ການຢ້ຽມຢາມ ຍີ່ປຸ່ນ ດ້ວຍເນື້ອໃນດຳເນີນງານສຳຄັນຫລາຍຢ່າງ ໄດ້ປະກອບສ່ວນນຳການພົວພັນຄູ່ຮ່ວມມືຍຸດທະສາດລະຫວ່າງ ຫວຽດນາມ ແລະ ຍີ່ປຸ່ນ ພັດທະນາຢ່າງເລິກເຊິ່ງກ້ວາງຂວາງ, ຮອບດ້ານ ແລະ ມີປະສິດທິຜົນ.

ທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ ແລະ ທ່ານນາຍົກລັດຖະມົນຕີ ຍີ່ປຸ່ນ Shinzo Abe (ພາບ: VGP)

        ຫວຽດນາມ ແລະ ຍີ່ປຸ່ນ ໄດ້ສ້າງຕັ້ງການພົວພັນທາງການທູດໃນວັນທີ 21 ກັນຍາ ປີ 1973.  45 ປີຜ່ານພົ້ນໄປ, ຫວຽດນາມ ແລະ ຍີ່ປຸ່ນ ໄດ້ກາຍເປັນຄູ່ຮ່ວມມືຂອງກັນນັບມື້ນັບສຳຄັນໃນຫລາຍຂົງເຂດ. ພິເສດແມ່ນ ນັບແຕ່ເມື່ອ 2 ປະເທດຍົກລະດັບການພົວພັນຂຶ້ນເປັນ “ຄູ່ຮ່ວມມືຍຸດທະສາດເລິກເຊິ່ງກ້ວາງຂວາງເພື່ອສັນຕິພາບ ແລະ ຈະເລີນຮຸ່ງເຮືອງຢູ່ ອາຊີ” ໃນເດືອນ ມີນາ 2014, ການພົວພັນລະຫວ່າງ ຫວຽດນາມ ແລະ ຍີ່ປຸ່ນ ໄດ້ມີບາດກ້າວພັດທະນາຢ່າງແຮງ, ຮອບດ້ານ ແລະ ແທດຈິງ.

ການພົວພັນຮອບດ້ານ, ແທດຈິງ

ກ່ຽວກັບດ້ານການເມືອງ, ການພົວພັນລະຫວ່າງ 2 ປະເທດ ພວມຢູ່ໃນໄລຍະດີທີ່ສຸດໃນປະຫວັດສາດນັບແຕ່ເມື່ອສ້າງຕັ້ງການພົວພັນທາງການທູດ. ການນຳຂັ້ນສູງ 2 ປະເທດໄດ້ຮັກສາບັນດາການຢ້ຽມຢາມ ແລະ ການພົບປະຢູ່ບັນດາເວທີປາໄສສາກົນ ແລະ ພາກພື້ນເປັນປະຈຳ. ພິເສດ, ປີ 2017 ເປັນຄັ້ງທຳອິດ ທີ່ໄດ້ດຳເນີນ ການຢ້ຽມຢາມຂັ້ນສູງ 5 ຄັ້ງ, ໃນນັ້ນ ຂີດໝາຍປະຫວັດສາດແມ່ນການຢ້ຽມຢາມ ຫວຽດນາມ ຂອງພະເຈົ້າຈັກກະພັດ ແລະ ພະມະເຫສີ ຍີ່ປຸ່ນ; ທ່ານນາຍົກລັດຖະມົນຕີ ຍີ່ປຸ່ນ Shinzo Abe ມາຢ້ຽມຢາມ ຫວຽດນາມ 2 ຄັ້ງ; ທ່ານປະທານສະພາຕ່ຳ ຍີ່ປຸ່ນ ກໍ່ມາຢ້ຽມຢາມ ຫວຽດນາມ ພາຍຫລັງ 15 ປີ. ປີ 2017 ໄດ້ສ້າງຂີດໝາຍບາດກ້າວຫັນປ່ຽນໃໝ່ໃນການພົວພັນລະຫວ່າງ 2 ຝ່າຍໃນການຢ້ຽມຢາມ ຍີ່ປຸ່ນ ຂອງທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ ເມື່ອເດືອນ ມິຖຸນາ 2017 ຢ່າງເປັນທາງການ, 2 ປະເທດໄດ້ອອກຖະແຫຼງການຮ່ວມກ່ຽວກັບເລື່ອງເຮັດໃຫ້ການພົວພັນຄູ່ຮ່ວມມືຍຸດທະສາດລະຫວ່າງ ຫວຽດນາມ ແລະ ຍີ່ປຸ່ນ ເລິກເຊິ່ງຍິ່ງຂຶ້ນ.

