ພິທີໄຂປີທ່ອງທ່ຽວແຫ່ງຊາດ 2017
ພາບ:baotintuc
(vovworld)- ຕອນຄ່ຳວັນທີ 11/2 ຢູ່ ນະຄອນລາວກາຍ ໄດ້ດຳເນີນພິທີໄຂປີທ່ອງທ່ຽວແຫ່ງຊາດ 2017 ດ້ວຍຫົວຂໍ້ “ສີສັນເຂດໄຕບັກ”. ກ່າວຄຳເຫັນທີ່ພິທີ, ທ່ານ ຫງວຽນວັນບີງ, ຫົວຫນ້າຄະນະຊີ້ນຳເຂດໄຕບັກ(ຕາເວັນຕົກສຽງເຫນືອ)ໄດ້ເນັ້ນຫນັກວ່າ: ປີທ່ອງທ່ຽວແຫ່ງຊາດ 2017 ຈະປະກອບສ່ວນເຊີດຊູຄຸນຄ່າດ້ານວັດທະນະທຳ, ໂຄສະນາພາບພົດ ແລະ ຊ່ວຍໃຫ້ໂລກຮູ້ຈັກເຖິງເຂດໄຕບັກ ຫວຽດນາມ ຊື່ງແມ່ນເຂດດິນແດນມີຄວາມສາມາດບົ່ມຊ້ອນຫລາຍຢ່າງ, ມີທ່າແຮງກ່ຽວກັບການພັດທະນາການທ່ອງທ່ຽວ. ເຂດໄຕບັກ ແມ່ນແຫ່ງມີກວ່າ 30 ຊົນເຜົ່າອ້າຍນ້ອງດຳລົງຊີວິດ, ດ້ວຍວັດທະນະທຳຫລາຍຮູບແບບ, ມີທິວທັດທຳມະຊາດສວຍງາມ, ລະບົບຊີວະສາດອຸດົມສົມບູນ. ທ່ານ ຫງວຽນວັນບີງ ກໍຕີລາຄາສູງບັນດາບາດກ້າວພັດທະນາຂອງຂະແຫນງທ່ອງທ່ຽວ ລາວກາຍເວົ້າສະເພາະ, ຂອງບັນດາແຂວງຢູ່ເຂດໄຕບັກ ແລະ ຂອງຫວຽດນາມ ເວົ້າລວມ ພ້ອມທັງສະເຫນີບັນດາກະຊວງ, ຂະແຫນງການສູນກາງ, ອຳນາດການປົກຄອງບັນດາທ້ອງຖິ່ນຄວນສຸມໃສ່ຢ່າງແຮງ, ສ້າງທຸກເງື່ອນໄຂສະດວກໃຫ້ແກ່ການພັດທະນາການທ່ອງທ່ຽວເພື່ອຍົກສູງກຳລັງຄວາມສາມາດການທ່ອງທ່ຽວຂອງຫວຽດນາມ.
“ພວກເຮົາຈັດຕັ້ງພິທີໄຂປີທ່ອງທ່ຽວແຫ່ງຊາດ, ເປີດສາກໃຫ້ແກ່ບັນດາການເຄື່ອນໄຫວປະຕິບັດຄາດໝາຍສ້າງຂະແຫນງທ່ອງທ່ຽວກາຍເປັນຂະແຫນງເສດຖະກິດປາຍແຫລມຂອງປະເທດຊາດ, ດ້ວຍການກະທຳແທດຈິງຂອງອຳນາດການປົກຄອງທຸກຂັ້ນ, ປະຊາຄົມວິສາຫະກິດ ແລະ ປະຊາຊົນ, ຂ້າພະເຈົ້າເຊື່ອໝັ້ນວ່າ ຂະແຫນງທ່ອງທ່ຽວເຂດໄຕບັກ ເວົ້າສະເພາະ ແລະ ຂະແຫນງທ່ອງທ່ຽວຫວຽດນາມ ເວົ້າລວມ ຈະມີບາດກ້າວພັດທະນາບຸກທະລຸໃນປີ 2017”
ພາຍຫລັງພິທີໄຂ ແມ່ນດຳເນີນລາຍການສະແດງສິລະປະຂອບຂະຫນາດໃຫຍ່ ໂດຍມີການເຂົ້າຮ່ວມຂອງນັກສິລະປິນ, ນັກສະແດງ ກວ່າ 600 ຄົນ.