ສືບຕໍ່ວາລະປະຊຸມຄັ້ງ ທີ 25 ຂອງຄະນະປະຈຳ ສະພາແຫ່ງຊາດ
(ພາບ: vov)
(vovworld)- ຕອນເຊົ້າວັນທີ 21/2, ຄະນະປະຈຳສະພາແຫ່ງຊາດໄດ້ໃຫ້ຄຳເຫັນກ່ຽວກັບຮ່າງກົດໝາຍສະບັບປັບປຸງ ແລະ ເພີ່ມເຕີມບາງຂໍ້ມາດຕາຂອງກົດໝາຍວ່າດ້ວຍການບິນພົນລະເຮືອນຫວຽດນາມ ແລະ ປຶກສາຫາລືກ່ຽວກັບການລາຍງານຕີລາຄາ, ຖອດຖອນບົດຮຽນໃນການຜັນຂະຫຍາຍປະຕິບັດມະຕິກ່ຽວກັບການລົງຄະແນນສຽງ, ປ່ອນບັດໄວ້ວາງໃຈສຳລັບຜູ້ດຳລົງຕຳແໜ່ງໂດຍສະພາແຫ່ງຊາດ, ສະພາ ປຊຊ ເລືອກຕັ້ງ ຫລືໃຫ້ສັດຕະຍາບັນ. ທ່ານປະທານສະພາແຫ່ງຊາດຫງວຽນຊິງຮຸ່ງ ເປັນປະທານວາລະປະຊຸມ.
ໃນການໃຫ້ຄຳເຫັນໃສ່ຮ່າງກົດໝາຍສະບັບປັບປຸງ ແລະ ເພີ່ມເຕີມບາງຂໍ້ມາດຕາຂອງກົດໝາຍວ່າດ້ວຍການບິນພົນລະເຮືອນຫວຽດນາມ, ຜູ້ແທນຫຼາຍທ່ານຖືວ່າ, ການປັບປຸງ, ເພີ່ມເຕີມກົດໝາຍສະບັບນີ້ຕ້ອງບັນລຸໄດ້ຈຸດໝາຍເພີ່ມທະວີຜົນສັກສິດຂອງວຽກງານຄຸ້ມຄອງລັດ, ຍົກສູງປະສິດທິຜົນການດຳເນີນທຸລະກິດຂອງວິສາຫະກິດການບິນ ແລະ ຮັບປະກັນຜົນປະໂຫຍດຂອງຜູ້ໂດຍສານ. ກ່ຽວກັບຄວາມໝັ້ນຄົງການບິນ, ທ່ານກຊໍເຟືອກ ປະທານສະພາຊົນເຜົ່າຂອງສະພາແຫ່ງຊາດຍົກຄຳເຫັນວ່າ:
“ໃນການເຄື່ອນໄຫວຂອງສະໜາມບິນຈະມີຫຼາຍເນື້ອໃນ ແຕ່ການຮັບປະກັນສຸດທ້າຍແມ່ນປະສິດທິຜົນດ້ານເສດຖະກິດ ແລະ ຄວາມສະຫງົບປອດໄພ. ການຮັບປະກັນຄວາມສະຫງົບປອດໄພຕ້ອງແມ່ນລັດຮັບປະກັນ, ສະນັ້ນ, ຮຽກຮ້ອງໃຫ້ຄວາມຮັບຜິດຊອບສູງທີ່ສຸດ. ສະໜາມບິນ ແລະ ການເຄືອ່ນໄຫວບໍ່ພຽງແຕ່ມີການ ກ່ຽວຂ້ອງເຖິງເສດຖະກິດ, ການທູດເທົ່ານັ້ນ, ຫາກຍັງກ່ຽວຂ້ອງໂດຍກົງເຖິງບັນດາການປ້ອງກັນຊາດປ້ອງກັນຄວາມສະຫງົບແຫ່ງຊາດອີກດ້ວຍ“./.