(VOVWORLD) -ຕອນເຊົ້າວັນທີ 8 ພະຈິກ, ສະຫະພັນບັນດາອົງການມິດຕະພາບນະຄອນໂຮ່ຈີມິນ (HUFO) ແລະ ສະມາຄົມມິດຕະພາບຫວຽດນາມ - ກໍາປູເຈຍ ນະຄອນໂຮ່ຈີມິນ ໄດ້ຈັດຕັ້ງພິທີສະເຫຼີມສະຫຼອງວັນຊາດແຫ່ງລາຊະອານາຈັກກໍາປູເຈຍ ຄົບຮອບ 65 ປີ (9 ພະຈິກ 1953 – 9 ພະຈິກ 2018).
ເຂົ້າຮ່ວມພິທີມີທ່ານ Im Hen, ຫົວໜ້າສະຖານກົງສູນໃຫຍ່ລາຊະອານາຈັກກໍາປູເຈຍ ຢູ່ນະຄອນໂຮ່ຈີມິນ; ແລະຜູ້ຕາງໜ້າບາງຄະນະ, ຂະແໜງການ, ອົງການຈັດຕັ້ງມະຫາຊົນຂອງນະຄອນໂຮ່ຈີມິນ, ບັນດາອະດີດນັກຊ່ຽວຊານ, ທະຫານອາສາສະໝັກຫວຽດນາມ ທີ່ເຄີຍຕໍ່ສູ້, ປະຕິບັດງານຢູ່ກໍາປູເຈຍ ແລະ ຕາງໜ້າປະຊາຄົມຊາວກໍາປູເຈຍ, ນັກສຶກສາກໍາປູເຈຍທີ່ ພວມເຮັດວຽກ, ຮໍ່າຮຽນຢູ່ນະຄອນໂຮ່ຈີມິນ.
 ທ່ານ Im Hen, ຫົວໜ້າສະຖານກົງສູນໃຫຍ່ລາຊະອານາຈັກກໍາປູເຈຍ ຢູ່ນະຄອນໂຮ່ຈີມິນກ່າວຄໍາເຫັນທີ່ພິທີ (ພາບ:Xuan Khu/TTXVN) |
ກ່າວຄໍາເຫັນທີ່ພິທີ, ທ່ານ ເຈືອງມິນຍຶດ ປະທານສະມາຄົມມິດຕະພາບຫວຽດນາມ - ກໍາປູເຈຍ ນະຄອນໂຮ່ຈີມິນ ຊີ້ແຈ້ງວ່າ ປັດຈຸບັນ, ການນໍາ, ປະຊາຊົນສອງປະເທດພວມສູ້ຊົນເພື່ອແນໃສ່ປັບປຸງ ແລະ ເພີ່ມທະວີນໍ້າໃຈສາມັກຄີ, ມິດຕະພາບ, ພ້ອມກັນຮ່ວມມືສ້າງສາ, ພັດທະນາເສດຖະກິດ-ສັງຄົມ; ສົມທົບກັນຢ່າງແໜ້ນແຟ້ນຢູ່ບັນດາເວທີປາໄສສາກົນ ເພື່ອແນໃສ່ນໍາການພົວພັນມິດຕະພາບທີ່ເປັນມູນເຊື້ອລະຫວ່າງສອງປະເທດຂຶ້ນສູ່ລະດັບສູງໃໝ່, ເພື່ອຜົນປະໂຫຍດຂອງປະຊາຊົນສອງປະເທດ ແລະ ປະກອບສ່ວນຢ່າງຕັ້ງໜ້າໃຫ້ສັນຕິພາບ, ສະຖຽນລະພາບ ແລະ ການຮ່ວມມືພັດທະນາໃນພາກພື້ນ.
ທີ່ພິທີ, ທ່ານ Im Hen ໄດ້ສະແດງຄວາມຂອບອົກຂອບໃຈ ຕໍ່ສະຫະພັນບັນດາອົງການມິດຕະພາບນະຄອນ ໂຮ່ຈີມິນ ໄດ້ຈັດພິທີສະເຫຼີມສະຫຼອງວັນຊາດແຫ່ງລາຊະອານາຈັກ ກໍາປູເຈຍ ຂຶ້ນຢ່າງສົມກຽດ, ເຊິ່ງເປັນຂີດໝາຍທີ່ມີຄວາມໝາຍອັນໃຫຍ່ຫຼວງຕໍ່ປະຊາຊົນ ແລະ ລາຊະອານາຈັກກໍາປູເຈຍ, ສະແດງໃຫ້ເຫັນເຖິງນໍ້າໃຈສັດຊື່ບໍລິສຸດ ແລະ ຄວາມສາມັກຄີມິດຕະພາບຂອງການນໍາລັດຂັ້ນຕ່່າງໆ, ປະຊາຊົນຫວຽດນາມເວົ້າລວມ ແລະ ຂອງນະຄອນໂຮ່ຈີມິນເວົ້າສະເພາະທີ່ມີຕໍ່ກໍາປູເຈຍ.