ກ່ຽວກັບດ້ານເສດຖະກິດ, ຍີ່ປຸ່ນ ສືບຕໍ່ແມ່ນຄູ່ຮ່ວມມືເສດຖະກິດສຳຄັນແຖວໜ້າຂອງ ຫວຽດນາມ ແລະ ແມ່ນປະເທດ G7 ທຳອິດທີ່ຮັບຮອງເອົາຖານະດ້ານເສດຖະກິດການຕະຫລາດຂອງ ຫວຽດນາມ ເມື່ອເດືອນ ຕຸລາ 2011. ມາຮອດປະຈຸບັນ, ຍີ່ປຸ່ນ ໄດ້ກາຍເປັນນັກລົງທຶນຕ່າງປະເທດໃຫຍ່ອັນດັບທີ 2, ເປັນຄູ່ຮ່ວມມືດ້ານການຄ້າໃຫຍ່ອັນດັບທີ 4 ແລະ ເປັນຄູ່ຮ່ວມມືໃຫຍ່ອັນດັບທີ 3 ກ່ຽວກັບການທ່ອງທ່ຽວຂອງ ຫວຽດນາມ. ປີ 2017, ຍອດວົງເງິນການຄ້າລະຫວ່າງ 2 ປະເທດບັນລຸກ່ວາ 33 ຕື້ USD. ໃນນັ້ນ ວົງເງິນສົ່ງອອກຂອງ ຫວຽດນາມ ໄປຍັງ ຍີ່ປຸ່ນ ບັນລຸເກືອບ 17 ຕື້ USD. ໄລ່ສະເພາະແຕ່ 3 ເດືອນຕົ້ນປີ 2018, ຍອດວົງເງິນການຄ້າລະຫວ່າງ 2 ປະເທດບັນລຸໄດ້ 8,7 ຕື້ USD, ເພີ່ມຂຶ້ນເກືອບ 16% ເມື່ອທຽບໃສ່ໄລຍະດຽວກັນຂອງປີກາຍ. ໄລ່ຮອດທ້າຍເດືອນ ສິງຫາ 2018, ຍີ່ປຸ່ນ ມີໂຄງການ FDI ຍັງມີຜົນສັກສິດໃຊ້ຢູ່ ຫວຽດນາມ 3.865 ໂຄງການ ດ້ວຍຍອດເງິນລົງທຶນຈົດທະບຽນ 55,838 ຕື້ USD, ຢືນອັນດັບທີ 2 ໃນຈຳນວນ 116 ປະເທດ ແລະ ເຂດແຄ້ວນລົງທຶນເຂົ້າ ຫວຽດນາມ. ຍີ່ປຸ່ນ ແມ່ນປະເທດຊ່ວຍເຫຼືອທຶນພັດທະນາຢ່າງເປັນທາງການ (ODA) ໃຫຍ່ສຸດໃຫ້ ຫວຽດນາມ, ກວມເອົາປະມານ 30% ຍອດທຶນ ODA ທີ່ໃຫ້ຄຳໝັ້ນສັນຍາຂອງປະຊາຄົມສາກົນສຳລັບ ຫວຽດນາມ.

