(vovworld) – ພິທີສະເຫຼີມສະຫຼອງ 60 ປີແຫ່ງວັນມູນເຊື້ອຂະແໜງໄຟຟ້າຫວຽດນາມ, ດຳເນີນໄປໃນຕອນເຊົ້າວັນທີ 21/12, ຢູ່ຮ່າໂນ້ຍ, ດ້ວຍການເຂົ້າຮ່ວມຂອງທ່ານປະທານສະພາແຫ່ງຊາດ ຫງວຽນຊິງຮຸ່ງ. ໂດຍຮັບຮູ້ບັນດາການປະກອບສ່ວນອັນໃຫຍ່ຫຼວງຂອງຂະແໜງໄຟຟ້າ ທີ່ມີຕໍ່ພາລະກິດປະຕິວັດ ກໍ່ຄືວິວັດທະນາການສ້າງສາ ແລະ ປົກປັກຮັກສາປະເທດຊາດ, ຕາງໜ້າໃຫ້ການນຳພັກ, ລັດ, ທ່ານປະທານສະພາແຫ່ງຊາດ ຫງວຽນຊິງຮຸ່ງ ໄດ້ມອບຫຼຽນໄຊໂຮ່ຈິມິນ ຄັ້ງທີ 2 ໃຫ້ກຸ່ມບໍລິສັດໄຟຟ້າຫວຽດນາມ.
ກ່າວຄຳເຫັນທີ່ພິທີ, ທ່ານຮອງນາຍົກລັດຖະມົນຕີ ຮ່ວາງຈູງຫາຍ ຢືນຢັນວ່າ, ຂະແໜງໄຟຟ້າຕ້ອງໄປກ່ອນບາດໜຶ່ງ ເພື່ອຕອບສະໜອງຄວາມຕ້ອງການພັດທະນາຂອງປະເທດຊາດ, ຍົກສູງຄຸນນະພາບໄຟຟ້າພະລັງງານ ແລະ ຄຸນນະພາບບັນດາການບໍລິການສະໜອງໄຟຟ້າໃຫ້ສັງຄົມ, ຍູ້ແຮງບັນດາການນຳໃຊ້ໄຟຟ້າຢ່າງມີປະສິດທິຜົນ, ປະຢັດແຫຼ່ງວັດຖຸ, ຊັບພະຍາກອນຂອງປະເທດຊາດ. ບົນຈິດໃນດັ່ງກ່າວ, ທ່ານຮອງນາຍົກລັດຖະມົນຕີ ຮຽກຮ້ອງໃຫ້ກຸ່ມບໍລິສັດໄຟຟ້າຫວຽດນາມ ເພີ່ມທະວີການລົງທຶນ, ພັດທະນາແຫຼ່ງໄຟຟ້າ ແລະ ລະບົບໄຟຟ້າ; ປະຕິບັດການຂາຍໄຟຟ້າລາຄາຕາມເສດຖະກິດການຕະຫຼາດແຕ່ມີການດັດສົມຂອງລັດ; ປະຕິບັດບັນດາມາດຕະການສັງລວມເພື່ອຍົກສູງຄຸນນະພາບແຫຼ່ງຊັບພະຍາກອນມະນຸດ ແລະ ສະມັດຕະພາບແຮງງານໃນຂະແໜງໄຟຟ້າ.
ຜ່ານໄລຍະ 60 ປີແຫ່ງການສ້າງຕັ້ງ ແລະ ເຕີບໃຫຍ່, ຂະແໜງໄຟຟ້າຫວຽດນາມ ພວມຍື່ນອັນດັບທີ 3 ໃນພາກພື້ນອາຊີຕາເວັນອອກສ່ຽງໃຕ້ ແລະ ຍື່ນອັນດັບທີ 31 ໃນໂລກກ່ຽວກັບຂອບຂະໜາດແຫຼ່ງໄຟຟ້າ.