ຕອນເຊົ້າວັນທີ 28 ມີນາ, ຢູ່ຮ່າໂນ້ຍ, ກະຊວງແຮງງານ, ທະຫານເສຍອົງຄະ ແລະ  ສັງຄົມຫວຽດນາມ ໄດ້ຈັດຕັ້ງກອງປະຊຸມສໍາມະນາກ່ຽວກັບກອບກໍານົດມາດຕະຖານວັດແທກລະດັບຄວາມຮູ້ໃນພາກພື້ນ ອາຊຽນ ແລະ ຂໍ້ຕົກລົງວ່າດ້ວຍການຮັບຮອງເຊິ່ງກັນແລະກັນໃນ ອາຊຽນ.

        ການກໍາເນີດຂອງປະຊາຄົມເສດຖະກິດ ອາຊຽນ ປີ 2015 ໄດ້ນໍາມາເຊິ່ງກາລະໂອກາດເຊື່ອມໂຍງເຂົ້າກັບພາກພື້ນຢ່າງຮອບດ້ານ ກ່ຽວກັບດ້ານແຮງງານ, ວຽກເຮັດວຽກງານທໍາລະຫວ່າງບັນດາປະເທດສະມາຊິກໃນກຸ່ມ. ຕາມນັ້ນແລ້ວ, ຊາວຜູ້ອອກແຮງງານຂອງບັນດາປະເທດໃນພາກພື້ນ ອາຊຽນ ສາມາດເຮັດວຽກ, ເລືອກເຟັ້ນ ແລະ ຕັດສິນກ່ຽວກັບກາລະໂອກາດການເຮັດວຽກຂອງຕົນບໍ່ວ່າຈະຢູ່ປະເທດໃດ ເຊິ່ງຕົນມີຄວາມຕ້ອງການຢ່າງເສລີ. ປັດຈຸບັນ, ບັນດາສະມາຊິກ ອາຊຽນ ພວມນໍາໃຊ້ຂໍ້ຕົກລົງວ່າດ້ວຍການຮັບຮອງເຊິ່ງກັນແລະກັນໃນຂອບເຂດຂອງ 8 ຂະແໜງວິຊາຊີບຄື: ການແພດ, ການປ່ິນປົວແຂ້ວ, ພະຍາບານ, ວິສະວະກອນ, ສະຖາປະນິກ, ບັນຊີ, ການສໍາຫຼວດ ແລະ ການທ່ອງທ່ຽວ. ກ່າວຄໍາເຫັນທີ່ກອງປະຊຸມສໍາມະນາ, ທ່ານນາງ ຫງວຽນທິຮ່າ, ຮອງລັດຖະມົນຕີກະຊວງແຮງງານ, ທະຫານເສຍອົງຄະ ແລະ ສັງຄົມ, ໃຫ້ຮູ້ວ່າ:

        “ຈໍານວນວຽກງານໃນ 8 ຂະແໜງວິຊາຊີບທີ່ຫາກໍ່ກ່າວມາຂ້າງເທິງນັ້ນ ພຽງແຕ່ກວມເອົາສ່ວນໜ້ອຍໜຶ່ງໃນຈໍານວນວຽກງານທັງໝົດ ເຊິ່ງປະຊາຄົມເສດຖະກິດ ອາຊຽນ ນໍາມາໃຫ້ ແລະ ພຽງແຕ່ສົ່ງຜົນກະທົບໄລຍະສັ້ນໃນລະດັບໃດໜຶ່ງເທົ່ານັ້ນ. ເພື່ອໜູນຊ່ວຍຂໍ້ຕົກລົງວ່າດ້ວຍການຮັບຮອງເຊິ່ງກັນແລະກັນນັ້ນ, ອາຊຽນ ໄດ້ສ້າງກອບກໍານົດມາດຕະຖານວັດແທກລະດັບຄວາມຮູ້ ອາຊຽນ ເພື່ອສາມາດປຽບທຽບລະດັບຄວາມຮູ້ລະຫວ່າງບັນດາປະເທດສະມາຊິກນໍາກັນ. ໃນວິວັດທະນາການລວມຂອງພາກພື້ນ, ປັດຈຸບັນ ກອບກໍານົດມາດຕະຖານວັດແທກລະດັບຄວາມຮູ້ແຫ່ງຊາດຂອງຫວຽດນາມ ລວມມີ 8 ລະດັບ ເຊິ່ງນາຍົກລັດຖະມົນຕີໄດ້ອະນຸມັດຜ່ານ ເມື່ອປີ 2016”.