ກ່ຽວກັບຂົງເຂດປ້ອງກັນຊາດ, ປ້ອງກັນຄວາມສະຫງົບ, ວັດທະນະທຳ, ການສຶກສາ, ບຳລຸງສ້າງ, ການທ່ອງທ່ຽວ, ການພົວພັນແລກປ່ຽນປະຊາຊົນກໍ່ໄດ້ຮັບການປັບປຸງ ແລະ ເປີດກ້ວາງຢ່າງບໍ່ຢຸດຢັ້ງ. ໃນປີ 2017, ແຂກທ່ອງທ່ຽວ ຍີ່ປຸ່ນ ມາທ່ຽວ ຢູ່ ຫວຽດນາມ ເກືອບ 800.000 ເທື່ອຄົນ, ໃນຂະນະນັ້ນ ຈຳນວນແຂກທ່ອງທ່ຽວ ຫວຽດນາມ ໄປທ່ຽວຢູ່ ຍີ່ປຸ່ນ ໄດ້ລື່ນກາຍຕົວເລກ 300.000 ເທື່ອຄົນ. ການຮ່ວມມື ລະຫວ່າງບັນດາທ້ອງຖິ່ນຂອງ 2 ປະເທດ ຫວຽດນາມ ແລະ ຍີ່ປຸ່ນ ກໍ່ໄດ້ຊຸກຍູ້ຢ່າງແຮງ.

ໃນຊຸມປີຜ່ານມາ, ຫວຽດນາມ ແລະ ຍີ່ປຸ່ນ ກໍ່ຮ່ວມມືກັນຢູ່ບັນດາເວທີປາໄສສາກົນ ແລະ ພາກພື້ນຢ່າງແໜ້ນແຟ້ນ ແລະ ມີປະສິດທິຜົນຄື: ສະຫະປະຊາຊາດ, ບັນດາກອງປະຊຸມ ASEAN+, APEC, ASEM…ພິເສດ, 2 ປະເທດໄດ້ຕັ້ງໜ້າຮ່ວມມືເຂົ້າໃນຜົນສຳເລັດຂອງປີ APEC ຫວຽດນາມ 2017, ກອງປະຊຸມສຸດຍອດ APEC ຄັ້ງທີ 25 ຢູ່ ດ່າໜັງ ແລະ ຊຸກຍູ້ການເຈລະຈາ, ລົງນາມໃນສັນຍາຄູ່ຮ່ວມມືຮອບດ້ານ ແລະ ກ້າວໜ້າຂ້າມປາຊີຟິກ (CPTPP).

