ວັນສຸດທ້າຍຂອງກອງປະຊຸມສຸດຍອດ ອາຊຽນ 19
ໂດຍສືບຕໍ່ລາຍການເຄື່ອນໄຫວຂອງກອງປະຊຸມສຸດຍອດອາຊຽນ 19 ແລະ ບັນດາກອງປະຊຸມສຸດຍອດທີ່ກຽວຂ້ອງ, ຕອນເຊົ້າວັນທີ 19/11, ຢູ່ບາລີ (ອິນໂດເນເຊຍ) ທ່ານນາຍົກລັດຖະມົນຕີ ຫງວຽນເຕ໋ນຢຸງ ໄດ້ເຂົ້າຮ່ວມກອງປະຊຸມສຸດຍອດອາຊຽນກັບສະຫະປະຊາຊາດ ແລະ ອິນເດຍ. ກອງປະຊຸມສຸດຍອດອາຊຽນ - ສະຫະປະຊາຊາດ ສູມໃສ່ສຳຫຼວດກວດຄືນການຜັນຂະຫຍາຍຂໍ້ຕົກລົງຕ່າງໆຂອງກອງປະຊຸມສຸດຍອດອາຊຽນ - ສະຫະປະຊາຊາດຄັ້ງທີ 3 (ຮ່າໂນ້ຍ, ເດືອນ 10/2010) ແລະ ຊຸກຍູ້ການພົວພັນອາຊຽນ - ສະຫະປະຊາຊາດ ພັດ ທະນາຢ່າງຮອບດ້ານແລະແທ້ຈິງ. ເນື່ອງໃນໂອກາດນີ້, ການນຳບັນດາປະເທດອາຊຽນ ແລະ ເລຂາທິການໃຫຍ່ສະຫະປະຊາຊາດ Ban Ki-moon ໄດ້ຮັບຮອງເອົາຖະແຫຼງການຮ່ວມກ່ຽວກັບຄູ່ຮ່ວມມືຮອບດ້ານອາຊຽນ - ສະຫະປະຊາຊາດ.
ກອງປະຊຸມສຸດຍອດອາຊຽນ - ອິນເດຍ ສູມໃສ່ສຳຫຼວດກວດຄືນການຜັນຂະຫຍາຍແຜນການດຳເນີນງານ 2011 - 2015 ແລະລາຍ ການປະຕິບັດງານ2011 - 2012. ການນຳສອງຝ່າຍເຫັນດີຕໍ່ການເຄື່ອນໄຫວຫຼາຍຢ່າງເພື່ອສະເຫຼີມສະຫຼອງ 20 ປີ ແຫ່ງການສ້າງຕັ້ງການພົວພັນຄູ່ເຈລະຈາອາຊຽນ - ອິນເດຍ ໃນປີ 2012, ພິເສດແມ່ນກອງປະຊຸມສຸດຍອດ ສະເຫຼີມສະຫຼອງ ເຊິ່ງຈະຈັດຂຶ້ນຢູ່ນິວເດລີ (ອິນເດຍ) ໃນທ້າຍປີ.
