(vovworld) - ​ວັນ​ທີ 12/5, ​ໂດຍ​ສືບ​ຕໍ່​ລາຍການ​ເຮັດ​ວຽກ ຂອງກອງ​ປະຊຸມ​ສູນ​ກາງ​ຄັ້ງ​ທີ 9, ຊຸດ​ທີ 11, ຄະນະ​ບໍລິຫານ​ງານ​ສູນ​ກາງ​ພັກ​ກອມ​ມູນິດ​ຫວຽດນາມ ​ໄດ້​ດຳ​ເນີນ​ວາລະ​ປະຊຸມ​ຄົບ​ຄະນະ​ຢູ່​ຫໍ​ປະຊຸມ. ຕອນ​ເຊົ້າ​ວັນ​ທີ 12/5, ພາຍ​ໃຕ້​ການ​ເປັນ​ປະທານ​ຂອງ​ທ່ານ​ເລຂາທິການ​ໃຫຍ່​ຄະນະ​ບໍລິຫານ​ງານ​ສູນ​ກາງ​ພັກ​ກອມ​ມູນິດ​ຫວຽດນາມ ຫງວຽນ​ຟູ໋ຈ້ອງ, ຄະນະ​ບໍລິຫານ​ງານ​ສູນ​ກາງ​ ​ໄດ້​ປຶກສາ​ຫາລື​ກ່ຽວ​ກັບ​ຮ່າງ​​ລະບຽບການ​ເລືອກ​ຕັ້ງ​ໃນ​ພັກ. ຕອນ​ບ່າຍ​ວັນ​ດຽວ​ກັນ, ຄະນະ​ບໍລິຫານ​ງານ​ສູນ​ກາງ​ ປຶກສາ​ຫາລື​ກ່ຽວ​ກັບ​ການ​ຕີ​ລາຄາ, ຖອດ​ຖອນ​ບົດຮຽນ​ໃນ​ການ​ປະຕິບັດ​ຂໍ້​ກຳນົດ​ຂອງ​ກົມ​ການ​ເມືອງ​ກ່ຽວ​ກັບ​ການ​ລົງ​ຄະ​ແນນ​ສຽງ​ໄວ້​ວາງ​ໃຈ​ສຳລັບ​ສະມາຊິກ​ເຊິ່ງ​ແມ່ນ​ການ​ນຳ​ກຳມະການ​ພັກ ​ແລະ ພະນັກງານ​ການ​ນຳ​ໃນ​ບັນດາ​ອົງການ​ຈັດ​ຕັ້ງ​ພັກ, ລັດ, ​ແນວ​ໂຮມ​ປະ​ເທດ​ຊາດ ​ແລະ ບັນດາ​ອົງການ​ຈັດ​ຕັ້ງ​ການ​ເມືອງ - ສັງຄົມ. ທ່ານ​ກຳມະການ​ກົມ​ການ​ເມືອງ, ປະທານ​ສະພາ​ແຫ່ງ​ຊາດ ຫງວຽນ​ຊິງ​ຮຸ່ງ​ເປັນ​ປະທານ​ກອງ​ປະຊຸມ.

    ກ່ອນນັ້ນ, ວັນ​ທີ 11/5, ​ໂດຍ​ສືບ​ຕໍ່ລາຍການ​ເຮັດ​ວຽກ​ຂອງ​ກອງ​ປະຊຸມ​ຄັ້ງ​ທີ 9, ຄະນະ​ບໍລິຫານ​ງານ​ສູນ​ກາງ​ພັກ ກອມ​ມູນິດ ຫວຽດນາມ ​ໄດ້​ດຳ​ເນີນ​ການ​ປຶກສາ​ຫາລື​ຢູ່​ຕາມ​ໜ່ວຍ: ກ່ຽວ​ກັບສະຫລຸບ​ການ​ປະຕິບັດ​ຄຳ​ສັ່ງ​ເລ​ກທີ 37-ກມ/ສກ ຂອງ​ກົມ​ການ​ເມືອງ​ຊຸດ​ທີ 10 ກ່ຽວ​ກັບກອງ​ປະຊຸມ​ໃຫຍ່​​ຄະນະພັກທຸກ​ຂັ້ນ, ມຸ່ງ​ໄປ​ເຖິງ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ 11 ຂອງ​ພັກ ​ແລະ ຮ່າງ​ຄຳ​ສັ່ງ​ຂອງ​ກົມ​ການ​ເມືອງ​ຊຸດ​ທີ 11 ກ່ຽວ​ກັບ​ກອງ​ປະຊຸ​ມ​ໃຫຍ່​ຄະນະ​ພັກ​ທຸກ​ຂັ້ນມຸ່ງ​ໄປ​ເຖິງ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ 12 ຂອງ​ພັກ, ສະຫລຸບການ​ປະຕິ​ບັດ​ທົດ​ລອງ​ບໍ່​ຈັດ​ຕັ້ງ​ສະພາ​ປະຊາຊົນ​ຂັ້ນ​ເມືອງ; ​ແຜນ​ຮ່າງ​ກ່ຽວ​ກັບ​ການ​ຈັດ​ຕັ້ງ​ຄະນະ​ພັກ​ຕ່າງປະ​ເທດ.