ສືບຕໍ່ຊຸກຍູ້ການພົວພັນຮ່ວມມືປ້ອງກັນປະເທດຫວຽດນາມ-ອາເມລິກາ
ທ່ານພົນໂທ ຫງວຽນຈີ໋ວີ້ງ, ຮອງລັດຖະມົນຕີກະຊວງປ້ອງກັນປະເທດ ໄດ້ໃຫ້ການຕ້ອນຮັບທ່ານພົນເຮືອເອກ Samuel J. Locklear
(ພາບ: Trọng Đức /TTXVN)
(vovworld) – ທີ່ສຳນັກງານກະຊວງປ້ອງກັນປະເທດ, ຕອນເຊົ້າວັນທີ 10/12, ທ່ານພົນໂທ ຫງວຽນຈີ໋ວີ້ງ, ຮອງລັດຖະມົນຕີກະຊວງປ້ອງກັນປະເທດ ໄດ້ໃຫ້ການຕ້ອນຮັບທ່ານພົນເຮືອເອກ Samuel J. Locklear ແລະ ບັນດາສະມາຊິກໃນກອງບັນຊາການ ປາຊີຟິກ ອາເມລິກາ, ທີ່ພວມມີການຢ້ຽມຢາມ ແລະ ເຮັດວຽກຢູ່ ຫວຽດນາມ. ທ່ານພົນໂທ ຫງວຽນຈີ໋ວີ້ງ ເນັ້ນໜັກວ່າ: ກອງບັນຊາການປາຊີຟິກ ສວມບົດບາດສຳຄັນໃນການພົວພັນຄູ່ຮ່ວມມືຮອບດ້ານລະຫວ່າງ ຫວຽດນາມ ແລະ ອາເມລິກາ ເວົ້າລວມ ແລະ ການພົວພັນຮ່ວມມືປ້ອງກັນປະເທດລະຫວ່າງ 2 ປະເທດເວົ້າສະເພາະ. ການຢ້ຽມຢາມ ຫວຽດນາມ ຂອງທ່ານ ພົນເຮືອເອກ Samuel J. Locklear ຄັ້ງນີ້ ຈະປະກອບສ່ວນຕັ້ງໜ້າເຂົ້າໃນການເພີ່ມທະວີການພົວພັນຮ່ວມມືມິດຕະພາບ, ຄວາມເຂົ້າອົກເຂົ້າໃຈເຊິ່ງກັນ ແລະ ກັນລະຫວ່າງກອງທັບ 2 ປະເທດ. ສະແດງຄວາມປິຕິຊົມຊື່ນຕໍ່ບັນດາບາດກ້າວພັດທະນາອັນດີງາມໃນການພົວພັນປ້ອງກັນປະເທດ 2 ຝ່າຍ ຫວຽດນາມ - ອາເມລິກາ, ທ່ານພົນເຮືອເອກ Samuel J. Locklear ກໍ່ຢັງຢືນວ່າ: ກອງບັນຊາການ ປາຊີຟິກ ກຽມພ້ອມເປັນເຈົ້າການໃນການຜັນຂະຫຍາຍ, ເປີດກ້ວາງການຮ່ວມມືຕາມເນື້ອໃນທີ່ໄດ້ຮັບຄວາມເຫັນດີເຫັນພ້ອມຈາກ 2 ຝ່າຍ ທີ່ການເຈລະຈານະໂຍບາຍປ້ອງກັນປະເທດ ຫວຽດນາມ - ອາເມລິກາ ເຊິ່ງຈັດຂຶ້ນຢູ່ ອາເມລິກາ ໃນເດືອນ 10 ຜ່ານມາ. ກ່ອນໜ້ານັ້ນ, ພົນຕີ ຫວໍວັນຕ໋ວນ, ຮອງຫົວໜ້າເສນາທິການໃຫຍ່ ກອງທັບປະຊາຊົນ ຫວຽດນາມ, ໄດ້ເຈລະຈາ ກັບ ພົນເຮືອເອກ Samuel J. Locklear ກ່ຽວກັບການຮ່ວມມືປ້ອງກັນປະເທດ 2 ຝ່າຍລະຫວ່າງ ຫວຽດນາມ ແລະ ອາເມລິກາ ໃນໄລຍະຜ່ານມາ ແລະ ແລກປ່ຽນບາງບັນຫາກ່ຽວຂ້ອງເຖິງສະພາບການພາກພື້ນ ແລະ ຢູ່ໃນໂລກ.