(vovworld) –  ວັນ​ທີ 27/2, ທ່ານ​ລັດຖະມົນຕີ​ວ່າການ​ກະຊວງ​ການ​ຕ່າງປະ​ເທດ ສິງ​ກາ​​ໂປ Vivian Balakrishnan ​ໄດ້​ຢັ້ງຢືນ​ດ້ວຍ​ຖານະ​ເປັນ​ປະ​ເທດ​ປະສານ​ງານ​ໃນ​ການ​ພົວພັນ ອາ​ຊຽນ - ຈີນ, ສິງ​ກາ​ໂປ ຈະ​ມານະ​ພະຍາຍາ​ມຊຸກຍູ້​ການ​ສ້າງ​ປະມວນ​ຂໍ້​ກຳນົດ​ກ່ຽວ​ກັບ​ການ​ປະພຶດ​ຢູ່​ທະ​ເລ​ຕາ​ເວັນ​ອອກ (COC) ລະຫວ່າງ ອາ​ຊຽນ ​ແລະ ຈີນ. ​ເມື່ອ​ຕອບ​ສຳ​ພາດຕໍ່​ນັກ​ຂ່າວ​ພາຍຫຼັງ​ກອງ​ປະຊຸມ​ວົງ​ແຄບ​ຂັ້ນ​ລັດຖະມົນຕີ​ວ່າການ​ກະຊວງ​ການ​ຕ່າງປະ​ເທດ ບັນດາ​ປະ​ເທດ ອາ​ຊຽນ ຢູ່ ວຽງ​ຈັນ, ປະ​ເທດ ລາວ, ທ່ານ Balakrishnan ​ໃຫ້​ຮູ້​ວ່າ: ລັດຖະມົນຕີ​ວ່າການ​ກະຊວງ​ການ​ຕ່າງປະ​ເທດ ບັນດາ​ປະ​ເທດ ອາ​ຊຽນ ​ໄດ້​ແບ່ງປັນ​ຄວາມ​ວິຕົກ​ວັງ​ວົນ​ກ່ຽວ​ກັບ​ບັນດາ​ການ​ຜັນ​​ແປ​ສັບສົນ​ໄລຍະ​ມໍ່​ໆ​ມາ​ນີ້ ​ແລະ ພວກ​ເກີດ​ຂຶ້ນ, ​ເຮັດ​ໃຫ້​ເພີ່ມ​ຄວາມ​ເຄັ່ງ​ຕຶງ, ນາບ​ຂູ່​​ສັນຕິພາບ, ຄວາມ​ໝັ້ນຄົງ ​ແລະ ສະຖຽນ​ລະ​ພາບ​ຢູ່​ພາກ​ພື້ນ. ບັນດາ​ລັດຖະມົນຕີ ​ໄດ້​ຢັ້ງຢືນ​ຄືນ​ໃໝ່​ຄວາມ​ສຳຄັນ​ຂອງ​ການ​ຮັກສາ​ສັນຕິພາບ, ສະຖຽນລະ​ພາບ, ຄວາມໝັ້ນຄົງ​ປອດ​ໄພ, ຄວາມ​ເສລີ​ໃນ​ການ​ເດີນທະ​ເລ ​ແລະ ການບິນ​ຢູ່​ທະ​ເລ​ຕາ​ເວັນ​ອອກ, ບໍ່​ມີ​ການ​ເຄື່ອນ​ໄຫວ​ດ້ານ​ການ​ທະຫານ, ລະງັບ​ໃຈ, ​ແກ້​ໄຂ​ບັນດາ​ການ​ຂັດ​ແຍ້​ງດ້ວຍ​ສັນຕິ​ວິທີ, ​ເໝາະ​ສົມ​ກັບ​ກົດໝາຍ​ສາກົນ, ​ໃນ​ນັ້ນ​ມີ​ສົນທິສັນຍາ ສປຊ ກ່ຽວ​ກັບ​ກົດໝາຍ​ວ່າ​ດ້ວຍ​ທະ​ເລ (UNCLOS) 1982 ​ແລະ ບັນລຸ​ຄວາມ​ຄືບ​ໜ້າ​ໃນ​ສະພາບ​ຕົວ​ຈິງ​ໃນ​ການ​ປະຕິບັດ​ຖະ​ແຫຼ​ງການ​ກ່ຽວ​ກັບ​ການ​ປະພຶດ​ຂອງ​ບັນດາ​ຝ່າຍ​ຢູ່​ທະ​ເລ​ຕາ​ເວັນ​ອອກ (DOC) ​ແລະ ກໍ່ສ້າງ COC. ທ່ານ Balakrishnan ​ໃຫ້​ຮູ້​ວ່າ: ຈະ​ນຳ​ບັນຫາ​ຊຸກ​ຍູ້ COC ​ປຶ​ກສາ​ຫາລື​ໃນ​ການ​ຢ້ຽມຢາມ ຈີນ ຈະ​ມາ​ເຖິງ​ຂອງ​ຕົນ, ພ້ອມ​ທັງ​ເນັ້ນ​ໜັກ​ວ່າ: ສິງ​ກາ​ໂປ ຈະ​ສຸມ​ໃສ່​​​ບັນ​ຫາ​ນີ້​ເພື່ອ​ແນ​ໃສ່​ຫລຸ​ດຜ່ອນ​ຄວາມ​ເຄັ່ງ​ຕຶງ ​ແລະ ສະກັດ​ກັ້ນ​ທຸກໆ​ອຸ​ບັດ​ຕິ​ເຫດ ​ແລະ ​ເຫດ​ຮ້າຍຢູ່ທະ​ເລ​ທີ່​ຈະເກີດ​ຂຶ້ນ.