ກອນໜ້ານັ້ນໃນວັນດຽວກັນ, ກ່າວຄຳເຫັນທີ່ເວທີປາໄສຂົ້ວໂລກເໜືອສາກົນຄັ້ງທີ 4 ທີ່ພວມດຳເນີນຢູ່ນະຄອນ Arkhangelsk, ທ່ານປະທານາທິບໍດີລັດເຊຍ Vladimir Putin ຖະແຫຼງວ່າ, ລັດເຊຍ ປາດຖະໜາຢາກສ້າງການພົວພັນຄູ່ຮ່ວມມືກັບອາເມລິກາ.