(vovworld) - ຄືດັ່ງທີ່ໄດ້ໃຫ້ຂ່າວໄປແລ້ວ, ວັນທີ 13/05, ກອງປະຊຸມຄັ້ງທີ 5 ກຸ່ມທີ່ປຶກສາສະມັດຊາລັດຖະສະພາລະຫວ່າງຊາດອາຊຽນ (AIPA Caucus 5) ສືບຕໍ່ດຳເນີນຢູ່ແຂວງ ເລີມດົງ. ກອງປະຊຸມໄດ້ມີການເຂົ້າຮ່ວມຂອງຜູ້ແທນກວ່າ 60 ທ່ານ ທີ່ມາຈາກ 9 ລັດຖະສະພາສະມາຊິກ AIPA, ຄະນະເລຂາ AIPA, ຄະນະເລຂາອາຊຽນ ເພື່ອພ້ອມກັນພິຈາລະນາໝາກຜົນແຫ່ງການປະຕິບັດບັນດາມະຕິເຊິ່ງໄດ້ຮັບການຮັບຮອງເອົາທີ່ກອງປະຊຸມໃຫຍ່ AIPA ຄັ້ງທີ 33, ພ້ອມທັງປຶກສາຫາລືກ່ຽວກັບ 2 ຂົງເຂດສຳຄັນຂອງພາກພື້ນ ແລະ ທົ່ວໂລກ ກ່ຽວກັບການເຕີບໂຕຂຽວ ແລະ ຫລຸກຜ່ອນຄວາມທຸກຍາກເພື່ອການພັດທະນາຢ່າງໝັ້ນຄົງ ແລະ ກໍໃນຂອບເຂດກອງປະຊຸມ, ບັນດາຜູ້ແທນຈະປຶກສາຫາລືເພື່ອສະເໜີຄວາມສາມາດເຮັດໃຫ້ກົດໝາຍຢູ່ພາກພື້ນທີ່ກ່ຽວຂ້ອງເຖິງບັນດາເນື້ອໃນນີ້ມີຄວາມກົມກຽວກັນ.
ກ່ອນໜ້ານັ້ນ, ຕອນຄໍ່າວັນທີ 12/05, ທ່ານນາງຮອງປະທານສະພາແຫ່ງຊາດ ຕ່ອງທິຟ໋ອງ ໄດ້ໃຫ້ການຕ້ອນຮັບຫົວໜ້າຄະນະຜູ້ແທນບັນດາປະເທດ, ບັນດາອົງການສາກົນທີ່ເຂົ້າຮ່ວມ AIPA Caucus 5. ຕາງໜ້າໃຫ້ສະພາແຫ່ງຊາດຫວຽດນາມ, ທ່ານນາງຮອງປະທານສະພາແຫ່ງຊາດ ຕ່ອງທິຟ໋ອງ ສະແດງຄວາມເຊື່ອໝັ້ນວ່າ ກອງປະຊຸມຄັ້ງນີ້ຈະໄດ້ຮັບການປະກອບສ່ວນຢ່າງມີປະສິດທິຜົນ, ຄວາມຮັບຜິດຊອບຂອງບັນດາຜູ້ແທນ ແລະ ຂໍ້ສະເໜີຢ່າງແທດຈິງເພື່ອໃຫ້ກອງປະຊຸມ AIPA ຄັ້ງທີ 34 ຈະມາເຖິງພິຈາລະນາ ແລະ ຕົກລົງ.