ທ່ານນາງ Riva Ganguly Das, ຮອງລັດຖະມົນຕີກະຊວງການຕ່າງປະເທດ ອິນເດຍ ກ່າວຄຳເຫັນທີ່ເວທີປາໄສ(ພາບ:ກະຊວງການຕ່າງປະເທດ ອິນເດຍ )

ຫວຽດນາມ ແມ່ນເສົາຄ້ຳສຳຄັນໃນນະໂຍບາຍການກະທຳມຸ່ງໄປສູ່ທາງທິດຕາເວັນອອກ ຂອງ ອິນເດຍ ແລະ ແມ່ນຄູ່ຮ່ວມມືສຳຄັນໃນຂໍ້ລິເລີ່ມ ມະຫາສະມຸດອິນເດຍ - ປາຊີຟິກ ຂອງອິນເດຍ, ອີງໃສ່ບັນດາຄຸນຄ່າ ແລະ ຜົນປະໂຫຍດລວມໃນການຊຸກຍູ້ສັນຕິພາບ, ສະຖຽນລະພາບ ແລະ ວັດທະນາຖາວອນ ຢູ່ພາກພື້ນ. ນີ້ແມ່ນຄຳຢັ້ງຢືນຂອງທ່ານນາງ Riva Ganguly Das, ຮອງລັດຖະມົນຕີກະຊວງການຕ່າງປະເທດ ອິນເດຍ, ຢູ່ເວທີປາໄສວິສາຫະກິດ ອິນເດຍ - ຫວຽດນາມ ທີ່ໄດ້ດຳເນີນຕາມຮູບການທາງອອນລາຍໃນວັນທີ 20 ຕຸລາ.

ທ່ານນາງຮອງລັດຖະມົນຕີການຕ່າງປະເທດ ອິນເດຍ ໄດ້ເນັ້ນໜັກວ່າ ປັດຈຸບັນ, ການພົວພັນຄູ່ຮ່ວມມືຍຸດທະສາດຮອບດ້ານ ລະຫວ່າງ ອິນເດຍ - ຫວຽດນາມ ໄດ້ເປີດກ້ວາງ ອອກສູ່ບັນດາຂົງເຂດຮ່ວມມື: ຈາກການພົບປະດ້ານການເມືອງ ຕະຫຼອດຮອດດ້ານເສດຖະກິດ ແລະຄູ່ຮ່ວມມືພັດທະນາ, ການຮ່ວມມືດ້ານປ້ອງກັນຊາດ ປ້ອງກັນຄວາມສະຫງົບ, ການແລກປ່ຽນວັດທະນະທຳ ແລະ ພົວພັນແລກປ່ຽນປະຊາຊົນ. ຕາມທ່ານນາງຮອງລັດຖະມົນຕີ Riva Ganguly Das ແລ້ວ, ແຕ່ດົນນານມາແລ້ວ ອິນເດຍ ແລະ ຫວຽດນາມ ໄດ້ສ້າງຄວາມໄວ້ເນື້ອເຊື່ອໃຈ,  ມີເຈດຕະນາດີ ແລະ ທັງມີການເຕົ້າໂຮມຍຸດທະສາດໃນຫຼາຍບັນຫາທົ່ວໂລກ ແລະ ພາກພື້ນ. ດັ່ງນັ້ນ, ສອງປະເທດມີຄວາມສາມາດບົ່ມຊ້ອນຫຼາຍຢ່າງເພື່ອ ຊຸ້ກຍູ້ການຮ່ວມມືທາງດ້ານເສດຖະກິດ, ການລົງທຶນ, ການຄ້າ ໃຫ້ເລິກເຊິ່ງກ້ວາງຂວາງກ່ວາອີກ.