(vov) – ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວລາວ ພວມຕັ້ງໜ້າກະກຽມການເຄື່ອນໄຫວໂຄສະນາ ແລະ ຮັບໃຊ້ກອງປະຊຸມສຸດຍອດອາຊີ - ເອີລົບຄັ້ງທີ 9 (ASEM 9) ເຊິ່ງຈະຈັດຂຶ້ນຢູ່ລາວໃນຕົ້ນເດືອນ 11 ປີນີ້. ທ່ານລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວລາວ ບໍ່ແສງຄຳ ວົງດາລາ ໃຫ້ຮູ້ວ່າ, ທາງກະຊວງພວມແນະນຳໃຫ້ບັນດາພາກສ່ວນທີ່ກ່ຽວຂ້ອງໂຄສະນາເຜີຍແຜ່ກ່ຽວກັບກອງປະຊຸມ. ທາງກະຊວງກໍ່ໄດ້ຈັດໃຫ້ພະນັກງານໄປຮຽນ ແລະ ເຂົ້າຮ່ວມຊຸດເຝິກອົບຮົມຢູ່ພາຍໃນ ແລະ ຕ່າງປະເທດ; ຍົກລະດັບອຸປະກອນໃນສູນການຂ່າວຮັບໃຊ້ກອງປະຊຸມ. ໂຮງແຮມຫຼາຍແຫ່ງກໍ່ໄດ້ຮັບການຍົກລະດັບ ເພື່ອຮັບໃຊ້ຄະນະຜູ້ແທນທີ່ມາຈາກຕ່າງປະເທດ. ພິເສດແມ່ນງານຕະຫຼາດນັດເຄື່ອງຫັດຖະກຳພື້ນເມືອງ ດ້ວຍບັນດາຜະລິດຕະພັນທີ່ເປັນມູນເຊື້ອຂອງລາວຈະຖືກນຳມາວາງສະແດງໃນໂອກາດນີ້.