ໂດຍສືບຕໍ່ຫລຸດອາກອນມູນຄ່າເພີ່ມ ຈາກ 10% ລົງເຫຼືອພຽງ 8% ແມ່ນໜຶ່ງໃນບັນດາເນື້ອໃນໂດຍບັນດາສະມາຊິກສະພາແຫ່ງຊາດ ມີຄວາມສົນໃຈ ປະກອບຄຳເຫັນທີ່ກອງປະຊຸມສະໄໝສາມັນຄັ້ງທີ 5 ຂອງສະພາແຫ່ງຊາດຊຸດທີ XV, ເຊິ່ງຈັດຂຶ້ນໃນລະຫວ່າງວັນທີ 22 ພຶດສະພາ ຫາວັນທີ 10 ມິຖຸນາ. ບັນດາສະມາຊິກສະພາແຫ່ງຊາດ ໄດ້ຕີລາຄາລວມວ່າ, ນີ້ແມ່ນມາດຕະການທີ່ຈຳເປັນ, ປະກອບສ່ວນເພື່ອຫລຸດລາຄາຜະລິດຕະພັນ, ກະຕຸ້ນຄວາມຕ້ອງການໃຊ້ສອຍ, ສ່ົງເສີມການຜະລິດ, ສ້າງວຽກເຮັດງານທຳໃຫ້ແກ່ແຮງງານ, ຈາກນັ້ນຊ່ວຍຟື້ນຟູເສດຖະກິດ, ຮັບປະກັນຊີວິດສັງຄົມ.

        ຫາງສຽງຕີລາຄາວ່າການຫລຸດອາກອນມູນຄ່າເພີ່ມ ຈະຊ່ວຍຊຸກຍູ້ການບໍລິໂພກອຸປະໂພກຕະຫຼາດພາຍໃນປະເທດ ດ້ວຍຂອບຂະໜາດປະຊາກອນ 100 ລ້ານຄົນ, ສ້າງກຳລັງກະຕຸ້ນໃຫ້ແກ່ວິສາຫະກິດຟື້ນຟູ, ສ້າງທ່ວງທ່າຜະລິດໃຫ້ປີນີ້ ແລະ ຊຸມປີຕໍ່ໄປ. ນີ້ແມ່ນມາດຕະການສ້າງລາຍຮັບແບບຍືນຍົງໃຫ້ແກ່ງົບປະມານແຫ່ງລັດ. ທ່ານ ປອ ຫວູຊວນເຈື່ອງ, ອາຈານ, ນັກຊ່ຽວຊານດ້ານເຄື່ອງໝາຍການຄ້າ, ມະຫາວິທະຍາໄລ ການຄ້າ, ໃຫ້ຂໍ້ສັງເກດວ່າ:

        “ການຫລຸດຜ່ອນອາກອນ VAT ລົງເຫຼືອພຽງ 8% ຈະຊຸກຍູ້ກຳລັງການຜະລິດໃຫ້ແກ່ບັນດາວິສາຫະກິດ, ນີ້ແມ່ນປັດໄຈໜຶ່ງຈາກແຫຼ່ງສະໜອງ. ປັດໄຈທີສອງແມ່ນ ແນ່ນອນວ່າເມື່ອລາຄາຫລຸດລົງນັ້ນ, ຜູ້ບໍລິໂພກຈະມີກຳລັງຊື້ຫຼາຍກ່ວາ. ຜູ້ບໍລິໂພກ ຫວັງຢາກນຳໃຊ້ຫຼາຍຜະລິດຕະພັນ, ຈາກນັ້ນ, ຜະລິດຕະພັນຢູ່ທ້ອງຕະຫຼາດ ກໍ່ມີລາຄາເໝາະສົມກ່ວາ. ພິເສດ, ນີ້ແມ່ນແຜນນະໂຍບາຍທີ່ເໝາະສົມກັບສະພາບການພາຍຫຼັງໂລກລະບາດ, ຜູ້ບໍລິໂພກ ຕ້ອງຈຳກັດການໃຊ້ສອຍ ແລະ ໃສ່ໃຈໃນການເລືອກເຟັ້ນຜະລິດຕະພັນທີ່ເໝາະສົມກັບຄວາມສາມາດດ້ານການເງິນຂອງຕົນ”.