ເວັບໄຊຂອງກຸ່ມບໍລິສັດປະກັນໄພສິນເຊື່ອເອີລົບ Credendo (ພາບ: TTXVN)

ວັນທີ 22 ກຸມພາ, ກຸ່ມບໍລິສັດປະກັນໄພສິນເຊື່ອເອີລົບ Credendo ສາຂາຢູ່ເຢຍລະມັນ ແລະ ໂອຕາລິດ ໄດ້ປະກາດການຄົ້ນຄວ້າຕີລາຄາລະດັບຄວາມສ່ຽງຢູ່ຫວຽດນາມ, ໃນນັ້ນໄດ້ເນັ້ນໜັກວ່າ ປະເທດອາຊີຕາເວັນອອກສ່ຽງໃຕ້ນີ້ພວມສືບຕໍ່ຂຽນເລື່ອງລາວກ່ຽວກັບຜົນສຳເລັດທາງດ້ານເສດຖະກິດພາຍຫຼັງຄວບຄຸມໂລກລະບາດໂຄວິດ-19 ໄດ້ເປັນຢ່າງດີ. ບົດຂຽນໄດ້ຄັດສະເໜີຂໍ້ສະຫຼຸບການຄົ້ນຄວ້າບັນດາປະເທດຫຼ້າສຸດຂອງ Credendo ໃຫ້ຮູ້ວ່າ, ຫວຽດນາມ ແມ່ນໜຶ່ງໃນຈຳນວນໜ້ອຍປະເທດທີ່ສະແດງໃຫ້ເຫັນຄວາມສາມາດຟື້ນຟູຢ່າງຈະແຈ້ງຍ້ອນມີການສະກັດກັ້ນໂລກລະບາດໄວຣັດ SARS-CoV-2 ໂດຍໄວ, ສະເໝີຕົ້ນສະເໝີປາຍ ແລະ ມີປະສິດທິຜົນທີ່ສຸດ.

        Credendo ໃຫ້ຂໍ້ສັງເກດວ່າ, ຫວຽດນາມ ໄດ້ ແລະ ພວມໄດ້ຮັບຜົນປະໂຫຍດຈາກການປ່ຽນແປງຂອງສະພາບແວດລ້ອມດ້ານການຄ້າ ແລະ ເລື່ອງຈັດຕັ້ງລະບົບສະໜອງຄືນໃໝ່ນັ້ນພວມດຳເນີນໄປ ແລະ ນຳມາເຊິ່ງທ່າແຮງໃຫ້ແກ່ຫວຽດນາມ ໃນໄລຍະຍາວ ຍ້ອນຫວຽດນາມ ໄດ້ຮັບຖືວ່າແມ່ນສະຖານທີ່ລົງທຶນຢ່າງໝັ້ນຄົງໃຫ້ແກ່ການຫັນປ່ຽນການລົງທຶນຢູ່ອາຊີຕາເວັນອອກສ່ຽງໃຕ້.

        ໃນຂະນະນັ້ນ, ຫ້ອງການຄົ້ນຄວ້າເສດຖະກິດມະຫາພາກອາຊຽນ+3 (AMRO) ຫາກໍ່ໃຫ້ຂໍ້ສັງເກດວ່າ, ຄາດວ່າ ການເຕີບໂຕຍອດຜະລິດຕະພັນພາຍໃນ (GDP) ຂອງຫວຽດນາມ ຈະບັນລຸ 7% ໃນປີ 2021, ຍ້ອນການຟື້ນຟູຂອງຄວາມຕ້ອງການຢູ່ພາຍນອກ, ຊ່ວຍໃຫ້ພື້ນຖານເສດຖະກິດຢູ່ພາຍໃນປະເທດສາມາດຟື້ນຟູ ແລະ ກຳລັງຄວາມສາມາດໃນການຜະລິດກໍ່ເພີ່ມຂຶ້ນ. AMRO ໄດ້ເນັ້ນໜັກເຖິງຄວາມຈຳເປັນຂອງເລື່ອງຮັກສາການໜູນຊ່ວຍທາງດ້ານນະໂຍບາຍເພື່ອໃຫ້ຫວຽດນາມ ເພີ່ມທະວີການຟື້ນຟູເສດຖະກິດ ແລະ ສ້າງເງື່ອນໄຂສະດວກໃຫ້ແກ່ການຫັນປ່ຽນເປັນ “ສະພາບປົກກະຕິໃໝ່” ພາຍຫຼັງໂລກລະບາດ.