ຫວຽດນາມ ດຳລົງຕຳແໜ່ງເປັນປະທານສະພາ ຫຼຸດຜ່ອນກຳລັງທັບ ປີ 2019
(VOVWORLD) - ວັນທີ 25 ມິຖຸນາ, ທີ່ ສຳນັກງານສະຫະປະຊາຊາດ ຢູ່ Geneva, ສະວິດ, ທ່ານ ເຢືອງຈີ໊ຢຸ໊ງ ເອກອັກຄະລັດຖະທູດ, ຫົວໜ້າຄະນະຜູ້ແທນ ຫວຽດນາມ ປະຈຳ Geneva ໄດ້ເປັນປະທານວາລະປະຊຸມຄົບຄະນະຢ່າງເປັນທາງການຄັ້ງທຳອິດຂອງ ສະພາຫຼຸດຜ່ອນກຳລັງທັບ (CD) ໃນອາຍຸການ ຫວຽດນາມເປັນປະທານ CD (ໃນລະຫວ່າງ ວັນທີ 24 – 28 ມິຖຸນາ 2019, ແລະ ລະຫວ່າງ ວັນທີ 29 ກໍລະກົດ - 18 ສິງຫາ 2019)
 ພາບປະກອບ (ພາບ: ກະຊວງການຕ່າງປະເທດ) |
. ທ່ານ ເຢືອງຈີ໊ຢຸ໊ງ ເອກອັກຄະລັດຖະທູດ ໄດ້ເນັ້ນໜັກເຖິງຄວາມສຳຄັນຂອງການຮ່ວມມືໃນຂອບເຂດບັນດາກົນໄກຫຼາຍຝ່າຍເພື່ອແກ້ໄຂບັນດາສິ່ງທ້າທາຍລວມທີ່ນັບມື້ນັບສັບສົນຕໍ່ສະພາບການສັນຕິພາບ ແລະ ຄວາມໝັ້ນຄົງສາກົນ, ຢັ້ງຢືນວ່າ ຫວຽດນາມ ມານະພະຍາຍາມເຂົ້າຮ່ວມຢ່າງຕັ້ງໜ້າ, ມີຄວາມຮັບຜິດຊອບຕໍ່ວຽກງານຂອງປະຊາຄົມສາກົນໃນຂົງເຂດນີ້. ທ່ານ ເຢືອງຈີ໊ຢຸ໊ງ ເອກອັກຄະລັດຖະທູດໄດ້ສະແດງຄວາມຫວັງວ່າ ບັນດາປະເທດສະມາຊິກຈະພ້ອມກັນສະແດງໃຫ້ເຫັນເຈດຕະນາດີໃນການຮ່ວມມື, ເພື່ອປະກອບສ່ວນຊຸກຍູ້ກອງປະຊຸມໃຫ້ບັນລຸໄດ້ໝາກຜົນທີ່ຕັ້ງໜ້າແຕ່ນີ້ມາຮອດທ້າຍປີ 2019.
ໃນການປຶກສາຫາລື, ບັນດາປະເທດ ລ້ວນແຕ່ສະແດງຄວາມມຸ່ງຫວັງຕໍ່ອາຍຸການປະທານ CD ຂອງ ຫວຽດນາມ, ຢັ້ງຢືນວ່າຈະ ສະໜັບສະໜູນບັນດາຂໍ້ລິເລີ່ມ, ຄວາມມານະພະຍາຍາມຂອງ ຫວຽດນາມ ແລະ ພ້ອມແລ້ວທີ່ຈະຮ່ວມມືເພື່ອແນໃສ່ຊຸກຍູ້ ວຽກງານຂອງ ກອງປະຊຸມ. ບັນດາປະເທດໄດ້ຊົມເຊີຍຂໍ້ລິເລີ່ມຂອງ ຫວຽດນາມກ່ຽວກັບເລື່ອງເຊີນທ່ານເລຂາທິການໃຫຍ່ ອາຊຽນມາເຂົ້າຮ່ວມ ແລະ ກ່າວຄຳເຫັນທີ່ກອງປະຊຸມ, ຕີລາຄາສູງບົດບາດ ແລະ ການປະກອບສ່ວນຂອງບັນດາອົງການຈັດຕັ້ງໃນພາກພື້ນ, ໃນນັ້ນມີ ອາຊຽນໃນຂົງເຂດຫຼຸດຜ່ອນກຳລັງທັບເວົ້າສະເພາະ ແລະ ການຮັກສາ, ຮັບປະກັນສັນຕິພາບ, ຄວາມໝັ້ນຄົງສາກົນເວົ້າລວມ.