ສະມາຊິກ ຄະນະກູ້ໄພກູ້ຊີບ ຫວຽດນາມ ຢູ່ສະຖານທີ່ເກີດເຫດ (ພາບ:Cục Cảnh sát Phòng cháy chữa cháy và Cứu nạn cứu hộ)

ວັນທີ 12 ກຸມພາ, ເຖິງວ່າແມ່ນມື້ທີສອງ ເຂົ້າຮ່ວມວຽກງານກູ້ໄພກູ້ຊີບຢູ່ນະຄອນ Adiyaman ຂອງຕວກກີ, ແຕ່ຄວາມສຸດຈິດສຸດໃຈ ແລະ ເປັນມືອາຊີບຂອງບັນດາສະມາຊິກໃນຄະນະກູ້ໄພກູ້ຊີບ ຫວຽດນາມ ກໍ່ໄດ້ຮັບການຕີລາຄາສູງຈາກກຳລັງກູ້ໄພກູ້ຊີບ ຕວກກີ ແລະ ສາກົນ. ພັນຕີ ຫງວຽນວັນເກີ່ນ, ຮອງຫົວໜ້າພະແນກກູ້ໄພກູ້ຊີບ, ມະຫາວິທະຍາໄລ ດັບເພີງ, ກະຊວງຕຳຫຼວດ ຫວຽດນາມ ໃຫ້ຮູ້ວ່າ:

        “ເຖິງວ່າປະສົບກັບຄວາມຫຍຸ້ງຍາກຫຼາຍຢ່າງກ່ຽວກັບດ້ານດິນຟ້າອາກາດ ແລະ ສະພາບການເຮືອນຊານພັງທະລາຍຍັງສັບສົນຢູ່ກໍ່ຕາມ, ແຕ່ພວກຂ້າພະເຈົ້າໄດ້ເຂົ້າເຖິງແບບໃກ້ທີ່ສຸດກັບຜູ້ປະສົບເຄາະຮ້າຍຫຼາຍຄົນ. ຜູ້ປະສົບເຄາະຮ້າຍຈະໄດ້ຮັບການກູ້ເອົາຊີວິດ ແລະ ກັບເມືອຫາຄອບຄົວຂອງຕົນໂດຍໄວ”.

        ກ່ອນໜ້ານັ້ນ, ວັນທີ 11 ກຸມພາ, ແມ່ນມື້ທຳອິດທີ່ຈັດການກູ້ໄພກູ້ຊີບ, ກຳລັງກູ້ໄພກູ້ຊີບ ຫວຽດນາມ ໄດ້ສົມທົບກັບກອງທັບ ປາກິດສະຖານ ພົບເຫັນ ແລະ ກູ້ເອົາຊີວິດຂອງເດັກຊາຍອາຍຸ 14 ປີ ທີ່ຖືກທັບຖົມໃນກອງຊາກຫັກພັງນັ້ນ.

        ຢູ່ ຫວຽດນາມ, ຕອນຄ່ຳວັນທີ 12 ກຸມພາ, ທີ່ທ່າອາກາດສະຍານສາກົນ ໂນ້ຍບາຍ, ຮ່າໂນ້ຍ, ທະຫານ 76 ຄົນຂອງກອງທັບປະຊາຊົນ ຫວຽດນາມ ໄດ້ເດີນທາງໄປ ຕວກກີ ເຂົ້າຮ່ວມການເຄື່ອນໄຫວໜູນຊ່ວຍມະນຸດສະທຳ, ກູ້ໄພກູ້ຊີບພາຍຫຼັງເຫດແຜ່ນດິນໄຫວນີ້. ຄະນະໄດ້ນຳເອົາອຸປະກອນວິຊາສະເພາະ ວັດຖຸດ້ານພະລາທິການເພື່ອຮັບປະກັນໃຫ້ຄະນະມີເງື່ອນໄຂປະຕິບັດໜ້າທີ່ໃນເວລາ 1 ເດືອນຢ່າງພຽງພໍ.

        ຕາມຕົວເລກອັບເດດຫຼ້າສຸດ, ຈຳນວນຜູ້ເສຍຊີວິດໃນເຫດແຜ່ນດິນໄຫວຢູ່ ຕວກກີ ແລະ  ຊີຣີ ທີ່ເກີດຂຶຶ້ນໃນວັນທີ 6 ກຸມພາ ໄດ້ຂຶ້ນເຖິງກ່ວາ 33.000 ຄົນ.