( vovworld ) – ວັນທີ 4/4, ຢູ່ທີ່ຮ່າໂນ້ຍ, ໄດ້ດຳເນີນວາລະອັດກອງປະຊຸມທົ່ວປະເທດສະຫຼຸບສື່ຂ່າວກັບຕ່າງປະເທດ, ໂຄສະນາທະເລ, ໝູ່ເກາະ ແລະ ຂີດເສັ້ນຊາຍແດນປັກຫຼັກໝາຍຊາຍແດນປີ 2011; ຜັນຂະຫຍາຍໜ້າທີປີ 2012. ກ່າວຄຳເຫັນສະຫຼຸບກອງປະຊຸມ, ທ່ານ Dinh The Huynh ກຳມະການກົມການເມືອງ, ເລຂາສູນກາງພັກ, ຫົວໜ້າຄະນະໂຄສະນາສຶກສາສູນກາງ, ຫົວໜ້າຄະນະຊີ້ນຳວຽກງານສື່ຂ່າວກັບຕ່າງປະເທດ ໄດ້ເນັ້ນໜັກວ່າ: ກ່ອນອື່ນໝົດ, ໃນປີ 2012 ຕ້ອງຊາບຊຶມເນື້ອໃນຂອງກົມການເມືອງກ່ຽວກັບ “ ຍຸດທະສາດພັດທະນາສື່ຂ່າວກັບຕ່າງປະເທດໄລຍະ 2011 – 2020 ” ເຖິງບັນດາຄະນະ, ກະຊວງ, ຂະແໜງການ, ທ້ອງຖິ່ນ, ບັນດາອົງການສືມວນຊົນ ແລະ ບັນດາອົງການຕາງໜ້າຂອງຫວຽດນາມ ປະຈຳຕ່າງປະເທດ. ກ່ຽວກັບບັນດາເຫດການສຳຄັນຍິ່ງຂອງປະເທດຊາດ, ບັນດາການເຄື່ອນໄຫວສະເຫຼີມສະຫຼອງວັນສ້າງຕັ້ງສາຍພົວພັນທາງການທູດລະຫວ່າງຫວຽດນາມ ແລະ ປະເທດຕ່າງໆແມ່ນຕ້ອງສຸມໃສ່ໂຄສະນາຢ່າງເລິກເຊິ່ງ ແລະ ກວ້າງຂວາງ, ເພີ່ມທະວີການສົມທົບລະຫວ່າງບັນດາອົງການຖະແຫຼງຂ່າວ, ຍູ້ແຮງການແລກປ່ຽນ, ສົມທົບກັນລະຫວ່າງວຽກງານສື່ຂ່າວພາຍໃນປະເທດ ແລະ ສື່ຂ່າວກັບຕ່າງປະເທດ. ທ່ານ Dinh The Huynh ກໍຢືນຢັນວ່າ ຄວນສືບຕໍ່ເປີດກວ້າງສື່ຂ່າວກັບຕ່າງປະເທດ, ໂຄສະນາກ່ຽວກັບທະເລ, ໝູ່ເກາະ ແລະ ຂີດເສັ້ນຊາຍແດນ ແລະ ປັກລັກໝາຍຊາຍແດນທາງບົກ, ຄຽງຂ້າງນັ້ນເປີດກວ້າງການຮ່ວມມືກັບສຳນັກຂ່າວສານ, ສືມວນຊົນທີ່ມີຊື່ສຽງພາຍໃນພາກພື້ນ ແລະ ໃນໂລກ ແລະ ບັນດານັກຂ່າວຕ່າງປະເທດປະຈຳຫວຽດນາມ. ພ້ອມກັນນັ້ນ, ຄວນເອົາໃຈໃສ່ເປັນພິເສດເຖິງວຽກງານຕໍ່ສູ້ຕ້ານຖ້ອຍທຳນອງທີ່ເປັນປໍລະປັກ, ບັນດາຂໍ້ມູນຂ່າວ ແລະ ທັດສະນະຜິດພາດເສກສັນປັ້ນແຕ່ງແນວທາງແຜນນະໂຍບາຍ, ນະໂຍບາຍຂອງພັກ ແລະ ລັດຫວຽດນາມ, ໂດຍສະເພາະແມ່ນອະທິປະໄຕເສັ້ນຊາຍແດນແຫ່ງຊາດ, ກ່ຽວກັບບັນຫາທະເລຕາເວັນອອກ, ກ່ຽວກັບບັນດາບັນຫາຊົນເຜົ່າ, ປະຊາທິປະໄຕ, ສິດທິມະນຸດຄວນໄດ້ຮັບການເພີ່ມທະວີເພື່ອບໍ່ໃຫ້ຂາດຄວາມມີສະຖຽນລະພາບດ້ານການເມືອງພາຍໃນປະເທດ, ທີ່ສົ່ງຜົນສະທ້ອນບໍ່ດີເຖິງສາຍພົວພັນມິດຕະພາບລະຫວ່າງຫວຽດນາມ ກັບບັນດາປະເທດໃນໂລກ.