(vovworld) - ຕອນ​ເຊົ້າ​ວັນ​ທີ 01/10 ຢູ່​ແຂວງ ກວາງ​ນາມ, ຄະນະ​ບໍລິຫານ​ງານ​ສູນ​ກາງ​ພັກ​ກອມ​ມູນິດ ຫວຽດນາມ, ສະພາ​ແຫ່ງ​ຊາດ, ປະທານ​ປະ​ເທດ, ລັດຖະບານ​ສາທາລະນະ​ລັດ​ສັງຄົມ​ນິຍົມ ຫວຽດນາມ, ຄະນະ​ກຳມະການ​ສູນ​ກາງ​ແນວ​ໂຮມ​ປະ​ເທດ​ຊາດ ຫວຽດນາມ ​ແລະ ​ແຂວງ ກວາງ​ນາມ​ ຈັດ​ຕັ້ງ​ພິທີ​ສະ​ເຫຼີ​ມສະຫຼອງ 140ປີ​ແຫ່ງ​ວັນ​ຄ້າຍ​ວັນ​ເກີດ​ຜູ້​ຮັກສາ​ການ​ປະທານ​ປະ​ເທດ ຮີ່ງທຸກ​ຄ໋າງ (01/10/1876 – 01/102016) ຢ່າງ​ສົມ​ກຽດ.

        ກ່າວ​ສູນ​ທອນ​ພົດ​ທີ່​ພິທີ​ສະ​ເຫຼີ​ມສະຫຼອງ, ທ່ານ​ປະທານ​ປະ​ເທ​​​ດ ຫວຽດນາມ ​ເຈີ່ນ​ດ້າຍ​ກວາງ ​ເນັ້ນ​ໜັກ​ວ່າ: ຜູ້​ຮັກສາ​ການ​ປະທານ​ປະ​ເທດ ຮີ່ງທຸກ​ຄ໋າງ ​ແມ່ນ​ແບບຢ່າງ​ກ່ຽວ​ກັບ​ນ້ຳ​ໃຈ​ຮັກ​ຊາດ, ​ເຈດ​ຈຳນົງ​ຕໍ່​ສູ້​ເພື່ອ​ເອກະລາດ, ຄວາມ​ເສລີ​ພາບໃຫ້​ປະ​ເທດ​ຊາ​ດ; ​​ອຸທິດ​ຕະຫລອດ​ຊີວິດ ເພື່ອ​ປະ​ເທດ​ຊາດ, ​ເພື່ອ​ປະຊາຊົນ, ສຸດ​ຈິດ​ສຸດ​ໃຈຮັບ​ໃຊ້​ປະ​ເທດ​ຊາດ. ທ່ານ​ປະທານ​ປະ​ເທດ ​ເຈີ່ນ​ດ້າຍ​ກວາງ ຮຽກຮ້ອງ​ວ່າ:

        “ປະຕິບັດ​ຕາມ​ແບບຢ່າງ​ຂອງ​ທ່ານ ​ພະນັກ​ງານ, ສະມາຊິ​ກພັກ​​ແຕ່ລະຄົນ ຕ້ອງຈົ່ງ​ຮັກ​ພັກດີຢ່າງ​ເດັດຂາດ, ຢຶດໝັ້ນອຸດົມ​ຄະຕິ​ປະຕິວັດ, ຍາມ​ໃດ​ກໍ່​ຖື​ເປັນ​ສຳຄັນຜົນ​ປະ​ໂຫຍ​ດຂອງ​ປະ​ເທດ​ຊາດ ​ແລະ ປະຊາຊົນ​. ​ເພີ່ມ​ທະວີຝຶກ​ຝົນ​ຫຼໍ່​ຫຼອມຄຸນ​ນະ​ທາດ, ຄຸນ​ສົມບັດ​ປະຕິວັດ​ຕິດ​ພັນກັບ​ການ​ຕ້ານ​ລັດທິສ່ວນ​ຕົ​ວ, ສວຍໂອກາດ, ​ເພື່ອ​ຜົນ​ປະ​ໂຫຍ​ດສ່ວນ​ຕົວ ຕ້ານການ​ຊຸດ​ໂຊມ​ດ້ານແນວ​ຄິດ​ການ​ເມືອງ, ຄຸນສົມບັດ, ວິຖີ​ຊີວິດ…​ເດັດດ່ຽວ​ຕໍ່ສູ້​ຕ້ານອາດຍາ​ສິດ, ການ​ສໍ້​ລາດ​ບັງ​ຫລວງ, ການ​ຟຸມ​ເຟືອຍ, ພັກ​ພວກ, “ຫາຜົນ​ປະ​ໂຫຍ​ດກຸ່ມ”, ​ມີ​ແຕ່​ເວົ້າ​ລາໆ ບໍ່​ມີ​ຄວາມ​ຮັບຜິດຊອບ ​”