(ທ່ານຮອງລັດຖະມົນຕີກະຊວງຖະແຫຼງຂ່າວ ແລະ ສື່ສານ ຫວຽດນາມ ຟ້າມແອັງຕວນ)

ວັນທີ 09 ທັນວາ, ກະຊວງຖະແຫຼງຂ່າວ ແລະ ສື່ສານ ຫວຽດນາມ ໄດ້ສົມທົບກັບກອງບັນຊາການທະຫານຊາຍແດນ ຈັດກອງປະຊຸມສະຫຼຸບໄລຍະ 10 ປີແຫ່ງການປະຕິບັດໂຄງການສົມທົບວຽກງານຖະແຫຼງຂ່າວ, ການສື່ສານ ແລະ ຖະແຫຼງຂ່າວຕ່າງປະເທດຢູ່ເຂດຊາຍແດນ, ທະເລ, ໝູ່ເກາະ ໄລຍະ 2011 – 2020, ລົງນາມໂຄງການສົມທົບວຽກງານໄລຍະ 2021 – 2030.

        ກອງປະຊຸມຕີລາຄາວ່າ, ໃນໄລຍະ 10 ປີແຫ່ງການຜັນຂະຫຍາຍໂຄງການສົມທົບກັນ, ວຽກງານໂຄສະນາຖະແຫຼງຂ່າວຕ່າງປະເທດຢູ່ເຂດຊາຍແດນ ໄດ້ສ້າງການຫັນປ່ຽນໃນສະຕິຄວາມຮັບຮູ້ ແລະ ການກະທຳຂອງທົ່ວສັງຄົມ ແລະ ໃນໝູ່ປະຊາຊົນທຸກຊັ້ນວັນນະຢູ່ພາຍໃນ ແລະ ຕ່າງປະເທດ ກ່ຽວກັບສະຕິຄວາມຮັບຮູ້ປະເທດຊາດ, ຫຼັກໝາຍຊາຍແດນແຫ່ງຊາດ, ປະກອບສ່ວນຢືນຢັນທີ່ຕັ້ງຂອງ ຫວຽດນາມ ໃນສະພາບ ຫວຽດນາມ ເຊື່ອມໂຍງເຂົ້າກັບສາກົນຢ່າງເລິກເຊິ່ງ, ກວ້າງຂວາງ ແລະ ຢ່າງແຮງກວ່າ.

        ໃນໄລຍະ 2021 – 2039, ສະພາບການໂລກ ແລະ ພາຍໃນປະເທດ ໄປຄຽງຄູ່ກັບຄວາມສະດວກພື້ນຖານນັ້ນ ຍັງມີຄວາມຫຍຸ້ງຍາກ, ພາລະກິດປົກປັກຮັກສາເຂດຊາຍແດນແຫ່ງຊາດຍັງປະສົບກັບສິ່ງທ້າທາຍຫຼາຍຢ່າງ. ທ່ານຮອງລັດຖະມົນຕີກະຊວງຖະແຫຼງຂ່າວ ແລະ ສື່ສານ ຫວຽດນາມ ຟ້າມແອັງຕວນ, ຊີ້ແຈ້ງວ່າ:

        “ບັນດາອິດທິກຳລັງທີ່ເປັນປໍລະປັກ, ພວກປະຕິການສືບຕໍ່ຍູ້ແຮງການເຄື່ອນໄຫວຕ້ານ, ມ້າງທຳລາຍ ຫວຽດນາມ ໃນຫຼາຍດ້ານ ແລະ ພວມສວຍໃຊ້ສະພາບການໂລກລະບາດໂຄວິດ-19 ເພື່ອໃຫ້ຂ່າວບໍ່ມີມູນຄວາມຈິງ, ສົ່ງຜົນສະທ້ອນເຖິງການປ້ອງກັນ, ຕ້ານໂລກລະບາດ. ເງືຶ່ອນໄຂເສດຖະກິດ, ວັດທະນະທຳ, ສັງຄົມຢູ່ເຂດຊາຍແດນຍັງປະສົບກັບຄວາມຫຍຸ້ງຍາກ… ທຸກສິ່ງດັ່ງກ່າວໄດ້ສົ່ງຜົນສະທ້ອນບໍ່ໜ້ອຍເຖິງພາລະກິດປົກປັກຮັກສາເຂດຊາຍແດນແຫ່ງຊາດ. ໃນສະພາບການໃໝ່ນັ້ນ, ຮຽກຮ້ອງຕ້ອງສືບຕໍ່ປ່ຽນແປງໃໝ່, ເພີ່ມທະວີ ແລະ ຍົກສູງປະສິດທິຜົນການເຄື່ອນໄຫວຖະແຫຼງຂ່າວຕ່າງປະເທດ, ພິເສດແມ່ນຢູ່ເຂດຊາຍແດນ ເພື່ອແນໃສ່ປະກອບສ່ວນຮັກສາຄວາມສະຖຽນລະພາບດ້ານການເມືອງ, ເອກະລາດ, ອະທິປະໄຕ, ເອກະພາບ, ຜືນແຜ່ນດິນອັນຄົບຖ້ວນຂອງປະເທດຊາດ.”

        ກອງປະຊຸມກໍ່ຮັບຮອງເອົາ ແລະ ລົງນາມໃນໂຄງການສົມທົບວຽກງານໄລຍະ 2021 – 2030 ດ້ວຍ 7 ເນື້ອໃນຈຸດສຸມ, ໃນນັ້ນມີເນື້ອໃນເພີ່ມທະວີການໂຄສະນາຖະແຫຼງຂ່າວຕ່າງປະເທດຢູ່ເຂດຊາຍແດນເປັນພາສາ ຫວຽດ ແລະ ພາສາຕ່າງປະເທດ, ຂົນຂວາຍມະຫາຊົນຢູ່ 2 ຝາກຊາຍແດນ, ຕໍ່ສູ້, ປະຕິເສດບັນດາຂໍ້ມູນຜິດພາດຂອງອິດທິກຳລັງທີ່ເປັນປໍລະປັກ, ປະຕິການ, ໂຄສະນາພາບພົດຂອງ ຫວຽດນາມ ໃຫ້ປະຊາຊົນບັນດາປະເທດທີ່ມີເສັ້ນຊາຍແດນຮ່ວມກັນ.