ເຮັດໃຫ້ການພົວພັນຄູ່ຮ່ວມມືຍຸດທະສາດເລິກເຊິ່ງກ່ວາ

        ໃນຂອບເຂດການຢ້ຽມຢາມ ຍີ່ປຸ່ນ, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ມີການພົບປະເຈລະຈາກັບທ່ານນາຍົກລັດຖະມົນຕີ ຍີ່ປຸ່ນ Shinzo Abe, ເຂົ້າຢ້ຽມຄຳນັບພະເຈົ້າຈັກກະພັດ ຍີ່ປຸ່ນ, ພົບປະກັບບັນດາການນຳສະພາແຫ່ງຊາດ ຍີ່ປຸ່ນ ແລະ ປະທານສຳພັນທະມິດສະມາຊິກລັດຖະສະພາມິດຕະພາບ ຍີ່ປຸ່ນ - ຫວຽດນາມ. ທ່ານນາຍົກລັດຖະມົນຕີ ຫງວຽນຊວນຟຸກ ກໍ່ມີບັນດາການພົບປະ, ເຮັດວຽກກັບບັນດາສະຫະສະມາຄົມວິສາຫະກິດ ແລະ ນັກລົງທຶນແຖວໜ້າຂອງ ຍີ່ປຸ່ນ. ທີ່ການພົບປະເຈລະຈາໃນວັນທີ 08 ຕຸລາ, ທ່ານນາຍົກລັດຖະມົນຕີ ຫງວຽນຊວນຟຸກ ແລະ ທ່ານນາຍົກລັດຖະມົນຕີ Shinzo Abe ໄດ້ເຫັນດີເປັນເອກະພາບ ສືບຕໍ່ເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງລະຫວ່າງ 2 ປະເທດ ໂດຍຜ່ານເລື່ອງຮັກສາບັນດາການຢ້ຽມຢາມ ແລະ ການພົບປະຂັ້ນສູງ; ຊຸກຍູ້ການຮ່ວມມືດ້ານເສດຖະກິດ, ການປ້ອງກັນຊາດ, ປ້ອງກັນຄວາມສະຫງົບຢ່າງມີປະສິດທິຜົນ ແລະ ແທດຈິງ, ພິເສດແມ່ນໃນບັນດາຂົງເຂດກໍ່ສ້າງແຫຼ່ງຊັບພະຍາກອນມະນຸດ, ຖ່າຍທອດເຕັກໂນໂລຊີ, ອຸປະກອນພາຫະນະປ້ອງກັນຊາດ, ແບ່ງປັນບົດຮຽນກ່ຽວກັບການສ້າງນະໂຍບາຍພັດທະນາເສດຖະກິດທະເລ ຫວຽດນາມ ແບບຍືນຍົງ…ທ່ານນາຍົກລັດຖະມົນຕີ ຫງວຽນຊວນຟຸກ ກໍ່ສະເໜີ ຍີ່ປຸ່ນ ພິຈາລະນາຍົກເວັ້ນອາກອນລາຍຮັບ ແລະ ອາກອນຄ່າພັກເຊົາໃຫ້ແກ່ນັກຮຽນ ຫວຽດນາມ ຢູ່ ຍີ່ປຸ່ນ ແລະ ສ້າງຄວາມສະດວກໃນການອອກວິຊາເຂົ້າເມືອງໃຫ້ແກ່ນັກທ່ອງທ່ຽວ ຫວຽດນາມ ຕື່ມອີກ. ສ່ວນທ່ານນາຍົກລັດຖະມົນຕີ Shinzo Abe ໄດ້ຢືນຢັນວ່າ ລັດຖະບານ ຍີ່ປຸ່ນ ຖືເປັນສຳຄັນການພັດທະນາແບບຍືນຍົງຂອງ ຫວຽດນາມ ແລະ ຈະມານະພະຍາຍາມເພື່ອການພັດທະນາຂອງ ຫວຽດນາມ ໂດຍຜ່ານການຊຸກຍູ້ບັນດາໂຄງການ ODA ແລະ ການລົງທຶນຂອງວິສາຫະກິດ ຍີ່ປຸ່ນ. ນາຍົກລັດຖະມົນຕີ 2 ທ່ານລ້ວນແຕ່ເຫັນດີເປັນເອກະພາບ ພ້ອມກັນຊຸກຍູ້ການແລກປ່ຽນໜູນຊ່ວຍ ຫວຽດນາມ ສ້າງລັດຖະບານເອເລັກໂຕນິກ, ປະຕິຮູບດ້ານການບໍລິຫານ, ຍົກສູງສະມັດຕະພາບການອອກແຮງງານ, ປະກອບສ່ວນກໍ່ສ້າງສະພາບແວດລ້ອມແຫ່ງການລົງທຶນສະດວກ ເພື່ອແນໃສ່ດຶງດູດການລົງທຶນໂດຍກົງຈາກວິສາຫະກິດ ຍີ່ປຸ່ນ ເຂົ້າມາລົງທຶນຢູ່ ຫວຽດນາມ ໃຫ້ຫລາຍກ່ວາອີກ.

        ດ້ວຍບັນດາໝາກຜົນພົ້ນເດັ່ນ, ການຢ້ຽມຢາມ ຍີ່ປຸ່ນ ຂອງທ່ານນາຍົກລັດຖະມົນຕີ ຫງວຽນຊວນຟຸກ ແລະ ພັນລະຍາ ໄດ້ສ້າງຂີດໝາຍໃໝ່, ນຳການພົວພັນຄູ່ຮ່ວມມືຍຸດທະສາດເລິກເຊິ່ງກ້ວາງຂວາງລະຫວ່າງ ຫວຽດນາມ - ຍີ່ປຸ່ນ ກ້າວເຂົ້າສູ່ໄລຍະພັດທະນາຮອບດ້ານ, ແທດຈິງກ່ວາ ./.