( vovworld ) - ວັນທີ 21/6, ກອງປະຊຸມສຸດຍອດຂອງສະຫະປະຊາຊາດກ່ຽວກັບການພັດທະນາແບບຍືນຍົງ ( Rio+20 ) ໄດ້ກ້າວເຂົ້າສູ່ວາລະປະຊຸມຄົບຄະນະຄັ້ງທີ 3. ກ່າວຄຳເຫັນທີ່ວາລະປະຊຸມ, ຕອນບ່າຍວັນທີ 21/6, ທ່ານຮອງນາຍົກລັດຖະມົນຕີຫວຽດນາມ Nguyen Thien Nhan ໄດ້ເນັ້ນໜັກເຖິງບັນດາການປະກອບສ່ວນຂອງຫວຽດນາມ ກ່ຽວກັບການພັດທະນາແບບຍືນຍົງໃນ 10 ປີທີ່ຜ່ານມາ ກໍຄືສະແດງທັດສະນະຂອງຫວຽດນາມ ກ່ຽວກັບບັນຫານີ້ໃນອະນາຄົດ. ທ່ານຮອງນາຍົກລັດຖະມົນຕີໄດ້ຢືນຢັນວ່າ ລັດຖະບານຫວຽດນາມໄດ້ຖືການພັດທະນາແບບຍືນຍົງແມ່ນເປົ້າໝາຍທະລຸລົງໃນຍຸດທະສາດພັດທະນາແຫ່ງຊາດໃນປະຈຸບັນ ແລະ ໃນອະນາຄົດ. ທ່ານຮອງນາຍົກລັດຖະມົນຕີໃຫ້ຂໍ້ສັງເກດວ່າ ກອງປະຊຸມ Rio+20 ຄັ້ງນີ້ “ ມີຄວາມໝາຍປະຫວັດສາດ ” ພ້ອມກັນນັ້ນກໍຖືວ່າ ກອງປະຊຸມກໍແມ່ນໂອກາດເພື່ອໃຫ້ບັນດາປະເທດໃນທົ່ວໂລກຢືນຢັນຄຳໝັ້ນສັນຍາຄືນໃໝ່ ກໍຄືຍົກອອກບັນດາຂໍ້ຕົກລົງດ້ານການເມືອງໃໝ່ ແລະ ບັນດາຄວາມມານະພະຍາຍາມທົ່ວໂລກໃຫ້ແກ່ການພັດທະນາແບບຍືນຍົງ ກໍຄືການເພີ່ມທະວີການຮ່ວມມື ແລະ ການພົວພັນຄູ່ຮ່ວມມືໃນຂົງເຂດນີ້. ບົນພື້ນຖານນັ້ນ, ທ່ານຮອງນາຍົກລັດຖະມົນຕີ Nguyen Thien Nhan ໄດ້ເນັ້ນໜັກວ່າ, ຫວຽດນາມ ສະເໜີໃຫ້ສະຫະປະຊາຊາດ ຄວນສ້າງຕັ້ງສູນເສດຖະກິດຂຽວຕ່າງໆຢູ່ບັນດາພາກພື້ນ ແລະ ໂລກ. ບັນດາສູນດັ່ງກ່າວມີໜ້າທີ່ແນະນຳບັນດາຂໍ້ມູນຫຼ້າສຸດຂອງປະເທດຕ່າງໆໃນພາກພື້ນ, ສະໜອງບັນດາການບໍລິໃຫ້ຄຳປຶກສາສ້າງນະໂຍບາຍ ແລະ ປະຕິບັດຢ່າງດີທີ່ສຸດໃຫ້ແກ່ບັນດາປະເທດ, ສ້າງບົດລາຍງານປະຈຳປີກ່ຽວກັບເສດຖະກິດຂຽວ… ຫວຽດນາມ ໄດ້ນຳສະເໜີບັນດາມາດຕະການສ້າງໂຄງປະກອບ ແລະ ບັບປຸງບັນດາອົງການຂອງສະຫະປະຊາຊາດຄືນໃໝ່ ເພື່ອຍົກສູງປະສິດທິຜົນແຫ່ງການປະຕິບັດຈຸດໝາຍພັດທະນາແບບຍືນຍົງ. ກ່ຽວຂ້ອງເຖິງບັນຫາມະຫາສະມຸດ, ຫວຽດນາມ ຮຽກຮ້ອງໃຫ້ສະຫະປະຊາຊາດ ສ້າງລະບົບຮັບມືກັບລະດັບນ້ຳທະເລຂຶ້ນສູງຢ່າງວ່ອງໄວ ແລະ ມີປະສິດທິຜົນ, ບົນພື້ນຖານສົມທົບບັນດາຄວາມຮູ້ ແລະ ເຕັກໂນໂລຊີ ກໍຄືແຫຼ່ງກຳລັງຂອງບັນດາປະເທດພັດທະນາ ແລະ ປະເທດພວມພັດທະນາ.