ຕອນບ່າຍວັນທີ 19/11, ຢູ່ສູນກອງປະຊຸມ Bali Nusa Dua ຢູ່ ບາລີ ປະເທດ ອິນໂດເນເຊຍ ໄດ້ຈັດພິທີອັດ ກອງປະຊຸມສຸດຍອດ ອາຊຽນ 19 ແລະ ກອງປະຊຸມຂັ້ນສູງຕ່າງໆທີ່ກ່ຽວຂ້ອງ. ດ້ວຍບັນດາເອກະສານໄດ້ຮັບການລົງນາມລະຫວ່າງການນຳອາຊຽນ ແລະ ລະຫວ່າງອາຊຽນ ກັບບັນດາຄູ່ເຈລະຈາ, ກອງປະຊຸມຄັ້ງນີ້ໄດ້ຊຸກຍູ້ວິວັດການພັດທະນາບາດ ກ້າວໜຶ່ງ ກໍ່ຄືປະກອບສ່ວນຍົກສູງບົດບາດ, ທີ່ຕັ້ງຂອງອາຊຽນໃນພາກພື້ນ ແລະ ໃນໂລກ, ພ້ອມກັນນັ້ນກໍ່ຢັ້ງຢືນບັນດາຜົນສຳເລັດຂອງ ອິນໂດເນເຊຍໃນປີ ເປັນປະທານອາຊຽນ 2011. ທີ່ພິທີອັດ, ທ່ານປະທານາທິບໍດີ ອິນໂດເນເຊຍ Susilo Bambang Yudhoyono ໄດ້ມອບສົ່ງຕຳແໜ່ງ ປະທານອາຊຽນ 2012 ຢ່າງເປັນທາງການໃຫ້ແກ່ທ່ານນາຍົກລັດຖະມົນຕີ ກຳປູເຈຍ. ທີ່ພິທີມອບຮັບປະທານອາຊຽນ, ທ່ານນາຍົກລັດຖະມົນຕີ Samdec Hunsen ຢືນຢັນວ່າ: ກຳປູເຈຍຈະເຮັດຈົນສຸດຄວາມສາມາດຂອງຕົນເພື່ອສົມທົບກັບບັນດາປະເທດສະມາຊິກ ອາຊຽນ ແລະ ຄູ່ເຈລະຈາສືບຕໍ່ຍຸໄວວິວັດການກໍ່ສ້າງປະຊາຄົມອາຊຽນ, ເພີ່ມທະວີການເຊື່ອມຕໍ່ອາຊຽນ, ເປີດກວ້າງແລະເຮັດໃຫ້ການພົວພັນກັບຕ່າງປະເທດຂອງອາຊຽນເລິກເຊິ່ງກວ່າອີກ ກໍ່ຄືປັບປຸງບົດບາດໃຈກາງຂອງສະມາຄົມໃນວິວັດການຮ່ວມມືຕ່າງໆໃນພາກພື້ນ… ທ່ານນາຍົກລັດຖະມົນຕີ ຮຸນແຊນ ປາຖະໜາວ່າ ບັນດາປະເທດສະມາຊິກອາຊຽນ ແລະບັນດາຄູ່ເຈລະຈາ ສະໜັບສະໜູນ ແລະ ປະສານສົມທົບ ເພື່ອໃຫ້ ກຳປູເຈຍ ປະຕິບັດສຳເລັດໜ້າທີ່ເປັນປະທານ ອາຊຽນ ປີ 2012…
ຕອນບ່າຍວັນທີ 19/11 ພາຍຫຼັງເຂົ້າຮ່ວມພິທີອັດກອງປະຊຸມສຸດຍອດອາຊຽນ 19 ແລະ ກອງປະຊຸມສຸດຍອດຕ່າງໆ ທີ່ກ່ຽວຂ້ອງ, ທ່ານນາຍົກລັດຖະມົນຕີ ພ້ອມດ້ວຍພັນລະຍາ ແລະ ຄະນະຜູ້ແທນ ຫວຽດນາມ ໄດ້ເດີນທາງອອກຈາກ ບາລີ (ອິນໂດເນເຊຍ) ກັບເມືອ ຮ່າໂນ້ຍ. ກ່ອນໜ້ານັ້ນ, ທ່ານນາຍົກລັດຖະມົນຕີ ຫງວຽນເຕິ໋ນຢຸ້ງ ພ້ອມກັບບັນດາການນຳ ອາຊຽນ ໄດ້ເຂົ້າຮ່ວມກອງປະຊຸມສຸດຍອດອາຊຽນ - ສະຫະປະຊາຊາດຄັ້ງທີ 4, ກອງປະຊຸມສຸດຍອດ ອາຊຽນ - ອິນເດຍ ຄັ້ງທີ 9 ແລະກອງປະຊຸມອາຊີຕາເວັນອອກຄັ້ງທີ 6.