ທ່ານລັດຖະມົນຕີກະຊວງການຕ່າງປະເທດ ຫວຽດນາມ ບຸ່ຍແທງເຊີນ (ພາບ: TTXVN)

ເນື່ອງໃນໂອກາດສະເຫຼີມສະຫຼອງວັນສ້າງຕັ້ງການພົວພັນທາງການທູດ ລະຫວ່າງ ຫວຽດນາມ ແລະ ສາທາລະນະລັດ Costa Rica (24/4/1976 – 24/04/2021), ຕອນເຊົ້າວັນທີ 29 ເມສາ 2021, ທ່ານລັດຖະມົນຕີກະຊວງການຕ່າງປະເທດ ຫວຽດນາມ ບຸ່ຍແທງເຊີນ ໄດ້ໂອ້ລົມສົນທະນາແບບທາງໄກກັບ ທ່ານ Rodolfo Solano Quiros ລັດຖະມົນຕີກະຊວງການຕ່າງປະເທດ ແລະ ຄວາມເຊື່ອຖື ແຫ່ງ ສາທາລະນະລັດ Costa Rica ເພື່ອແລກປ່ຽນກ່ຽວກັບບັນດາທິດທາງ ແລະ ມາດຕະການລະອຽດ ແນໃສ່ເພີ່ມທະວີການພົວພັນມິດຕະພາບ ແລະ ການຮ່ວມມືລະຫວ່າງສອງປະເທດ.

        ສອງຝ່າຍເຫັນດີເປັນເອກະພາບຊຸກຍູ້ການພົວພັນແລກປ່ຽນຄະນະຜູ້ແທນທຸກຂັ້ນ, ຮັກສາບັນດາກົນໄກປຶກສາຫາລືການເມືອງຂັ້ນຮອງລັດຖະມົນຕີການຕ່າງປະເທດ ລະຫວ່າງກະຊວງສອງປະເທດເປັນປະຈຳ ແລະ ຂະຫຍັນຂັນເຄື່ອນ. ລັດຖະມົນຕີສອງປະເທດກໍໄດ້ແລກປ່ຽນກ່ຽວກັບຄວາມສາມາດເຈລະຈາບັນດາຂໍ້ຕົກລົງຮ່ວມມືສອງຝ່າຍ, ໂດຍສະເພາະແມ່ນໃນບັນດາຂົງເຂດເສດຖະກິດ, ການຄ້າ ແລະ ການລົງທຶນ, ພິຈາລະນາຄວາມເປັນໄປໄດ້ໃນການເປີດກວ້າງການຮ່ວມມືສອງຝ່າຍໃນບາງຂົງເຂດ ເປັນຕົ້ນແມ່ນຮັບມືກັບການປ່ຽນແປງຂອງດິນຟ້າອາກາດ, ກະສິກຳ, ພະລັງງານຂຽວ, ການເດີນເຮືອ, ສົ່ງເສີມການທ່ອງທ່ຽວ ແລະ ການພົບປະແລກປ່ຽນປະຊາຊົນ.

        ກ່ຽວກັບບັນດາບັນຫາສາກົນ ແລະ ພາກພື້ນ, ລັດຖະມົນຕີສອງທ່ານໄດ້ເຫັນດີສືບຕໍ່ສົມທົບກັນ ແລະ ສະໜັບສະໜູນເຊິ່ງກັນແລະກັນ ໃນ ສປຊ ກໍຄືບັນດາເວທີປາໄສຫຼາຍຝ່າຍ ແລະ ລະຫວ່າງພາກພື້ນ, ໃນນັ້ນ ມີ ເວທີປາໄສຮ່ວມມື ອາຊີຕາເວັນອອກ - ອາເມລິກາ ລາຕິນ (FEALAC).