(vovworld) - ໝາກຜົນຂອງການທາບທາມຄຳເຫັນຄັ້ງຕ່າງໆ ກັບບັນດາພົນລະເມືອງ ຫວຽດນາມ ກ່ຽວກັບອະນາຄົດຊື່ງເຂົາເຈົ້າປາດຖະຫນາ ໂດຍ ສປຊ ຫນູນຊ່ວຍ ຊື່ງຖືກນຳມາສະເຫນີໃນກອງປະຊຸມສຳມະນາທີ່ມີຫົວຂໍ້ວ່າ: “ການທາບທາມຄຳເຫັນແຫ່ງຊາດກ່ຽວກັບໂຄງການພັດທະນາພາຍຫລັງປີ 2015” ທີ່ດຳເນີນໄປຢູ່ ຮ່າໂນ້ຍ.
ທ່ານນາງ Pratibha Mehta
ພາບ:internet
|
ກອງປະຊຸມສຳມະນາແມ່ນໝາກຜົນພາຍຫລັງເກືອບ 3 ເດືອນ ທີ່ບັນດາອົງການຂອງ ສປຊ ຢູ່ ຫວຽດນາມ ປະຕິບັດບັນດາການທາບທາມຄຳເຫັນກັບ 8 ໝວດເປົ້າໝາຍໃນສັງຄົມ ແນໃສ່ປະກອບຄຳເຫັນໃຫ້ສປຊ ຕົກລົງກ່ຽວກັບໂຄງການພັດທະນາຂອງໂລກພາຍຫລັງປີ 2015. ທີ່ກອງປະຊຸມສຳມະນາ, ທ່ານນາງ Pratibha Mehta ຜູ້ປະສານງານປະຈຳ ສປຊ ຢູ່ ຫວຽດນາມ ຊີ້ແຈງວ່າ: ຫວຽດນາມ ພວມປະເຊີນຫນ້າກັບສິ່ງທ້າທາຍໃຫຍ່ຫລາຍຢ່າງ ພິເສດ ໃນສະພາບການພື້ນຖານເສດຖະກິດໂລກປະສົບກັບຄວາມຫຍຸ້ງຍາກ ແລະ ການກະທົບຈາກການປ່ຽນແປງຂອງດິນຟ້າອາກາດນັບມື້ນັບຈະແຈ້ງ ແລະ ຮ້າຍແຮງ. ທ່ານນາງ Pratibha Mehta ໃຫ້ຮູ້ວ່າ:
“ໂຄງການພັດທະນາພາຍຫລັງປີ 2015 ຕ້ອງສ່ອງແສງໃຫ້ເຫັນສະພາບໂລກໃນປະຈຸບັນ ແລະ ຄິດໄລ່ເຖິງບັນຫາທີ່ບໍ່ທັນບັນລຸໄດ້ໃນຈຸດໝາຍພັດທະນາສະຫັດສະຫວັດທີ່ໄດ້ຮັບຮອງເອົາໃນປີ 2000. ໂຄງການພັດທະນາໃຫມ່ ຕ້ອງແກ້ໄຂບັນດາຈຸດໝາຍສັງຄົມ, ສິ່ງແວດລ້ອມ ແລະ ພື້ນຖານເສດຖະກິດຢ່າງສັງລວມ. ເຖິງວ່າ ຫວຽດນາມ ບັນລຸໄດ້ບັນດາຄວາມກ້າວຫນ້າໃນການປະຕິບັດຈຸດໝາຍພັດທະນາສະຫັດສະຫວັດແລ້ວກໍຕາມ ແຕ່ ຫວຽດນາມ ຄວນສືບຕໍ່ມານະພະຍາຍາມເພື່ອບັນລຸໄດ້ບັນດາຈຸດໝາຍຢູ່ແຕ່ລະບ້ານ, ແຂວງ, ນະຄອນ. ຫວຽດນາມ ຄວນຍູ້ໄວຄວາມຄືບຫນ້າໃນການປະຕິບັດບັນດາຈຸດໝາຍທີ່ບໍ່ທັນບັນລຸໄດ້ ພ້ອມທັງໝູນໃຊ້ບົດຮຽນຂອງຕົນເພື່ອຕັ້ງຫນ້າປະກອບສ່ວນໃຫ້ແກ່ກອງປະຊຸມສຳມະນາທົ່ວໂລກ ກ່ຽວກັບໂຄງການພັດທະນາພາຍຫລັງປີ 2015.”